દેશ-વિદેશમાં વસતા ભારતીયો દિવાળીના તહેવારની ધામધૂમપૂર્વક ઊજવણી કરે છે. બોલીવૂડમાં પણ દરેક તહેરવારની માન-સન્માન સાથે ભવ્ય રીતે ઉજવણી કરવામાં આવે છે. મુંબઇમાં અનેક ફિલ્મકારો દ્વારા દિવાળી નિમિત્તે પાર્ટીનું આયોજન થાય છે. બોલીવૂડમાં પણ બિન હિન્દુ કલાકારો દ્વારા પણ ઇદની જેમ દિવાળીની ઉત્સાહથી ઉજવણી કરવામાં આવે છે. તાજેતરમાં ટીવી સીરિયલ અને ફિલ્મ નિર્માત્રી એકતા કપૂરે દિવાળી પાર્ટીનું આયોજન કર્યું હતું. જેમાં સોનાક્ષી સિંહા અને તેના મુસ્લિમ પતિ ઝહીર ઇકબાલ, નુશરત ભરુચા, હીના ખાન સહિત કલાકારો ઉપસ્થિત રહ્યા હતા. આ ઉપરાંત રિતિક રોશનની ભૂતપૂર્વ પત્ની સુઝાન ખાન પણ તેના બોયફ્રેન્ડ સાથે હાજર રહી હતી તેવી કહેવાય છે. અહીં એવા કેટલાક કલાકારો વિશે જણાવવામાં આવ્યું છે જેઓ હિન્દુઓના આ મહાપર્વને ખૂબ જ સુંદર રીતે ઊજવે છે.
શાહરૂખ ખાન
આ કલાકારોમાં શાહરૂખ ખાનનું નામ પ્રથમ સ્થાને છે. તે પોતાના ધર્મના તહેવારોની સાથેસાથે હિન્દુ ધર્મના તહેવારો પણ એટલી જ આસ્થાથી ઊજવણી કરે છે. તે દર વર્ષે પોતાના મન્નત બંગલામાં દિવાળી અગાઉ પાર્ટીનું આયોજન કરે છે. જેમાં બોલીવૂડના મોટાભાગના ફિલ્મકારો ઉપસ્થિત રહે છે. દિવાળીની સાથેસાથે શાહરૂખ ગણેશ ચતુર્થી પણ ધૂમધામથી ઊજવે છે. શાહરૂખની પત્ની ગૌરી હિન્દુ હોવાથી શાહરૂખ પોતાના ધર્મની સાથેસાથે પત્ની ગૌરીના ધર્મનું પણ એટલું જ સમ્માન કરે છે.
આમિર ખાન
બોલીવૂડના મિસ્ટર પરફેકનિસ્ટ આમિર ખાન પણ દિવાળીનો તહેવાર ખુશી સાથે ઊજવે છે. જોકે, તેના પર ભૂતકાળમાં મોટાભાગે દેશ વિરોધી અને ધર્મ વિરોધી નિવેદનો આપવાના આરોપ પણ લાગ્યા છે. આમ છતાં તે દર વર્ષે પોતાના ઘરે દિવાળીની પાર્ટીનું આયોજન કરે છે. તેની દિવાળી પાર્ટીમાં બોલીવૂડના સિતારોઓનો મેળાવડો જામે છે.
સલમાન ખાન
સલમાન ખાન એક એવું નામ છે જે બોલીવૂડમાં દરેક ધર્મનું સમ્માન કરવા માટે જાણીતો છે. ઇદ હોય કે ગણેશ ઉત્સવ સલમાન અને તેનો પરિવાર દરેક તહેવારને ધૂમધામથી ઊજવણી કરે છે. તે દર દિવાળીએ પોતાના ઘર ગેલેક્સી એપાર્ટમેન્ટમાં રોશની કરે છે. તેના પરિવાર દ્વારા મિત્રો માટે ડિનર પાર્ટીનું આયોજન કરવામાં આવે છે. આ ઉપરાંત તે બિગ બોસના ઘરમાં પણ ઘણીવાર દિવાળી મનાવતો જોવા મળ્યો છે. આ ઉપરાંત સલમાન દિવાળીમાં તેના ઘર પાસે ફટાકડા ફોડવાની પણ મજા માણે છે.
સૈફ અલી ખાન-કરીના
રાજવી પરિવારના નવાબ સૈફ અલી ખાન અને તેની બહેન સોહા અલી ખાનના ઘરે પણ દિવાળીની ધૂમધામથી ઉજવણી કરવામાં છે. પટોડી પરિવારના સભ્યો દર વર્ષે દિવાળીની પાર્ટીઓમાં જોવા મળે છે. સોશિયલ મીડિયા પર પણ સૈફ-કરીનાનો પુત્ર તૈમૂર ફઇબા સોહાના ઘરે દિવાળી ઊજવતો હોવાની વીડિયો અને તસવીર વાઈરલ થાય છે.
સારા અલી ખાન
સૈફ અલીખાન અને તેની ભૂતપૂર્વ પત્ની અમૃતા સિંઘની દીકરી સારા અલી ખાન પણ ધાર્મિક છે. તે પોતાની માતા અમૃતા સિંઘ સાથે દિવાળીનો તહેવાર ધૂમધામથી ઊજવે છે. બોલીવૂડમાં યોજાતી દિવાળીની પાર્ટીમાં સારા સામેલ થાય છે. સારા કેદારનાથના દર્શને વારંવાર જાય છે. તે આ દિવાળીએ પણ કેદારનાથ મંદિરમાં દર્શન કરવા ગઇ હતી. આ ઉપરાંત તેણે મંદાકિની નદી અને શિખરોના સાનિધ્યમાં મેડિટેશન કર્યું હતું. સારાએ સાધુઓ સાથે સત્સંગ પણ કર્યો હતો. ચહેરો ઢાંકીને તે કેદારનાથની બજારોમાં પણ ગઇ હતી. તેણે દિવાળી નિમિત્તે સહુને ‘જય કેદારનાથ’ પાઠવ્યા હતા.
હીના ખાન
કેન્સર સામે જંગ લડી રહેલી અભિનેત્રી હીના ખાનનું નામ પણ દર વર્ષે પોતાના પરિવાર સાથે દિવાળીની ઉત્સાહથી ઉજવણી કરે છે.
