અમેરિકાના ડોનાલ્ડ ટ્રમ્પ અને તેમના સહયોગી ઇલોન મસ્કની નીતિઓનો વિરોધ કરવા માટે શનિવાર, 5 એપ્રિલે અમેરિકાના મુખ્ય શહેરોની શેરીઓમાં હજારો લોકો ઉમટી પડ્યાં હતા અને ઉગ્ર વિરોધ કર્યો હતો. વોશિંગ્ટન, ન્યુ યોર્ક, હ્યુસ્ટન, ફ્લોરિડા, કોલોરાડો અને લોસ એન્જલસ સહિત 1200થી વધુ જગ્યાઓ પર વિરોધ રેલીનું આયોજન કરાયું હતું. વોશિંગ્ટનમાં, હજારો વિરોધીઓ નેશનલ મોલ પર એકઠા થયા હતાં જ્યાં ડઝનબંધ વક્તાઓએ ટ્રમ્પનો વિરોધ કર્યો હતો. ટ્રમ્પ જાન્યુઆરીમાં સત્તામાં આવ્યા પછી શનિવારના દેખાવો સૌથી મોટા હતાં.
સરકારી કર્મચારીઓની છટણી, અર્થતંત્ર, માનવાધિકાર સહિતના મુદ્દે ટ્રમ્પની નીતિઓનો વિરોધ કરાયો હતો. 150થી વધુ સંગઠનોએ 1,200થી વધુ જગ્યાએ ‘હેન્ડ્સ ઓફ’ આંદોલન કર્યું હતુ. આ સંગઠનમાં નાગરિક અધિકાર સંગઠન, કર્મચારી યુનિયન, LBGTQ+, વાજબી ચૂંટણી કાર્યકર્તા વગેરેનો સમાવેશ થાય હતો.
હજારો સરકારી કર્મચારીઓની છટણી, સામાજિક સુરક્ષા વિભાગની ફિલ્ડ ઓફિસો બંધ કરવી, કેટલીક એજન્સીઓના પાટિયા પાડી દેવા, ઇમિગ્રન્ટ્સને દેશનિકાલ કરવા, ટ્રાન્સજેન્ડર લોકોની સુરક્ષામાં ઘટાડો અને આરોગ્ય યોજનાના ફંડમાં ઘટાડો જેવા નિર્ણયોનો વિરોધ થયો હતો.
ટ્રમ્પ સલાહકાર અને ટેસ્લા, સ્પેસએક્સ અને સોશિયલ મીડિયા પ્લેટફોર્મ Xના માલિક મસ્ક સરકારી કર્મચારીઓની છટણીમાં મોટી ભૂમિકા ભજવી રહ્યાં છે. તેઓ નવા બનાવેલા ડિપાર્ટમેન્ટ ઓફ ગવર્નમેન્ટ એફિશિયન્સીના વડા તરીકે ખર્ચકાપના આકરા પગલાં લઈ રહ્યાં છે. નવા વહીવટીતંત્રે સત્તા સંભાળી ત્યારથી વિરોધીઓ ટ્રમ્પ અથવા મસ્ક વિરુદ્ધ અનેક વખત દેશવ્યાપી દેખાવો કર્યા છે.
