પૂર્વી લદ્દાખમાં વાસ્તવિક અંકુશ રેખા (LAC) પર પેટ્રોલિંગ અને સૈનિકોની પીછેહટ માટેના કરારને પગલે ભારત અને ચીને ડેમચોક અને ડેપસાંગના ઘર્ષણ પોઇન્ટ્સ પરથી એકબીજાના સૈનિકોને પરત બોલાવવાનું ચાલુ કર્યું છે. આ કવાયત 28-29 ઓક્ટોબર સુધી સંપૂર્ણપણે પૂરી થવાની ધારણા છે. જૂન 2020માં ગલવાન ખીણમાં ભીષણ અથડામણ પછી બંને પોઇન્ટ્સ પર બંને દેશોના સૈનિકો આમને-સામને હતાં. પરંતુ હવે ચાર વર્ષથી ચાલી આવતી લશ્કરી મડાગાંઠનો ઉકેલ આવવાની આશા જાગી છે. અગાઉ પાંચ પોઇન્ટ્સ પરથી સૈનિકોને પરત બોલાવાયા હતાં.
આર્મીના સૂત્રોએ જણાવ્યું હતું કે આ બે ઘર્ષણ પોઇન્ટ્સ પરથી બંને દેશોના સૈનિકો પીછેહટ કરે તે પછી તે વિસ્તારોમાં લશ્કરી પેટ્રોલિંગ શરૂ થશે અને બંને પક્ષો પોતપોતાના સૈનિકોને ખસેડશે અને તંબું જેવા અસ્થાયી માળખાને તોડી પાડશે.
આ અંગેના કરારના માળખા પર સૌપ્રથમ રાજદ્વારી સ્તરે સંમતિ આપવામાં આવી હતી અને પછી લશ્કરી સ્તરની વાટાઘાટો થઈ હતી. કોર્પ્સ કમાન્ડર-સ્તરની વાટાઘાટોમાં સમજૂતીના વિવિધ પાસાં અંગે વિચારણા કરાઈ હતી. બંને દેશો વચ્ચેના કરારોનું પાલન કરીને ભારતીય સૈનિકોએ આ વિસ્તારોમાં દૂરના સ્થળોએ ઇક્વિપમેન્ટ લઈ જવાનું ચાલુ કર્યું છે.
જૂન 2020માં ગલવાન ખીણમાં ભીષણ અથડામણને પગલે એશિયાના આ બે દિગ્ગજો વચ્ચેની તંગદિલી ઊભી થઈ હતી. આ પછી બંને દેશોએ સીમા પર મોટી સંખ્યામાં સૈનિકો તૈનાત કર્યાં હતાં.
નોર્થન આર્મી કમાન્ડર લેફ્ટનન્ટ જનરલ એમવી સુચિન્દ્ર કુમારે શુક્રવારે જણાવ્યું હતું કે સૈન્ય અને રાજદ્વારી વાટાઘાટોને કારણે ભારત-ચીન સરહદી વિસ્તારોમાં વાસ્તવિક અંકુશ રેખા (LAC) પર પેટ્રોલિંગ પર સમજૂતી થઈ છે અને તેનાથી સૈનિક પરત બોલાવવાની તથા 2020 પછી ઊભા થયેલા મુદ્દાના નિરાકરણ માટેનો માર્ગ મોકળો થયો છે.
