અમેરિકામાં હાઉસ ફોરેન અફેર્સ કમિટીના ચેરમેન પ્રતિનિધિ માઈકલ મેકકોલના નેતૃત્વમાં સાત સભ્યોના યુએસ કોંગ્રેસના પ્રતિનિધિમંડળે તાજેતરમાં વડાપ્રધાન નરેન્દ્ર મોદી સાથે મુલાકાત કરી હતી. આ પ્રતિનિધિમંડળના અન્ય સભ્યોમાં પ્રતિનિધિ નેન્સી પેલોસી, પ્રતિનિધિ ગ્રેગરી મીક્સ, પ્રતિનિધિ મરિયાનેટ મિલર-મીક્સ, પ્રતિનિધિ નિકોલ મલ્લિઓટાકિસ, પ્રતિનિધિ અમરિશ બાબુલાલ “અમી બેરા” અને પ્રતિનિધિ જીમ મેકગવર્નનો સમાવેશ થાય છે. પ્રતિનિધિમંડળના સભ્યોએ વડાપ્રધાનને ઐતિહાસિક સતત ત્રીજી વખત ચૂંટવા બદલ અભિનંદન પાઠવ્યા હતા. તેમણે ભારતમાં તાજેતરમાં પૂર્ણ થયેલ વિશ્વની સૌથી મોટી લોકતાંત્રિક ચૂંટણી કવાયતની નિષ્પક્ષતા અને પારદર્શિતા માટે ઊંડી પ્રશંસા વ્યક્ત કરી. પ્રતિનિધિમંડળે ભારત-યુએસ સંબંધોને સૌથી વધુ પરિણામરૂપ ગણાવ્યા હતા અને વેપાર, નવી અને ઉભરતી ટેકનોલોજી, સંરક્ષણ, લોકો વચ્ચેના આદાનપ્રદાન સહિતના તમામ ક્ષેત્રોમાં વ્યાપક વ્યૂહાત્મક વૈશ્વિક ભાગીદારીને વધુ ગાઢ બનાવવા માટે તેમનો મજબૂત સમર્થન વ્યક્ત કર્યું હતું.
વડાપ્રધાને ભારત-યુએસ સંબંધોને આગળ વધારવામાં યુએસ કોંગ્રેસના સાતત્યપૂર્ણ અને દ્વિપક્ષીય સમર્થન દ્વારા ભજવવામાં આવેલી મહત્વપૂર્ણ ભૂમિકા પર પ્રકાશ પાડ્યો હતો, જે સામૂહિક લોકશાહી મૂલ્યો, કાયદાના શાસન માટે આદર અને લોકો-થી-લોકોના મજબૂત સંબંધો પર આધારિત છે. તેમણે વૈશ્વિક ભલાઈ માટે દ્વિપક્ષીય સંબંધોને વધુ મજબૂત કરવાની પ્રતિબદ્ધતાનો પુનરોચ્ચાર કર્યો હતો.
વડાપ્રધાને ગત વર્ષે જૂનમાં અમેરિકાની તેમની સત્તાવાર મુલાકાતને યાદ કરી હતી, જે દરમિયાન તેમને ઐતિહાસિક બીજી વખત યુએસ કોંગ્રેસના સંયુક્ત સત્રને સંબોધવાની તક મળી હતી.
