રાજસ્થાનના જાણીતા હિલ સ્ટેશન માઉન્ટ આબુનું નામ બદલી ‘આબુ રાજ તીર્થ’ રાખવાની માગ વિધાનસભામાં કરવામાં આવી હતી. રાજ્ય સરકારના પ્રધાન ઓટારામ દેવાસીએ આ મુદ્દો ઉઠાવતા આ સ્થળને પવિત્ર તીર્થસ્થાન જાહેર કરવાની અપીલ કરી હતી. આ સાથે જ ત્યાં માંસ અને દારૂના વેચાણ પર પ્રતિબંધ મુકવાની પણ માગણી કરી છે.
પ્રધાને વિધાનસભામાં જણાવ્યું હતું કે, માઉન્ટ આબુ પ્રાચીન કાળથી સનાતન ધર્મની આસ્થાનું કેન્દ્ર રહ્યું છે. તેમણે દલીલ કરી કે અગાઉ આ સ્થળ ‘આબુ રાજ તીર્થ’ તરીકે ઓળખાતું હતું, પરંતુ પાછળથી તેનું નામ બદલીને માઉન્ટ આબુ કરવામાં આવ્યું. અહીં 33 કરોડ દેવ-દેવીતાઓનો વાસ છે, અને તે એક પવિત્ર તીર્થસ્થાન તરીકે પ્રખ્યાત છે. તેથી, આ સ્થળને તેના પ્રાચીન નામથી ઓળખવું જોઈએ. માઉન્ટ આબુ રાજસ્થાનનું એકમાત્ર હિલ સ્ટેશન છે અને દર વર્ષે મોટી સંખ્યામાં પ્રવાસીઓ ત્યાં જાય છે. અહીં ગુરુ શિખર, દેલવાડાના જૈન મંદિર, અર્બુદા માતા મંદિર અને ભગવાન દત્તાત્રેય મંદિર જેવા મહત્વના ધાર્મિક સ્થળો આવેલા છે. પ્રધાને દલીલ કરી હતી કે, આ સ્થળ પર ખુલ્લેઆમ દારૂ અને માંસ વેચાય છે, જે ભક્તોની ધાર્મિક ભાવનાઓને ઠેસ પહોંચાડે છે. તેથી, દારૂ-માંસના વેચાણ પર સંપૂર્ણ પ્રતિબંધ મૂકવો જોઈએ.
