અમેરિકાની જ્યોર્જટાઉન યુનિવર્સિટીમાં અભ્યાસ કરતા એક ભારતીય સંશોધકની ઇમિગ્રેશન અધિકારીઓએ સોમવારે ધરપકડ કરી હતી અને દેશનિકાલનો સામનો કરી રહ્યો છે. પોસ્ટ-ડોક્ટરલ ફેલો બદર ખાન સુરીની સોમવારે રાત્રે વર્જિનિયામાં તેમના ઘરની બહાર “નકાબપોશ એજન્ટો”એ ધરપકડ કરી હતી.
એજન્ટોએ પોતાને હોમલેન્ડ સિક્યુરિટી વિભાગ સાથે જોડાયેલા હોવાનું જણાવ્યું હતું અને તેમને કહ્યું હતું કે સરકારે તેમના વિઝા રદ કરી દીધા છે. સુરી પર “હમાસનો પ્રચાર ફેલાવવાનો” આરોપ છે. તેમના જાણીતા અથવા શંકાસ્પદ આતંકવાદી સાથે ગાઢ સંબંધો હોવાનું કહેવાય છે.
હોમલેન્ડ સિક્યુરિટી વિભાગના સહાયક સચિવ, ટ્રિશિયા મેકલોફલિને X પર લખ્યું હતું કે સુરી જ્યોર્જટાઉન યુનિવર્સિટીમાં ફોરેન એક્સ્ચેન્જ પ્રોગ્રામ હેઠળનો વિદ્યાર્થી છે અને સોશિયલ મીડિયા પર હમાસનો પ્રચાર અને યહૂદી-વિરોધને સક્રિયપણે પ્રોત્સાહન આપે છે.
જ્યોર્જટાઉનના પ્રવક્તાએ એક નિવેદનમાં જણાવ્યું હતું કે “ડૉ. ખાન સુરી એક ભારતીય નાગરિક છે જેમને ઇરાક અને અફઘાનિસ્તાનમાં શાંતિ નિર્માણ પર ડોક્ટરલ સંશોધન ચાલુ રાખવા માટે યુનાઇટેડ સ્ટેટ્સમાં પ્રવેશવા માટે વિઝા
આપવામાં આવ્યો હતો”
સુરીએ 2020માં નેલ્સન મંડેલા સેન્ટર ફોર પીસ એન્ડ કોન્ફ્લિક્ટ રિઝોલ્યુશન, જામિયા મિલિયા ઇસ્લામિયા, નવી દિલ્હીમાંથી શાંતિ અને સંઘર્ષ અભ્યાસમાં પીએચડીની ડિગ્રી મેળવી હતી.
અગાઉ કોલંબિયા યુનિવર્સિટીમાં શહેરી આયોજનમાં ડોક્ટરલ ડિગ્રી મેળવી રહેલા ૩૭ વર્ષીય ભારતીય વિદ્યાર્થી રંજની શ્રીનિવાસનને ગયા સપ્તાહે સ્ટુડન્ડ વિઝા રદ કરાયા હતા.
