બનાસકાંઠા જિલ્લાની વાવ વિધાનસભાની બુધવાર, 13 નવેમ્બરે યોજાયેલી પેટા ચૂંટણીમાં જંગી 74 ટકા મતદાન થયું હતું. આ બેઠક પર ભાજપના ઉમેદવાર સ્વરૂપજી ઠાકોર, કોંગ્રેસના ગુલાબસિંહ રાજપૂત અને ભાજપના બળવાખોર નેતા માવજી પટેલ વચ્ચે ત્રિપાંખીયો જંગ છે.
બનાસ બેંકના ડિરેક્ટર અને ચૌધરી સમાજના આગેવાન માવજીભાઈ પટેલ ભાજપના સત્તાવાર ઉમેદવાર સ્વરૂપજી ઠાકોર સામે ચૂંટણી લડી રહ્યાં હોવાથી ભાજપે તેમને પક્ષમાંથી સસ્પેન્ડ કર્યા હતા. આ પેટાચૂંટણીનું પરિમાણ 23 નવેમ્બરે જાહેર થશે. વાવ બેઠકમાં ઠાકોર સમાજના અંદાજે 83,000 મતદારો, 50,000 ચૌધરી સમુદાયના, 43,000 દલિત, 25,000 માલધારી (ઓબીસી) અને 18,000 બ્રાહ્મણ મતદારો છે.
અન્ય સાત ઉમેદવારો પણ મેદાનમાં છે, જેમાં છ અપક્ષ અને એક ભારતીય જન પરિષદના ઉમેદવાર ચૂંટણી લડી રહ્યાં છે. જૂનમાં બનાસકાંઠામાંથી લોકસભામાં ચૂંટાયેલા કોંગ્રેસના ધારાસભ્ય ગેનીબેન ઠાકોરના રાજીનામા બાદ વાવ વિધાનસભા બેઠક પર પેટાચૂંટણી યોજાઈ રહી છે.
વિધાનસભા બેઠક પર 3.1 લાખ લાયક મતદારો છે, જેમાં 1.61 લાખ પુરૂષો અને 1.49 લાખ મહિલાઓનો સમાવેશ થાય છે.2022ની વિધાનસભાની ચૂંટણીમાં, ભાજપના સ્વરૂપજી ઠાકોર કોંગ્રેસના ગઢ ગણાતી વાવ બેઠક પરથી વિપક્ષી પાર્ટીના ઉમેદવાર ગેનીબેન ઠાકોર સામે હારી ગયા હતા.
માવજીભાઈ પટેલ ઉપરાંત ભાજપે બનાસકાંઠાના અન્ય ચાર નેતાઓને પણ સસ્પેન્ડ કર્યા હતા. તેમાં લાલજીભાઈ ચૌધરી, દેવજીભાઈ પટેલ, દલરામભાઈ પટેલ અને જામાભાઈ પટેલનો સમાવેશ થાય છે. કોંગ્રેસના ધારાસભ્ય ગેનીબેન ઠાકોર લોકસભામાં ચૂંટાયા બાદ 13 નવેમ્બરે પેટાચૂંટણી જરૂરી બની હતી.
અહીં ઉલ્લેખનીય છે કે માવજી પટેલે થોડા દિવસ પહેલાં ચૂંટણી પ્રચારમાં ભાજપ અને ગુજરાત ભાજપ પ્રમુખ સીઆર પાટીલ સામે પ્રહાર કરતાં પાટીલનો પાવર ઉતારવાનો હુંકાર કર્યો હતો. બનાસકાંઠામાં વાવ વિધાનરસભાની ચૂંટણીમાં ભાજપે અંતિમ ઘડીએ સ્વરૂપજી ઠોકોરને મેન્ડેટ આપી ઉમેદવાર તરીકે ઉભા રાખ્યા હતાં. પરંતુ, ભાજપના કાર્યકર માવજી પટેલને ભાજપ તરફથી ચૂંટણી લડવાની આશા પૂરી ન થતાં તેઓએ પાર્ટી સામે બળવો કરી પોતાની અપક્ષ ઉમેદવારી નોંધાવી હતી
આ તરફ વાવ વિધાનસભા બેઠક રાજકીય પક્ષો માટે વટનો સવાલ બની ગઇ છે અને તેને કબ્જે કરવા માટે ભાજપ, કોંગ્રેસ સહિત અપક્ષો પણ એટી ચોટીનુ જોર લગાવી રહ્યા છે. જેમા મતદારોને રિઝવવા હવે એક પછી એક જ્ઞાતિ અને જાતિ આધારિત સંમેલનો યોજાઇ રહ્યા છે. વાવમાં કોંગ્રેસના ઠાકોર અને દલિત સમાજના સંમેલન બાદ આજે માલધારી સમાજનુ વિશાળ સંમેલન મળ્યુ. જેમા કોંગ્રેસના સાંસદ ગેનીબેન ઠાકોર, વિપક્ષના નેતા અમિત ચાવડા સહિત પૂર્વ સાંસદ, ધારાસભ્યો અને કોંગ્રેસના કાર્યકરો ઉપસ્થિત રહ્યાં હતાં.
ગુજરાતના મુખ્ય પ્રધાન ભૂપેન્દ્ર પટેલ, પ્રદેશ ભાજપના વડા અને કેન્દ્રીય પ્રધાન સીઆર પાટીલ અને ગુજરાત કોંગ્રેસના પ્રભારી મુકુલ વાસનિક સહિત કોંગ્રેસ અને ભાજપના કેટલાક મુખ્ય નેતાઓએ છેલ્લા એક સપ્તાહમાં વાવમાં રેલીઓને સંબોધી હતી.
