ભારતભરમાં ધૂમ મચાવી રહેલી ફિલ્મ પુષ્પા-2ના પ્રીમિયર દરમિયાન થયેલી નાસભાગમાં એક મહિલા ચાહકના અપમૃત્યુના કેસમાં 14 દિવસની જ્યુડિશિયલ કસ્ટડીમાં મોકલાયેલા ફિલ્મના અભિનેતા અલ્લુ અર્જુનને તેલંગાણા હાઈકોર્ટે શુક્રવારે વચગાળાના જામીન આપ્યાં હતાં. પુષ્પા-2ની રિલીઝ અગાઉ હૈદરાબાદના સંધ્યા થિયેટરમાં યોજાયેલાં પ્રીમિયર દરમિયાન એક મહિલા ચાહકના થયેલાં મોતના કેસમાં ફિલ્મના અભિનેતા અલ્લુ અર્જુન સહિત કેટલાંક લોકો વિરુદ્ધ કેસ કરાયો હતો.
આ કેસમાં પોલીસે શુક્રવારે સવારે અલ્લુ અર્જુનની ધરપકડ કરી હતી અને 14 દિવસની કસ્ટડીમાં ધકેલ્યો હતો. જોકે અભિનેતાએ પોતાની ધરપકડ વિરુદ્ધ હાઈકોર્ટનું શરણ લેતાં હાઈકોર્ટે રૂ. 50,000ના બોન્ડ સાથે ચાર સપ્તાહના વચગાળાના જામીન મંજૂર કર્યા હતાં. અલ્લુ અર્જુનને જામીન મળતાં જ અભિનેતાના અસંખ્ય ચાહકોએ ખુશીની લાગણી વ્યક્ત કરી હતી. ઉલ્લેખનીય છે કે 4 ડિસેમ્બરે ફિલ્મના સ્ક્રીનિંગ દરમિયાન થિયેટરમાં નાસભાગ મચી ગઈ હતી, જેમાં 35 વર્ષની એક મહિલાનું મોત થયું હતું અને અનેક લોકો ઘાયલ થયા હતાં. અલ્લુ અર્જુનને જામીન આપતાં તેલંગાણા હાઈકોર્ટે નોંધ્યું હતું કે, વર્તમાન કેસમાં અભિનેતાનો કોઈ બદઈરાદો હોવાનું જણાતું નથી. જોકે અલ્લુ અર્જુને શુક્રવારની રાત ચંચલગુડ જેલમાં જ ગાળવી પડી હતી. જેલ સત્તાવાળાઓના જણાવ્યાં અનુસાર, જામીનનો આદેશ મોડો મળ્યો હતો, અને જેલના મેન્યુઅલ અનુસાર કેદીઓને રાત્રે છોડવામાં આવતા નથી. આથી તેને શનિવારે સવારે જેલમાંથી મુક્ત કરવામાં આવ્યો હતો.
અલ્લુ અર્જુનના વકીલે હાઈકોર્ટ સમક્ષ કરેલી દલીલમાં બોલીવૂડના અભિનેતા શાહરૂખ ખાનનો કેસ ટાંક્યો હતો. તેમણે જણાવ્યું હતું કે, 2017ની સાલમાં પોતાની ફિલ્મ રઈસના પ્રમોશન દરમિયાન વડોદરા રેલવે સ્ટેશન પર અભિનેતા શાહરૂખ ખાનને જોવા એકઠી થયેલી ભીડમાં નાસભાગ થઈ હતી. જેને પગલે શાહરૂખ ખાન સામે પણ કેસ નોંધાયો હતો. શાહરૂખ ખાન તેમાં સામેલ હતાં જ્યારે વર્તમાન કેસમાં અલ્લુ અર્જુન તો બેસીને ફિલ્મ નિહાળી રહ્યાં હતાં.
આ દુર્ઘટનામાં મૃત્યુ પામનાર મહિલના પતિએ જણાવ્યું હતું કે, આ દુર્ઘટના માટે હું અલ્લુ અર્જુનને જવાબદાર નથી માનતો. તેમણે અભિનેતા સામેનો કેસ પાછો ખેંચવાની તૈયારી દર્શાવતાં જણાવ્યું હતું કે, પોલીસે અલ્લુ અર્જુનની ધરપકડ કરી છે તેની મને જાણ નહોતી.
