ગાઝામાંથી હમાસનો સંપૂર્ણપણે સફાયો કરવો જ પડશે તેવા અમેરિકાના વિદેશ પ્રધાન માર્કો રુબિયાના નિવેદનથી ગાઝામાં યુદ્ધવિરામ પર નવું સંકટ ઊભું થયું છે. રૂબિયોઓ ગાઝા પટ્ટીમાં ઇઝરાયેલના યુદ્ધના ઉદ્દેશને સંપૂર્ણ સમર્થન આપ્યું હતું. જો ટૂંકા યુદ્ધવિરામ પછી ફરી યુદ્ધ ચાલુ થશે તો ઇઝરાયેલના બાકીના બંધકોના જીવન પર પણ ખતરો ઊભો થશે.
પશ્ચિમ એશિયાની યાત્રાની શરુઆતમાં રૂબિયોએ જેરુસલેમમાં ઇઝરાયેલના વડાપ્રધાન બેન્જામિન નેતન્યાહૂ સાથે મુલાકાત કરી હતી. પશ્ચિમ એશિયાની આ મુલાકાત દરમિયાન તેઓ પેલેસ્ટિનિયન વસ્તીને ગાઝા પટ્ટીમાંથી બહાર કાઢવા અને યુએસ વડપણ હેઠળ ગાઝાનો પુનઃવિકાસ કરવાની પ્રેસિડન્ટ ડોનાલ્ડ ટ્રમ્પની દરખાસ્ત પર ચર્ચાવિચારણા કરે તેવી શક્યતા છે. આ દરખાસ્તનો આરબ નેતાઓ વિરોધ કરે તેવી શક્યતા છે.
નેતન્યાહુએ ટ્રમ્પની આ દરખાસ્તનું સ્વાગત કરતાં જણાવ્યું હતું કે ગાઝાના ભવિષ્ય માટે તેમની અને ટ્રમ્પની એકસમાન વ્યૂહરચના છે. ટ્રમ્પની જેમ જ તેમણે ચીમકી આપી હતી કે હમાસ 7 ઓક્ટોબર, 2023એ અપહરણ કરાયેલા ઇઝરાયેલના બાકીના બંધકોને મુક્ત નહીં કરે તો હમાસ માટે નરકના દરવાજા ખુલશે.
પ્રથમ તબક્કાનો યુદ્ધવિરામનો અંત આવવાના આશરે બે સપ્તાહ પહેલા તેમણે આ નિવેદન આપ્યું હતું. બીજા તબક્કામાં હમાસ વધુ પેલેસ્ટિનિયન કેદીઓના બદલામાં બાકીના ડઝનબંધ બંધકોને મુક્ત કરશે તથા ઇઝરાયેલ તેના લશ્કરી દળોને ગાઝામાંથી પરત બોલાવી લેશે. જોકે આ અંગેની વાટાઘાટો કરવાની હજુ બાકી છે.
રુબિયોએ કહ્યું હતું કે હમાસ લશ્કરી અથવા સરકારી દળ તરીકે યથાવત રહી શકશે નહીં. હમાસને નેસ્તનાબૂદ કરવું જ પડશે. રુબિયાના આવા આકરા નિવેદનથી હમાસ સાથે મંત્રણા ચાલુ રાખવાનું મુશ્કેલ બની શકે છે. યુદ્ધમાં ભારે નુકસાન સહન કરવા છતાં હમાસ હજુ પણ ગાઝા પર અંકુશ ધરાવે છે.
દરમિયાન ઇઝરાયેલી મિલિયરીએ દક્ષિણ ગાઝામાં રવિવારે વહેલી સવારે હવાઈ હુમલો કર્યો હતો. હમાસ સંચાલિત ગૃહ મંત્રાલયે જણાવ્યું હતું કે ઇજિપ્તની સરહદ પર, રફાહ નજીક થયેલા હુમલામાં ત્રણ પોલીસકર્મીઓના મોત થયા હતાં. આ હુમલો યુદ્ધવિરામનું ગંભીર ઉલ્લંઘન છે અને નેતન્યાહુએ યુદ્ધવિરામ સમજૂતીને તોડવાનો પ્રયાસ કરી રહ્યાં છે.
નેતન્યાહુએ યુદ્ધવિરામના વર્તમાન તબક્કા પછી યુદ્ધ ફરી શરૂ કરવાની તૈયારીનો સંકેત આપ્યો છે અને હમાસને શરણાગતિ સ્વીકારવાની અને તેના ટોચના નેતાઓને દેશનિકાલમાં મોકલવાની તક આપી છે. હમાસે આવી આવી ઓફરને ફગાવી દીધી છે.
