ભારતને વિકસિત રાષ્ટ્ર બનવાથી કોઇ તાકાત રોકી શકશે નહીં તેના પર ભાર મૂકીને વડાપ્રધાન નરેન્દ્ર મોદીએ રવિવારે જણાવ્યું હતું કે ભારતના યુવાનોની શક્તિ તેને એક વિકસિત રાષ્ટ્ર બનાવશે. વિકસિત ભારત આર્થિક, વ્યૂહાત્મક, સામાજિક અને સાંસ્કૃતિક રીતે સશક્ત હશે.
સ્વામી વિવેકાનંદની જન્મજયંતિના પ્રસંગે દિલ્હીમાં યોજાયેલા ‘વિકસિત ભારત યંગ લીડર્સ ડાયલોગ’ને સંબોધતા મોદીએ કહ્યું હતું કે કેટલાંક લોકોને ભારતને વિકસિત દેશ બનાવવાનું લક્ષ્ય મુશ્કેલ લાગશે, પરંતુ તે અશક્ય નથી. ભારતની યુવા વસ્તીની ક્ષમતાઓ દેશને વિકસિત બનવા માટે શક્તિ આપશે. ‘વિકસિત ભારત’ની ભાવના તેના દરેક પગલાં, નીતિ અને નિર્ણયને માર્ગદર્શન આપે તો ભારતને વિકસિત દેશ બનવાથી કોઈ તાકાત રોકી શકશે નહીં. ભારતના યુવાનોની તાકાત ભારતને એક વિકસિત રાષ્ટ્ર બનાવશે. દેશને આગળ વધવા માટે મોટા લક્ષ્યો નક્કી કરવા પડશે. આજનું ભારત આ જ કરી રહ્યું છે. હાલમાં દેશ વિવિધ ક્ષેત્રોમાં અસંખ્ય લક્ષ્યો સમય પહેલા હાંસલ કરી રહ્યો છે.
વડાપ્રધાને જણાવ્યું હતું કે સરકાર એકલી દેશને પ્રગતિપંથે આગળ લઈ જઈ શકે નહીં. દેશભરના યુવાનોના આઇડિયા દેશની નીતિઓ અને તેની દિશાનો એક હિસ્સો બનશે. મહત્વાકાંક્ષી લક્ષ્યો હાંસલ કરવા માટે રાષ્ટ્રના દરેક નાગરિકની સક્રિય ભાગીદારી અને સામૂહિક પ્રયાસ જરૂરી છે. વડાપ્રધાન મોટા લક્ષ્યાંક સ્થાપિત કરવા અને તેને હાંસલ કરવા નિષ્ઠાપૂર્વક કામ કરવાની જરૂરિયાત પર ભાર મૂકવા માટે 1930ના દાયકાની આર્થિક કટોકટી પછી અમેરિકાના ઉદય તથા પાયાની સુવિધા વગરના પછાત પ્રદેશમાંથી આર્થિક તાકાત તરીકે ઉભરેલા સિંગાપોરના ઉદાહરણો ટાંક્યાં હતાં.
