દુબઈ ઈન્ટરનેશનલ ક્રિકેટ સ્ટેડિયમમાં ગુરુવાર, 20 ફેબ્રુઆરીએ બાંગ્લાદેશને હરાવીને ભારતીય ટીમ ચેમ્પિયન ટ્રોફી 2025માં વિજયી પ્રારંભ કર્યો હતો. આ ટુર્નામેન્ટની ગ્રુપ Aની આ મેચમાં પહેલા બેટિંગ કરતાં બાંગ્લાદેશે 228 રન બનાવ્યા હતાં. શુભમન ગિલની સદીની મદદથી ટીમ ઈન્ડિયાએ 47મી ઓવરમાં આ ટાર્ગેટ હાંસલ કરીને મેચ જીતી લીધી હતી.
ભારતીય ટીમનો આગામી મુકાબલો પાકિસ્તાન સામે છે. ચેમ્પિયન્સ ટ્રોફીની આ મેચ 23 ફેબ્રુઆરીએ રમાશે. પાકિસ્તાન આ ટુર્નામેન્ટનું યજમાન છે. જોકે ભારતે પાકિસ્તાન જવાનો ઇનકાર કર્યો હતો. તેથી ભારત-પાકિસ્તાન મુબઈ દુબઈમાં રમાશે.
બાંગ્લાદેશે ટોસ જીતીને પ્રથમ બેટિંગનો નિર્ણય કર્યો હતો અને 49.4 ઓવરમાં 228 રન બનાવીને ઓલઆઉટ થઇ ગઇ હતી. બાંગ્લાદેશ તરફથી તન્ઝીદ હસને 118 બોલમાં 100 રન બનાવીને અને જાકીર અલીએ 114 બોલમાં 68 રન બનાવીને બાંગ્લાદેશને 228 રનના સ્કોર સુધી પહોંચાડવામાં મહત્ત્વની ભૂમિકા ભજવી હતી. બાંગ્લાદેશના બાકીના બેટર નિષ્ફળ રહ્યાં હતાં.
ભારતના સ્ટાર બોલર મોહમ્મદ શમીએ ઘાતક બોલિંગ કરીને 10 ઓવરમાં માત્ર 53 રન આપીને પાંચ વિકેટ ઝડપી હતી. આમ ભારતને મળેલી ભવ્ય જીત પાછળ શમીએ મહત્ત્વની ભૂમિકા ભજવી હતી. શમી સિવાય હર્ષિત રાણાએ 7.4 ઓવરમાં 31 રન આપીને 3 વિકેટ જ્યારે અક્ષર પટેલે 9 ઓવરમાં 43 રન આપીને 2 વિકેટ ઝડપીને ભારતની જીતમાં યોગદાન આપ્યું હતું.
બાંગ્લાદેશે આપેલા 229 રનનો ટાર્ગેટને ચેઝ કરતી વખતે ભારતીય ટીમે 46.3 ઓવરમાં 4 વિકેટના નુકસાન પર 231 રન બનાવીને ભવ્ય જીત મેળવી હતી. મેચમાં ભારત તરફથી શુભમન ગિલે 129 બોલમાં 101 રન બનાવ્યા હતાં. ગિલ સિવાય રોહિત શર્માએ 36 બોલમાં 41 રન અને કે.એલ. રાહુલે 47 બોલમાં 41 રન ફટકારીને ભારતને જીત આપવવામાં પોતાનો ફાળો આપ્યો હતો.
