યુએસ સિટિઝનશિપ એન્ડ ઈમિગ્રેશન સર્વિસ (USCIS)એ અમેરિકામાં ગ્રીન કાર્ડ સહિતના ઇમિગ્રેશન સંબંધિત લાભો માટેની અરજીને મંજૂર કરતા પહેલા અરજદારના સોશિયલ મીડિયા એકાઉન્ટ્સની તપાસ કરવાના નવા નિયમની દરખાસ્ત કરી છે.
USCISના નોટિફિકેશન મુજબ, આ દરખાસ્તની અસર વિવિધ ઈમિગ્રેશન ફોર્મ પર થશે, જેમાં અમેરિકન સિટિઝનશિપ, એસાઈલમ અને ગ્રીન કાર્ડનો સમાવેશ થાય છે. જો કે ઈમિગ્રેશન ફોર્મ ભરવાની પ્રક્રિયામાં ખર્ચ વધવાની શક્યતાને નકારી દેવાઈ હતી. H-1B વર્કર્સે અમેરિકામાં પ્રવેશતી વખતે કે બહાર જતી વખતે I-94 ફોર્મ ભરવાનું હોય છે. આ ફોર્મમાં પ્રવેશની તારીખ, વિઝાના સ્ટેટસ જેવી માહિતી હોય છે. પ્રસ્તાવિત ફોર્મની જોગવાઈ H-1B અરજદારોને લાગુ પડશે નહીં. જો કે USCIS દ્વારા આ કેટગેરીના અરજદારોના સોશિયલ મીડિયા પણ ચકાસવામાં આવશે.
H-1B વિઝા પર લાંબા સમયથી અમેરિકામાં સ્થાયી થયેલા લોકોને ગ્રીન કાર્ડ અપાય ત્યારે ફોર્મ I-485 ભરવાનું હોય છે. આ ફોર્મ ભરતી વખતે સોશિયલ મીડિયાની વિગતો રજૂ કરવી પડશે, જેથી લાંબા ગાળે અમેરિકામાં સ્થાયી થવા માગતા H-1B અરજદારોને આ બાબતની ખાસ તકેદારી રાખવા USCIS દ્વારા તાકિદ કરાઈ છે. USCIS દ્વારા સોશિયલ મીડિયા પોસ્ટની ચકાસણીના માપદંડો અને ડેટા સ્ટોરેજની સમયમર્યાદા જેવી વિગતો અપાઈ નથી. ઓનલાઈન એક્ટિવિટીમાં કઈ બાબતો વિઝા રીજેક્ટ કરાવી શકે છે તે અંગે વિગતો જાહેર થઈ નથી. ટુરિસ્ટ કે બિઝનેસ ટ્રાવેલ વિઝા માટે આ જોગવાઈ લાગુ પડવાની નથી.
