ઓડિશાના ભુવનેશ્વરમાં 18મા પ્રવાસી ભારતીય દિવસ સંમેલનમાં વડાપ્રધાન નરેન્દ્ર મોદીએ ગુરુવાર 9 જાન્યુઆરીએ જણાવ્યું હતું કે તેઓ હંમેશા ડાયસ્પોરાને ભારતીય એમ્બેસેડર માને છે. ઇન્ડિયન ડાયાસ્પોરાના સુરક્ષા અને કલ્યાણ સરકારની સર્વોચ્ચ પ્રાથમિકતા છે. કટોકટીના સમયમાં ડાયાસ્પોરાને મદદને સરકાર તેની જવાબદારી માને છે અને તે સરકારની વિદેશ નીતિનો માર્ગદર્શક સિદ્ધાંત છે. છેલ્લા એક દાયકામાં ભારતના દૂતાવાસો અને કચેરીઓ સંવેદનશીલ અને સક્રિય રહ્યા છે. ત્રણ દિવસીય સંમેલનમાં 50 દેશોમાંથી બિન-નિવાસી ભારતીયો (NRIs) અને ભારતીય મૂળના વ્યક્તિઓ (PIO)એ મોટી સંખ્યામાં હાજરી આપી હતી.
મોદીએ જણાવ્યું હતું કે અગાઉ ઘણા દેશોમાં લોકોને કોન્સ્યુલર સુવિધાઓ મેળવવા માટે લાંબા અંતરની મુસાફરી કરવી પડતી હતી અને મદદ માટે દિવસો સુધી રાહ જોવી પડતી હતી. હવે આ સમસ્યાઓ હલ કરવામાં આવી રહી છે. છેલ્લા બે વર્ષમાં 14 એમ્બેસી અને કોન્સ્યુલેટ ખોલવામાં આવ્યા છે. OCI કાર્ડનો વ્યાપ પણ વિસ્તૃત કરવામાં આવી રહ્યો છે.
1947માં ભારતની આઝાદીમાં ડાયસ્પોરાએ મુખ્ય ભૂમિકા ભજવી હોવાનો ઉલ્લેખ કરીને મોદીએ 2047 સુધીમાં ભારતને વિકસિત દેશ બનાવવા માટે ડાયાસ્પોરાની મદદ માંગી હતી. તેમણે કહ્યું હતું કે ભારત માત્ર યુવા દેશ નથી પરંતુ કુશળ યુવાનોનો દેશ પણ છે. સરકાર એ સુનિશ્ચિત કરવાનો પ્રયાસ કરી રહી છે કે જ્યારે પણ ભારતીય યુવાનો વિદેશમાં જાય, ત્યારે તેઓ કૌશલ્ય સાથે જાય. વિશ્વની કુશળ પ્રતિમાની માગને પૂર્ણ કરવાની ભારતમાં ક્ષમતા છે.
તમે ‘મેડ ઇન ઇન્ડિયા’ પ્લેનમાં ભારત આવો તે દિવસો દૂર નથી
21મી સદીમાં ભારત ઝડપી પ્રગતિ કરી રહ્યું હોવાનો ઉલ્લેખ કરીને વડાપ્રધાને જણાવ્યું હતું કે દેશમાં જે વ્યાપ પર વિકાસનું કામ થઈ રહ્યું છે તે અભૂતપૂર્વ છે. આજે ભારતમાં ફાઈટર જેટ અને ટ્રાન્સપોર્ટ એરક્રાફ્ટ બની રહ્યા છે. તે દિવસ બહુ દૂર નથી જ્યારે તમે બધા પ્રવાસી ભારતીય દિવસમાં હાજરી આપવા માટે ‘મેડ ઇન ઇન્ડિયા’ પ્લેનમાં આવશો.
મોદીએ ડાયસ્પોરાને અનુરોધ કર્યો હતો કે તેઓ જ્યાં રહે છે ત્યાં ભારતના સાચા ઇતિહાસનો પ્રચાર કરે અને લોકોને દેશની મુલાકાત લેવા પ્રોત્સાહિત કરે.તેમણે નોંધ્યું હતું કે આ દેશોમાં વર્તમાન પેઢી ભારતની સમૃદ્ધિ, ગુલાબીના લાંબો સમયગાળો અને સંઘર્ષો વિશે કદાચ જાણતી નથી.ભારતમાં ઉત્સાહપૂર્ણ તહેવારો અને મેળાવડાનો આ સમય છે. થોડા જ દિવસોમાં પ્રયાગરાજમાં ‘મહાકુંભ’ શરૂ થશે અને તમારે બધાએ તેની મુલાકાત લેવી જ જોઈએ. સર્વત્ર આનંદનું વાતાવરણ છે. 1915માં આજના દિવસે મહાત્મા ગાંધી વિદેશમાં લાંબા સમય સુધી રોકાણ કર્યા બાદ ભારત પાછા ફર્યા હતાં. આવા અદભૂત સમયે ભારતમાં તમારી હાજરી ઉત્સવની ભાવનામાં વધારો કરી રહી છે.
ભારતને હવે વિશ્વ બંધુ તરીકે ઓળખવામાં આવતો હોવાનો ઉલ્લેખ કરીને વડા પ્રધાને આ વૈશ્વિક જોડાણને મજબૂત કરવા ડાયસ્પોરાને અનુરોધ કર્યો હતો. ડાયસ્પોરા પોતપોતાના દેશોમાં સ્થાનિક રહેવાસીઓ માટે એવોર્ડ ફંક્શનનું આયોજન કરવું જોઇએ. આ પુરસ્કારો સાહિત્ય, કલા-હસ્તકલા, ફિલ્મ અને થિયેટર જેવા વિવિધ ક્ષેત્રોમાં અગ્રણી વ્યક્તિઓને આપવામાં આવી શકે છે. ભારતીય દૂતાવાસ અને કોન્સ્યુલેટ તેમને સમર્થન આપશે. તેનાથી સ્થાનિક લોકો સાથે વ્યક્તિગત જોડાણો અને ભાવનાત્મક બંધન મજબૂત બનશે.
વડાપ્રધાન અનુરોધ કર્યો હતો કે “મેડ ઈન ઈન્ડિયા’ ફૂડ પેકેટ્સ, કપડાં અને અન્ય વસ્તુઓ, ખરીદો અને તમારા રસોડામાં અને ડ્રોઈંગ રૂમમાં તેનો સમાવેશ કરો. આ વિકસિત ભારતના નિર્માણમાં તમારુ નોંધપાત્ર યોગદાન હશે
