ઊંચા વ્યાજ દરો અને રૂપિયામાં સ્થિરતાને પગલે ભારતીય બેન્કોમાં બિન-નિવાસી ભારતીયો (NRIs)ની ડિપોઝિટ બમણી થઈ છે. વિવિધ બિન-નિવાસી થાપણ યોજનાઓ હેઠળનો તાજો નાણાપ્રવાહ એપ્રિલ-ઓક્ટોબર 2023માં બમણો થઈને $6.1 બિલિયન થયો હતો, જે ગયા વર્ષના સમાન સમયગાળામાં $3.05 બિલિયન હતો, એમ ભારતીય રિઝર્વ બેંક (RBI)ના તાજેતરના ડેટામાં જણાવ્યું હતું. આમ ભારતમાં સાત મહિનાના ગાળામાં એનઆરઆઈ ડિપોઝિટમાં 6.1 બિલિયન ડોલર જમા થયા હતા. ગયા વર્ષે સમાન ગાળામાં 3.05 બિલિયન ડોલર ઠલવાયા હતા. ફોરેન કરન્સી નોન-રેસિડન્ટ (FCNR) એકાઉન્ટમાં મોટો વધારો થયો છે, જેના કારણે એનઆરઆઈ ડિપોઝિટમાં મોટો નાણાપ્રવાહ આવ્યો હતો.

ગાંધીનગર નજીક આવેલા ગુજરાત ઈન્ટરનેશનલ ફાયનાન્સ ટેક સિટી (ગિફ્ટ સિટી)માં દારુ પીવાની છૂટ આપવામાં આવ્યાં પછી માત્ર પાંચ દિવસમાં જ રૂ. 500 કરોડનો પ્રોપર્ટી સોદા થયા હતા.સરકારે ગિફ્ટ સિટીમાં કાર્યરત કંપનીઓના કાયમી કર્મચારીઓ તથા તેમના માન્ય મુલાકાતીઓને કેટલીક શરતોને આધીન વાઈન એન્ડ ડાઈન ફેસિલિટી આપવાનો નિર્ણય કર્યો છે. સ્થાનિક મીડિયાએ ઈન્ટરનેશનલ ફાઈનાન્સિયલ સર્વિસ ઓથોરિટીના સૂત્રોએ ટાંકીને જણાવ્યું હતું કે, ગિફ્ટ સિટીમાં છેલ્લા 11 વર્ષમાં એક સાથે એટલા સોદા નથી થયા જેટલા છેલ્લા પાંચ દિવસમાં થયા છે.

ભારતે પ્રથમ વખત સંયુક્ત આરબ અમીરાત પાસેથી ક્રૂડ ઓઇલ ખરીદવા માટે રૂપિયાનો ઉપયોગ કર્યો હોવાનું અધિકારીઓએ જણાવ્યું હતું. ભારત હવે ડોલરની એક્સ્ચેન્જમાં થનારા ખર્ચથી બચવા માટે રૂપિયામાં વ્યાપારને પ્રોત્સાહન આપવા માંગે છે. ભારતે જુલાઈમાં યુએઈ સાથે રૂપિયામાં વ્યાપાર કરવા માટેના કરાર પર સહી કરી હતી. આ પછી તરત ઇન્ડિયન ઓઇલ કોર્પોરેશને અબુધાબી નેશનલ ઓઈલ કંપની પાસેથી દસ લાખ બેરલ ક્રૂડ ઓઇલની ખરીદી માટે રૂપિયામાં ચુકવણી કરી હતી. ભારતે રશિયા પાસેથી અમુક જથ્થામાં ક્રૂડ ઓઈલ ખરીદવા માટે પણ રૂપિયાનો ઉપયોગ કર્યો હતો. જો કે, રશિયા સાથે રૂપિયામાં વેપાર અંગેની વાતચીત આગળ વધી નથી.

વાંધાજનક સામગ્રીના સંદર્ભમાં સરકાર લોકોને સોશિયલ મીડિયા પ્લેટફોર્મ સામે ફરિયાદ દાખલ કરવામાં મદદ કરશે. સોશિયલ મીડિયા કંપનીઓ દ્વારા આઇટી નિયમોના ભંગ અંગે લોકો સરકારને જાણકારી આપી શકે તે માટે ઇલેક્ટ્રોનિક્સ એન્ડ ઇન્ફર્મેશન ટેકનોલોજી મંત્રાલય એક પ્લેટફોર્મ બનાવશે. આ પ્લેટફોર્મ હાલની ગ્રીવન્સ એપેલેટ કમિટીથી અલગ થશે, એમ કેન્દ્રીય પ્રધાન રાજીવ ચંદ્રશેખરે શુક્રવારે જણાવ્યું હતું. દિલ્હીમાં સોશિયલ મીડિયા પ્લેટફોર્મના પ્રતિનિધિઓ સાથેની બેઠક બાદ મીડિયા સાથે વાતચીત કરતા મંત્રીએ કહ્યું હતું કે સોશિયલ મીડિયા પ્લેટફોર્મને IT નિયમો અનુસાર તેમની ઉપયોગની શરતોને નિર્ધારિત કરવા માટે સાત દિવસનો સમય આપવામાં આવ્યો છે.

નૂતન વર્ષ 2024માં બોલીવૂડ માટે નવો આશાવાદ

હિન્દી ફિલ્મો માટે ગત વર્ષ ખૂબ જ સફળ થતાં નવા વર્ષ 2024ના પ્રારંભે બોલીવૂડમાં નવી આશા-ઉમંગ-ઉત્સાહ જોવા મળે છે. 2023 બોલીવૂડ માટે ખૂબ ભાગ્યશાળી રહ્યું હતું અને ફિલ્મોએ 11,000 કરોડથી વધુનો બિઝનેસ કર્યો હતો. આ વર્ષે રીલીઝ થનારી ફિલ્મો માટે ફિલ્મકારોમાં 2023ની જેમ મોટી સકારાત્મક અપેક્ષા જોવા મળી રહી છે. ભૂતકાળમાં ખોવાઇ ગયેલા ઘણા કલાકારો નવા વર્ષમાં ફરીથી ફિલ્મી પડદે જોવા મળશે.

ફિલ્મોમાં અભિનયને મહત્ત્વ આપે છે કરીના કપૂર

બોલીવૂડમાં એવું કહેવાય છે કે, કરીના કપૂર ખાન કારકિર્દીની શરૂઆતથી પોતાની શરતો મુજબ કામ કરે છે. એ-ગ્રેડ સ્ટાર સાથે જ ફિલ્મ કરવાથી લઇને સ્ક્રિપ્ટ-ડાયરેક્શનમાં સૂચનો કરવાનું કરીનાને પસંદ છે. કરીનાએ એક ઈન્ટરવ્યૂમાં જણાવ્યું હતું કે, માત્ર સિક્સ પેક એબ્સ બતાવીને સારા એક્ટર બની શકાય નહીં. કરીનાએ આ વાત કરતી વખતે કોઈનું નામ લીધુ ન હતું. પરંતુ સલમાન, શાહરૂખ, ટાઈગર અને જોન અબ્રાહમ જેવા સ્ટાર્સ તરફ ઈશારો થયો હોવાનું લાગતું હતું. કરીના કપૂરે નીપોટિઝમ વિવાદ વખતે હંમેશા બોલીવૂડને સમર્થન આપ્યું છે. રણબીર કપૂરની ફિલ્મ એનિમલ હિટ જતાં કરીનાએ જણાવ્યું હતું કે, બોલીવૂડના કપૂર ફેમિલીને રણબીર તરીકે સારો એક્ટર મળી ચૂક્યો છે.

અમિતાભ બચ્ચનનું સ્પોર્ટસમાં પદાર્પણ

બોલીવૂડના દિગ્ગજ અભિનેતા અમિતાભ બચ્ચને હવે રમત-ગમતના ક્ષેત્રમાં ઝંપલાવ્યું છે. અમિતાભ બચ્ચને તાજેતરમાં ઇન્ડિયન સ્ટ્રીટ પ્રીમિયર લીગ (ISPL) ટેનિસની ટુર્નામેન્ટમાં મુંબઈની ટીમ ખરીદી હોવાની જાહેરાત કરી હતી. આઇએસપીએલ ભારતની સૌ પ્રથમ ટેનિસ બોલ ટી10 ક્રિકેટ લીગ છે જે, આ વર્ષે 2થી 9 માર્ચ દરમિયાન મુંબઈમાં યોજાશે. આ લીગ ભારતમાં પ્રથમવાર સ્ટેડિયમમાં રમાશે. ટુર્નામેન્ટમાં છ ટીમ વચ્ચે 19 મેચ રમાશે. આ લીગમાં હૈદરાબાદ, મુંબઈ, બેંગલોર, ચેન્નાઈ, કોલકાતા અને શ્રીનગરની ટીમોનો સમાવેશ થાય છે. અમિતાભ બચ્ચને તેમના બ્લોગમાં જણાવ્યું હતું કે, આ લીગના ભાગ બનીને તેમણે એક નવો પ્રારંભ કર્યો છે. મારા માટે નવો દિવસ અને નવું સાહસ છે. એક માલિક તરીકે મુંબઈની ટીમ સાથે જોડાવાથી હું રોમાંચ અનુભવી રહ્યો છું.

ઈશા કોપીકર-ટિમી નારંગના છૂટાછેડા થયા

ઈશા કોપીકરે તાજેતરમાં પતિ ટિમી નારંગ સાથે છૂટાછેડા લીધા હોવાનું મીડિયા સૂત્રો જણાવે છે. રેસ્ટોરાં બિઝનેસ સાથે સંકળાયેલા નારંગથી ઈશા અલગ રહેવા જતી રહી છે અને તેની સાથે 9 વર્ષની પુત્રી રિઆના પણ છે. સૂત્રો કહે છે કે, બંને વચ્ચે ઘણા મતભેદ ઊભા થયા હતા અને એકબીજાને સમજવા, અનુકૂળ થવા બંનેએ ખૂબ પ્રયાસ કર્યા હતા. લગ્ન જીવનને બચાવવાના પ્રયાસ સફળ ન રહેતા તેમણે નવેમ્બરમાં છૂટાછેડા લીધા હતા. ઈશા પોતાની પુત્રીને લઈને અલગ રહેવા જતી રહી હતી. ઈશાએ આ અંગે કોઈ જવાબ આપ્યો નથી. ઈશાએ જણાવ્યું હતું કે, આ મુદ્દે કંઈ પણ કહેવું ઘણું વહેલું ગણાશે. ઈશા અને ટીમી નારંગની પ્રથમ મુલાકાત જીમમાં થઈ હતી. ત્રણ વર્ષના ડેટિંગ બાદ તેમણે 2009માં લગ્ન કર્યા હતા. ઈશા કોપિકરે 2002માં કંપની ફિલ્મના ગીત ખલ્લાસથી દેશભરમાં લોકપ્રિયતા મેળવી હતી.