ઓસ્ટ્રેલિયાનો ભૂતપૂર્વ સ્પિનર સ્ટુઅર્ટ મેકગિલ ગયા સપ્તાહે ગુરુવારે કોકેન ડીલના કેસમાં દોષિત જાહેર થયો હતો. કોર્ટ ચુકાદો આપ્યો ત્યારે ઓસ્ટ્રેલિયા વતી 44 ટેસ્ટ મેચ રમી ચૂકેલા મેકગિલના ચહેરા પર કોઇપણ પ્રકારના હાવભાવ જોવા મળ્યા નહોતા. મેકગિલની સજાનો નિર્ણય આઠ સપ્તાહ પછી લેવાશે.
સિડની ડિસ્ટ્રિક્ટ કોર્ટની જ્યુરીએ 54 વર્ષીય ભૂતપૂર્વ લેગ સ્પિનરને એપ્રિલ 2021માં 330,000 ઓસ્ટ્રેલિયન ડોલરના એક કિલો કોકેઈનના સોદામાં તેની સંડોવણી બદલ દોષિત ગણાવ્યો હતો.
કોર્ટમાં થયેલી દલીલ અનુસાર, મેકગિલે સિડનીમાં તેની રેસ્ટોરન્ટમાં જ પોતાના નિયમિત ડ્રગ ડીલર સાથે તેના નજીકના સંબંધી મારિનો સોટીરોપોલોસનો પરિચય કરાવ્યો હતો. જો કે, મેકગિલ આ આરોપોને ફગાવતો આવ્યો હતો. તેને જણાવ્યું હતું કે, આ સોદાની મને કોઈ જાણકારી નથી. પરંતુ ફરિયાદીઓએ દાવો કર્યો હતો કે તેની સંડોવણી વિના આ સોદો શક્ય જ ન હોત.
સ્ટુઅર્ટ મેકગિલ 44 ટેસ્ટ મેચો (1998-2008)માં ઓસ્ટ્રેલિયાનું પ્રતિનિધિત્વ કર્યું હતું. આ દરમિયાન તેણે 208 વિકેટ ઝડપી હતી. ઇનિંગ્સમાં તેની શ્રેષ્ઠ બોલિંગ 8/108 હતી.
