યુકે અને મોરિશિયસની સરકારો વચ્ચે અંતે ચાગોસ આઇલેન્ડ મુદ્દે સમજૂતી થઈ છે. યુકેએ હિન્દ મહાસાગરમાં સ્થિત મહત્ત્વનો ચાગોસ આઇલેન્ડ મોરિશિયસને સોંપવા માટે સહમતી દર્શાવી હતી. આ આઇલેન્ડના મુદ્દે બંને દેશોની વચ્ચે 50થી વધુ વર્ષના સમયથી વિવાદ ચાલી રહ્યો હતો. આ અંગે યુકે સરકારે જણાવ્યું હતું કે, સમજૂતી અંતર્ગત તે ચાગોસ આઇલેન્ડ સમૂહની અખંડિતતાને મોરિશિયસને સોંપી દેશે. જોકે, યુકે ડિએગો ગાર્સિયા પર સ્થિત બ્રિટન-અમેરિકન સેનાની જગ્યાનો ઉપયોગ કરવાનું જાળવી રાખશે. યુકે, અમેરિકાની સાથે મળીને ચાગોસના ડિએએગો ગાર્સિયા આઇલેન્ડ પર મિલિટરીનું સંચાલન કરે છે, જેનાથી હિન્દ મહાસાગરમાં તેને વ્યૂહાત્મક ફાયદો થાય છે.
ચાગોસ વિવાદ હિન્દ મહાસાગરમાં દ્વીપસમૂહની આસપાસ છે, જેનો યુકેએ 1814માં મોરેશિયસ સામે દાવો કર્યો હતો. 1966માં બ્રિટને ચાગોસ ટાપુઓનો સૌથી મોટો ટાપુ ડિએગો ગાર્સિયા, અમેરિકાને લીઝ પર આપ્યો હતો, જે આ વિસ્તારમાં લશ્કરી થાણું બનાવવા ઇચ્છે છે. આ પગલાને કારણે 1960 અને 1970ના દાયકામાં આશરે 2,000 ચાગોસિયનોને સેંકડો માઇલ દૂર મોરેશિયસ અને સેશેલ્સમાં ફરજિયાત સ્થાયી કરવામાં આવ્યા હતા. ચાગોસીઅન્સ મોટાભાગે 18મી સદીમાં ટાપુઓ પર લાવવામાં આવેલા આફ્રિકન ગુલામોના વંશજો છે. ત્યારથી તેઓ તેમના દેશમાં પાછા ફરવાના અધિકાર માટે લાંબી કાનૂની લડાઈ લડી રહ્યા હતા. તેમની તરફેણમાં બ્રિટિશ કોર્ટના ઘણા નિર્ણયો હોવા છતાં યુકેની સુપ્રીમ કોર્ટે 2008માં આ નિર્ણયોને રદ્ કર્યા હતા. 1968માં બ્રિટનથી આઝાદી મેળવનાર મોરેશિયસે ચાગોસ ટાપુઓ પર સતત પોતાનો દાવો જાળવી રાખ્યો હતો. મોરેશિયસના ભૂતપૂર્વ પ્રેસિડેન્ટ અનિરુદ્ધ જુગનાથે ભારપૂર્વક જણાવ્યું હતું કે મોરેશિયસથી ચાગોસને અલગ કરવું એ યુએનના ઠરાવોની વિરુદ્ધ છે અને તેમની સાથે ઘોર અન્યાય છે.
