તાતા સ્ટીલ નેધરલેન્ડ્સ ખાતેના પ્લાન્ટમાંથી વિવિધ કારણોસર 1600 કર્મચારીઓની હકાલપટ્ટી કરશે. કંપનીએ ઉત્પાદન વધારવા અને કાર્યક્ષમતા સુધારવા માટે, ખર્ચ ઘટાડવા અને માર્જિન વધારવા માટે મેનેજમેન્ટ અને સપોર્ટ સ્ટાફમાંથી છટણી કરવાનો નિર્ણય કર્યો હતો. કંપનીએ તાજેતરમાં આ ટ્રાન્સફોર્મેશન પ્લાન અંગે ચર્ચા-વિચારણા શરૂ કરવા માટે સેન્ટ્રલ વર્ક્સ કાઉન્સિલ સમક્ષ રજૂઆત કરી છે. તેણે આ પ્લાન અંગે ટ્રેડ યુનિયનને પણ જાણ કરી હોવાનું કહ્યું હતું. તાતા સ્ટીલ નેધરલેન્ડ્સમાં ઈજમુઈડન ખાતે સ્ટીલ ઉત્પાદન પ્લાન્ટ ધરાવે છે જેની વાર્ષિક ક્ષમતા ગત વર્ષે 67.5 લાખ ટનની હતી. કંપનીએ કોમ્પ્રીહેન્સિવ ટ્રાન્સફોર્મેશન પ્રોગ્રામ નક્કી કર્યો છે જેથી પ્લાન્ટની કાર્યક્ષમતા વધશે, ખર્ચ ઘટશે અને નફો વધશે. આ માટે કંપનીનું સંગઠન બદલવું પડશે અને વધુ અસરકારક બનાવવું પડશે તેમ કંપનીએ કહ્યું છે. આ કવાયત હેઠળ મેનેજમેન્ટ અને સપોર્ટ લેવલના 1600 કર્મચારીઓની છટણી કરવી પડશે તેમ કંપનીએ જણાવ્યું હતું.
તાતા સ્ટીલના સીઈઓ અને એમડી ટી.વી. નરેન્દ્રને કહ્યું હતું કે નેધરલેન્ડ્સનો પ્લાન્ટ એક સમયે યુરોપમાં સૌથી કાર્યક્ષમ પૈકી એક હતો જેને ફરી એવી કાર્યક્ષમતાવાળો બનાવવાનો કંપનીનો પ્રયાસ છે. આ માટે સ્થાનિક સરકાર સાથે અને સંબંધિત લોકો સાથે સકારાત્મક ચર્ચા થઈ રહી છે.
