વર્લ્ડ હેપ્પીનેસ રીપોર્ટ તાજેતરમાં જાહેર થયો છે. જેમાં વર્તમાન વર્ષના વિશ્વના સૌથી 10 ખુશહાલ દેશોની યાદી પણ છે. દર 20 માર્ચે વર્લ્ડ હેપ્પીનેસ ડેની ઉજવણી કરવામાં આવે છે, ત્યારે વિશ્વના સૌથી ખુશહાલ દેશોની યાદી પણ જાહેર કરાઇ છે. સૌથી ખુશહાલ દેશોની યાદીમાં સતત આઠમા વર્ષે ફિનલેન્ડ પ્રથમ સ્થાને છે.
ત્યાર પછીના અન્ય દેશોમાં ડેનમાર્ક, આઇસલેન્ડ, નોર્વે અને સ્વીડન પણ છે. પરંતુ વિશ્વનો સૌથી ધનિક અને સૌથી શક્તિશાળી દેશ અમેરિકા પણ આ યાદીમાં સ્થાન મેળવી શક્યો નથી. જ્યારે ભારતને પણ આ યાદીમાં સ્થાન મળ્યું નથી. ગેલપના મેનેજિંગ ડિરેક્ટર ઇલાના રોન-લેવે જણાવ્યું હતું કે નોર્ડિક દેશોનું આ યાદીમાં ટોચ પર હોવું આશ્ચર્યજનક નથી કેમ કે જે દેશો તેમના રહેવાસીઓને સુવિધાઓ પૂરી પાડવામાં સફળ રહ્યા છે ત્યાં સ્થિરતા જોવા મળી છે.
રીપોર્ટ મુજબ ફિનલેન્ડમાં અન્ય લોકો પર વિશ્વાસ, ભવિષ્ય માટે આશાવાદ, સંસ્થાઓમાં વિશ્વાસ અને મિત્રો અને પરિવારનો ટેકો શામેલ છે. ફિનલેન્ડમાં, પોતાના જીવન વિશે સારું અનુભવવા અંગે સર્વસંમતિ વધુ છે. વર્લ્ડ હેપ્પીનેસ રિપોર્ટ 2022-2024 દરમિયાન સરેરાશ સ્વ-મૂલ્યાંકન અને ગેલપ વર્લ્ડ પોલમાં કેન્ટ્રીલ લેડર પ્રશ્નના જવાબો અનુસાર દેશોને રેન્કિંગ અપાયું છે.
