ભારતની અગ્રણી સ્નેક અને ફૂડ બ્રાન્ડ હલ્દીરામ સ્નેક્સ ફૂડે સોમવારે IHC (ઇન્ટરનેશનલ હોલ્ડિંગ કંપની) અને આલ્ફા વેવ ગ્લોબલને તેનો હિસ્સો વેચવાની પુષ્ટી આપી હતી. જોકે આ સોદાનું મૂલ્ય જાહેર કરાયું ન હતું. અગાઉ હલ્દીરામે સિંગાપોર સ્થિત ગ્લોબલ ઇન્વેસ્ટમેન્ટ કંપની ટેમાસેકને લઘુમતી હિસ્સો વેચ્યો હતો. આ વ્યૂહારાત્મક હિલચાલથી હલ્દીરામની નાણાકીય સ્થિતિ વધુ મજબૂત બનશે.
ઉદ્યોગના સૂત્રોના જણાવ્યા અનુસાર, IHC અને આલ્ફા વેવે હલ્દીરામ સ્નેક્સ ફૂડમાં લગભગ 6 ટકા હિસ્સો ખરીદી રહ્યાં છે. આ સોદામાં કંપનીનું વેલ્યુએશન 10 બિલિયન ડોલર (લગભગ રૂ. 85,000 કરોડ) આંકવામાં આવ્યું છે. આ વેલ્યુએશન ભારતના પેક્ડ ફૂડ ઉદ્યોગ માટે સૌથી ઊંચું છે.
આલ્ફા વેવ એક વૈશ્વિક રોકાણ કંપની છે જે ત્રણ મુખ્ય ક્ષેત્રો – ખાનગી ઇક્વિટી, ખાનગી ક્રેડિટ અને જાહેર બજારો પર ધ્યાન કેન્દ્રિત કરે છે જ્યારે UAE સ્થિત IHC વિશ્વની સૌથી મોટી રોકાણ કંપનીઓમાંની એક છે.
હલ્દીરામ સ્નેક્સ ફૂડના પ્રમોટર અગ્રવાલ પરિવાર કંપનીમાં વધુ હિસ્સો વેચવા માટે બીજા રોકાણકારને પણ લાવે તેવી શક્યતા છે. કંપની નાણાકીય વર્ષ 2023-24માં રૂ.12,500 કરોડથી વધુની આવક નોંધાવી હતી.
બ્લેકસ્ટોન, આલ્ફા વેવ ગ્લોબલ અને બેઈન કેપિટલની આગેવાની હેઠળના કન્સોર્ટિયમ સહિત અનેક પીઈ કંપનીઓ
હલ્દીરામ સ્નેક્સ ફૂડમાં હિસ્સો ખરીદવાની રેસમાં હતી. ભારતના તેજીમાં રહેલા શેરબજારનો લાભ લેવા માટે અગ્રવાલ પરિવાર આવતા વર્ષે IPO (પ્રારંભિક જાહેર ઓફર)નો માર્ગ પણ પસંદ કરી શકે છે.
અગાઉ પ્રમોટર્સે મોટા હિસ્સાનું વેચાણ કરવાની યોજના બનાવી હતી, પરંતુ તેમણે ફક્ત લઘુમતી હિસ્સો વેચવાનો નિર્ણય લીધો છે.આ રોકડ ભંડોળ હલ્દીરામ સ્નેક્સ ફૂડને તેની વિસ્તરણ યોજનાઓને ભંડોળ પૂરું પાડવામાં અને સ્થાનિક તેમજ કેટલાક વિદેશી બજારોમાં તેની સફરને ઝડપી બનાવવામાં મદદ કરશે.
૧૯૩૭માં ગંગા ભીષણ અગ્રવાલ દ્વારા રાજસ્થાનના બિકાનેરમાં મીઠાઈ અને નમકીનની દુકાન તરીકે સ્થાપિત કરેલી હલ્દીરામની પ્રોડક્ટ્સ હવે વિશ્વના ૮૦થી વધુ દેશોમાં વેચાય છે.
