CPI(M)ના મહાસચિવ સીતારામ યેચુરીનું લાંબી માંદગી બાદ ગુરુવાર, 12 સપ્ટેમ્બરે નવી દિલ્હીમાં AIIMSમાં નિધન થયું હતું. તેઓ 72 વર્ષના હતાં. છેલ્લા કેટલાક દિવસોથી યેચુરીની તબિયત નાજુક હતી અને તેઓ ઓક્સિજન સપોર્ટ પર હતા. યેચુરીના પરિવારે શિક્ષણ અને સંશોધન હેતુઓ માટે તેમનું શરીર AIIMSને દાન કર્યું હતું.
આ દિગ્ગજ ડાબેરી નેતાના નિધન અંગે વડાપ્રધાન નરેન્દ્ર મોદી, કોંગ્રેસ નેતાઓ રાહુલ ગાંધી, સોનિયા ગાંધી સહિતના રાજકીય નેતાઓએ દુઃખ અને શોક વ્યક્ત કર્યો હતો. તેમણે 2005થી 2017 સુધી 12 વર્ષ રાજ્યસભા સાંસદ તરીકે સેવા આપી હતી.
એક નિવેદનમાં CPI(M)એ જણાવ્યું હતું કે યેચુરીના પાર્થિવ દેહને શનિવારે સવારે 11 વાગ્યાથી બપોરે 3 વાગ્યાની વચ્ચે પાર્ટીના મુખ્યાલયમાં લોકોના દર્શન અને શ્રદ્ધાંજલિ આપવા માટે રાખવામાં આવશે. ત્યારબાદ, મૃતદેહને એઈમ્સમાં લઈ જવામાં આવશે, જ્યાં તેની ઈચ્છા અનુસાર તબીબી સંશોધન માટે દાન કરવામાં આવશે. યેચુરીને ન્યુમોનિયા જેવા છાતીના ચેપની સારવાર માટે 19 ઓગસ્ટે AIIMSમાં દાખલ કરવામાં આવ્યા હતા.
યેચુરીના પરિવારમાં તેમની પત્ની સીમા ચિશ્તી છે. તેમને બે પુત્રો અને એક પુત્રી એમ ત્રણ સંતાન હતા, તેમના એક પુત્ર આશિષ યેચુરીનું 2021માં કોવિડ-19ને કારણે અવસાન થયું હતું.તેમની પુત્રી અખિલા યેચુરી યુનિવર્સિટી ઓફ એડિનબર્ગ અને સેન્ટ એન્ડ્રુઝ યુનિવર્સિટીમાં ભણાવે છે.
