ઘરેલુ દુર્વ્યવહાર અને હાનિકારક પ્રથાઓથી પ્રભાવિત શ્યામ, લઘુમતી અને વંશીય (BME) મહિલાઓને છેલ્લા 45 વર્શથી મહત્વપૂર્ણ સહાય પૂરી પાડતી નોર્થ વેસ્ટ લંડનના હર્લસ્ડેન ખાતે આવેલ એશિયન વિમેન્સ રીસોર્સ સેન્ટર (AWRC)ની 45મી વર્ષગાંઠ નિમિત્તે મહારાણી કેમિલાએ સેન્ટરની મુલાકાત લીધી હતી.
આ પ્રસંગે રાણીએ AWRC ના સમર્પિત સ્ટાફ સભ્યો, સ્વયંસેવકો અને પ્રેરણાદાયી લોકો સાથે મુલાકાત કરી, પ્રતિકૂળતાનો સામનો કરતી વખતે સ્થિતિસ્થાપકતા અને હિંમતની તેમની શક્તિશાળી અને ગતિશીલ વાર્તાઓ ધ્યાનપૂર્વક સાંભળી હતી.
મહારાણીએ AWRCના નવા વિકસિત કરાયેલા હીલિંગ ગાર્ડનનું પણ સત્તાવાર રીતે ઉદ્ઘાટન કર્યું હતું. હીલિંગ ગાર્ડન મહિલાઓ અને બાળકો માટે શાંત આશ્રય તરીકે સેવા આપવા માટે રચાયેલ છે અને તે ઘરેલુ હિંસાના આઘાતનો અનુભવ કરનાર મહિલાઓને હીલિંગ અને જીવનનું પુનઃનિર્માણ કરવા સલામત જગ્યા આપે છે.
AWRC ના ડિરેક્ટર સરબજીત ગેંગરે કહ્યું હતું કે “આ મુલાકાત AWRC માટે એક મહત્વપૂર્ણ પ્રસંગ છે, અને ઘરેલુ હિંસાથી પ્રભાવિત BME મહિલાઓ દ્વારા સામનો કરવામાં આવતા પડકારોની ઊંડી ઓળખ છે. AWRC ના કાર્યને ટકાવી રાખવા અને સહાય પૂરી પાડવા માટે અમને દાન અને સતત જાગૃતિની તાત્કાલિક જરૂર છે.”
રાણીની મુલાકાતે તમામ સમુદાયોમાં ઘરેલુ દુર્વ્યવહારના તાત્કાલિક મુદ્દા પર પ્રકાશ પાડી સમર્થન, સશક્તિકરણ અને પરિવર્તન પર વ્યાપક સંવાદને પ્રોત્સાહન આપ્યું હતું. AWRC એ 1970 ના દાયકાના અંતથી લંડનમાં રહેતી BME મહિલાઓ માટે લાઇફલાઇન તરીકે સેવા આપી છે.
AWRC ની સેવાઓમાં પ્રોફેશનલ માર્ગદર્શન, સલાહ અને માહિતી અને મહિલાઓને સુરક્ષિત રહેઠાણ મેળવવામાં મદદ કરવા માટે ટેકો, અનુવાદ, કાઉન્સેલિંગ અને કાનૂની સલાહ આપે છે.
