અમેરિકાના પ્રેસિડન્ટ ડોનાલ્ડ ટ્રમ્પે યુરોપની તમામ સ્ટીલ અને એલ્યુમિનિયમ પ્રોડક્ટ્સ પર ટેરિફને વધારીને 25 ટકા કર્યાના ગણતરીના કલાકોમાં યુરોપિયન યુનિયને પણ વળતો પ્રહાર કરીને અમેરિકાની ઇન્ડસ્ટ્રીયલ અને કૃષિ પેદાશો પર નવી ડ્યૂટી લાદવાની જાહેરાત કરી હતી. આમ ટ્રમ્પે ચીન, કેનેડા અને મેક્સિકો પછી હવે યુરોપ સાથે પણ ટેરિફવોર ચાલુ કર્યું છે.
યુરોપને અગાઉથી યુએસની ટેરિફની ધારણા હતી અને અગાઉથી તૈયાર હતું. આ નવા પગલાંથી અમેરિકા અને યુરોપ વચ્ચેના અગાઉથી તણાવપૂર્ણ સંબંધો વધુ ખરાબ થયા છે. યુરોપે અગાઉ જણાવ્યું હતું કે તે ભવિષ્યમાં તેની પોતાની સુરક્ષાની સંભાળ રાખશે અને નાટો પર મદાર રાખશે નહીં.
યુરોપે અમેરિકાની માત્ર સ્ટીલ અને એલ્યુમિનિયમ પ્રોડક્ટ્સ પર જ નહીં, પરંતુ ટેક્સટાઇલ, હોમ એપ્લાયન્સ, કૃષિ, મોટરસાઇકલ, પીનટ બટર અને જીન્સ સહિતની પ્રોડક્ટ્સ પર આશરે 26 અબજ યુરો (28 અબજ ડોલર)ની ટેરિફ લાદી છે. યુરોપની ડ્યૂટીનો હેતુ યુરોપને વધારાનું નુકસાન ઓછું કરીને યુએસ પર દબાણ લાવવાનું છે.
યુરોપિયન કમિશનના વડા ઉર્સુલા વોન ડેર લેયેને જણાવ્યું હતું કે અમેરિકા 28 અબજ ડોલરની ટેરિફ લાદી રહ્યું છે ત્યારે અમે 26 અબજ યુરોના વળતા પગલાં લઈ રહ્યાં છે. અમારું દ્રઢપણે માનવું છે કે ભૂરાજકીય અને આર્થિક અનિશ્ચિતતાઓથી ભરેલી દુનિયામાં આપણા અર્થતંત્રોને ટેરિફનો બોજ આપવો અમારા હિતમાં નથી.
યુએસ ટેરિફ અન્યાયી, પણ વળતા પગલાં નહીં લઇએઃ ઓસ્ટ્રેલિયા
ઓસ્ટ્રેલિયાના વડાપ્રધાન એન્થોની આલ્બેનીઝે બુધવારે જણાવ્યું હતું કે ઓસ્ટ્રેલિયન સ્ટીલ અને એલ્યુમિનિયમ પર યુએસ ટેરિફ અન્યાયી છે, પરંતુ તેમની સરકાર વળતી ટેરિફ લાદશે નહીં. ટેરિફ અને વેપાર તંગદિલી આર્થિક નુકસાનનું એક સ્વરૂપ છે. તેનાથી આર્થિક વૃદ્ધિ ધીમી પડે છે અને ફુગાવો વધે છે. આમ આખરે તો ગ્રાહકો જ તેનો ભોગ બને છે, તેથી ઓસ્ટ્રેલિયા અમેરિકા પર વળતી ટેરિફ લાદશે નહીં. અમેરિકાએ બુધવારે સત્તાવાર રીતે સ્ટીલ અને એલ્યુમિનિયમની આયાત પર ટેરિફ વધારીને 25 ટકા કરી હતી.
કેનેડાએ અમેરિકા પર 25% ટેરિફ લાદી
પ્રેસિડન્ટ ટ્રમ્પે સ્ટીલ અને એલ્યુમિનિયમ પ્રોડક્ટ્સ પર ટેરિફનો અમલ કર્યા પછી કેનેડાએ પણ બુધવારે અમેરિકાની 20.8 અબજ ડોલરની પ્રોડક્ટ્સ પર નવી 25 ટકા વળતી ટેરિફની જાહેરાત કરી હતી. કેનેડાના નાણામંત્રી ડોમિનિક લેબ્લેન્કે જણાવ્યું હતું કે વળતા પગલાં યુએસ સ્ટીલ અને એલ્યુમિનિયમ પ્રોડક્ટ્સ ઉપરાંત કમ્પ્યુટર અને રમતગમતના સામાન જેવી કન્ઝ્યુમર પ્રોડક્ટ્સને ટાર્ગેટ કરશે અને તેનો અમલ ગુરુવારથી થશે. કેનેડાના વિદેશ પ્રધાન મેલાની જોલીએ જણાવ્યું હતું કે આપણે આ બકવાસ સામે લડવાની જરૂર છે.
