મિર્ઝાપુર ધ ફિલ્મઃ એમેઝોન પ્રાઇમની વેબ સિરીઝ ‘મિર્ઝાપુર’ ડિજિટલ પ્લેટફોર્મ પર ખૂબ જ લોકપ્રિય બની હતી. તેની ત્રણ સિઝન આવી ગઈ છે અને તે તમામને દર્શકોએ આવકારી છે. અલી ફઝલ, પંકજ ત્રિપાઠી, દિવ્યેન્દુ શર્મા જેવા કલાકારોને ચમકાવતી આ સિરીઝ દર્શકોની ફેવરિટ સિરીઝ છે. આ સ્થિતિમાં ઘણા સમયથી ચર્ચા ચાલી રહી છે કે તેના નિર્માતા આ સિરીઝને ફિલ્મ સ્વરૂપે દર્શાવી શકે છે, તેની હવે પુષ્ટી થઈ ગઇ છે. આ ફિલ્મનું શીર્ષક ‘મિર્ઝાપુર ધ ફિલ્મ’ રાખવામાં આવ્યું છે.
‘મિર્ઝાપુર ધ ફિલ્મ’ને અંગે અધિકૃત જાહેરાત કરવામાં આવી છે અને તેની પ્રથમ ઝલક પણ બતાવવામાં આવી છે. એક્સેલ મૂવીઝે આ ફિલ્મનું ટીઝર સોશિયલ મીડિયા પર તાજેતરમાં પોસ્ટ કર્યું હતું. તેમાં કાલિન ભૈયા, ગુડ્ડુ પંડિત અને મુન્ના ભૈયાના એક્સપ્રેશન્સ જોઈ શકાય છે. આમાં સૌ પ્રથમ પંકજ ત્રિપાઠી કાલિન ભૈયાના રોલમાં જોવા મળે છે, જે સિંહાસનના મહત્વ, સન્માન અને શક્તિ વિશે વાત કરે છે. પછી અલી ફઝલ ગુડ્ડુ પંડિતના રોલમાં આવે છે અને કહે છે, ‘રિસ્ક લેવું એ અમારી યુએસપી છે.’ તે રમત બદલવાની વાત પણ કરે છે કે, હવે મિર્ઝાપુર કોઈની પાસે નહીં આવે પણ બધાને મિર્ઝાપુર જવું પડશે.
આ પછી મુન્ના ભૈયા એટલે કે દિવ્યેન્દુ શર્માની એન્ટ્રી થાય છે અને તે કહે છે, ‘બે હિન્દી ફિલ્મોનો હીરો છે. તમે કહ્યું કે અમે અમર છીએ. પછી છેલ્લે અભિષેક બેનર્જીની એન્ટ્રી થાય છે એટલે કે ‘મિર્ઝાપુર’ના કમ્પાઉન્ડર. તે બધા પોતપોતાની ભૂમિકામાં અદભૂત દેખાઈ રહ્યા છે. આવી સ્થિતિમાં, વેબ સિરીઝ પછી, આ બધા પાત્રોને ફરી એકવાર ફિલ્મમાં જોવાનું રસપ્રદ રહેશે.
એક્સેલ એન્ટરટેઇનમેન્ટના રિતેશ સિદ્ધવાણી અને ફરહાન અખ્તરે આ ફિલ્મની જાહેરાત કરતાં સોશિયલ મીડિયા પર પોસ્ટ લખી હતી. તેમાં લખ્યું હતું,“અમારા માટે આ એક નોંધપાત્ર ઘટના છે કે અમે મિર્ઝાપુર જેવું લોકપ્રિય સર્જન પાછું લઇને આવી રહ્યા છીએ અને એ પણ આ વખતે મોટા પડદા પર. ત્રણ સીઝન સુધી તેની જકડી રાખતી વાર્તા અને યાદગાર પાત્રોએ લોકોના દિલ પર રાજ કર્યું છે – પછી તે કાલીન ભૈયા હોય કે ગુડ્ડુ ભૈયા કે મુન્ના ભૈયા. અમે માનીએ છીએ કે આ પ્રકારની લોકપ્રિય સિરીઝમાંથી ફિલ્મ બનાવીને અમે તેને બેશક વધુ રસપ્રદ બનાવીશું, જેમાં ફરી દર્શકો એક વખત મિર્ઝાપુરની દુનિયામાં ખોવાઈ જશે.”
આ સાથે કેપ્શન પણ લખવામાં આવ્યું છે કે, ‘હવે સમય મોટો થશે અને પડદો પણ મોટો થશે. મિર્ઝાપુર ફિલ્મ ટૂંક સમયમાં આવી રહી છે. ફિલ્મની પ્રથમ ઝલક સામે આવ્યા બાદ ચાહકો ખૂબ જ ઉત્સાહિત થઈ ગયા છે અને પ્રતિક્રિયા આપી રહ્યા છે. તેઓ તેના રિલીઝ અને ટ્રેલરની રાહ જોવા લાગ્યા છે.આ ફિલ્મ 2026માં સિનેમાઘરોમાં રિલીઝ થશે.
