અમેરિકન રિટેલ જાયન્ટ વોલમાર્ટ ચીન પરની નિર્ભરતા ઘટાડવા માટે ભારતમાંથી આયાત વધારી રહી છે. કંપનીએ ખર્ચમાં ઘટાડો કરવા માટે વિવિધ કવાયત કરી છે જેના ભાગરૂપે તે ભારતમાંથી આયાત વધારી રહી છે અને તેની સપ્લાય ચેઈન પણ ડાઈવર્સિફાઈ કરી રહી છે. રોઈટર્સના ડેટા અનુસાર ચાલુ કેલેન્ડર વર્ષમાં જાન્યુઆરીથી ઓગસ્ટ દરમિયાન વોલમાર્ટે તેની 25 ટકા આયાત ભારતમાંથી કરી હતી. 2018માં તેની ભારતમાંથી આયાત માત્ર 2 ટકા હતી. બીજી તરફ ચીનમાંથી વોલમાર્ટની આયાત આ ગાળામાં 60 ટકા રહી હતી, જે 2018માં 80 ટકા હતી.

વિશ્વના જાણીતા ઈન્વેસ્ટર વોરેન બફેટના સાથીદાર ચાર્લી મુંગરનું 99 વર્ષની વયે અવસાન થયું હતું.. મુંગર લાંબા ગાળાના ઈન્વેસ્ટમેન્ટમાં માનતા હતાં અને પોતાના ટાર્ગેટને પાર પાડીને જ રહેતા હતા. મુંગરના અવસાન પર વોરેન બફેટ અને એપલના ટિમ કૂક જેવી હસ્તિઓએ શ્રદ્ધાંજલિ આપી હતી. બર્કશાયરમાં મુંગર વાઈસ ચેરમેનના પદ પર હતા અને તેમના હિસ્સાની વેલ્યૂ લગભગ 2.2 અબજ ડોલર થાય છે. તેમની કુલ નેટવર્થ 2.6 અબજ ડોલર હતી તેવું ફોર્બ્સ મેગેઝિન જણાવે છે. વોરેન બફેટની કંપની બર્કશાયર હેથવેને આગળ લઈ જવામાં બફેટની સાથે સાથે મુંગરનો પણ વિશેષ ફાળો હતો. તેઓ છેલ્લા 60 વર્ષથી વોરેન બફેટની સાથે સંકળાયેલા હતા જેમાં નિષ્ફળ ટેક્સ્ટાઈલ ઉત્પાદક કંપનીને એક મોટા સામ્રાજ્યમાં રૂપાંતરિત કરી દીધી છે.

દુબઈમાં ગુરુવારથી શરૂ થયેલી યુએન ક્લાઇમેટ ચેન્જ કોન્ફરન્સ COP28માં પ્રથમ દિવસે મોટી સફળતા મળી હતી. આ કોન્ફરન્સમાં આબોહવા સંકટનો ભોગ બનેલા વિકાસશીલ અને ગરીબ દેશોને કેવી રીતે વળતર આપવું તે અંગે પ્રારંભિક સમજૂતી થઈ હતી. આ સંમેલનમાં ભાગ લેવા માટે વડાપ્રધાન નરેન્દ્ર મોદી પણ આજે રવાના થયાં હતાં. COP28ના પ્રથમ દિવસે લોસ એન્ડ ડેમેજ ફંડને કાર્યરત બનાવવા અંગેના આ કરારથી આગામી 12 દિવસોમાં કેટલાંક મહત્વાકાંક્ષી નિર્ણયો માટેનો તખતો ગોઠવાયો હતો. ગયા વર્ષે ઇજિપ્તના શર્મ અલ-શેખમાં યોજાયેલી COP27માં સમૃદ્ધ દેશો આ ફંડની સ્થાપના માટે સંમત થયાં હતાં.

આ વર્ષે વર્ષના સૌથી મોંઘા શહેરોની યાદીમાં સિંગાપોર અને ઝ્યુરિક પ્રથમ ક્રમે રહ્યાં છે. આ પછી જીનીવા, ન્યુ યોર્ક અને હોંગકોંગનો ક્રમ આવે છે, એમ ઇકોનોમિસ્ટ ઇન્ટેલિજન્સ યુનિટ (EIU)એ ગુરુવારે જણાવ્યું હતું. સિંગાપોરે પાછલા અગિયાર વર્ષમાં નવમી વખત રેન્કિંગમાં ટોચનું સ્થાન મેળવ્યું છે, કારણ કે વિવિધ શ્રેણીઓમાં કિંમતના ઊંચા સ્તરો છે. રીપોર્ટમાં જણાવાયું હતું કે વૈશ્વિક કોસ્ટ-ઓફ-લીવિંગ કટોકટી હજી સમાપ્ત થઈ નથી. સામાન્ય રીતે ઉપયોગમાં લેવાતી આશરે 200 ચીજવસ્તુઓ અને સેવાઓના ભાવમાં સ્થાનિક ચલણની દ્રષ્ટિએ વાર્ષિક 7.4% નો વધારો થયો છે,

OTT માટે ફિલ્મફેર એવોર્ડઝ જાહેરઃ બોલીવૂડના અનેક કલાકારો પણ સન્માનિત

કોરોનાકાળથી ભારતમાં OTTનું મહત્ત્વ વધ્યું છે. દર્શકોને ફિલ્મોની સામે વેબસીરીઝનો વિકલ્પ મળ્યો છે. બોલીવૂડના ઘણા કલાકારો આ ડિજિટલ પ્લેટફોર્મ તરફ વળ્યા છે. જેમ દર વર્ષે ફિલ્મફેર દ્વારા વિવિધ કેટેગરીમાં ફિલ્મકારોને એવોર્ડ આપવામાં આવે છે તેમ હવે ફિલ્મફેર દ્વારા OTT માટે એવોર્ડઝ આપવાનું શરૂ થયું છે. આ વર્ષે વેબસિરીઝ તથા કલાકારોનું ફિલ્મફેર દ્વારા સન્માન કરવામાં આવ્યું હતું. આલિયા ભટ્ટ, વિજય વર્મા, સુવિન્દર વિકી, રાજશ્રી દેશપાંડે, કરિશ્મા તન્ના, સોનાક્ષી સિંહા, મનોજ બાજપેયી, રાજકુમાર રાવ, શર્મિલા ટાગોર અને સાન્યા મલ્હોત્રા સહિતના જાણીતા કલાકારોને તેમની પ્રતિભા માટે જુદી જુદી કેટેગરીમાં એવોર્ડ આપવામાં આવ્યા છે.

અમિતાભ બચ્ચનની મિલ્કત કેટલી?

અમિતાભ બચ્ચને તાજેતરમાં પોતાનો ‘પ્રતિક્ષા’ બંગલો દીકરી શ્વેતા બચ્ચન નંદાને ભેટમાં આપ્યો ત્યારથી તેઓ વધુ ચર્ચામાં છે. તેમણે થોડા વર્ષો પહેલા ‘કૌન બનેગા કરોડપતિ’ના મંચ પર સંપત્તિની સમાન વહેચણી અંગે જે નિવેદન આપ્યું હતું, તેની પણ ચર્ચા થઇ રહી છે. 1969માં ‘સાત હિન્દુસ્તાની’ ફિલ્મથી પોતાની અભિનય કારકિર્દી શરૂ કરનાર અમિતાભ બચ્ચને છ દાયકાથી પણ વધુ સમય બોલીવૂડમાં પસાર કર્યો છે. દરેક વ્યક્તિ ચોક્કસપણે આ વાત સાથે સંમત થશે કે તેમણે તેમની કારકિર્દીમાં સખત પરિશ્રમ કર્યો છે. દીવાર, શોલે, ડોન, કુલી, જંઝીર, શરાબી, શહેનશાહ વગેરે ફિલ્મો દ્વારા તેમણે ભારતીય દર્શકોના હૃદયમાં સ્થાન મેળવ્યું છે.

ફિલ્મોની સફળતા માટે અક્ષયકુમારનો જુદો જ દૃષ્ટિકોણ

અક્ષયકુમારની તાજેતરમાં રીલીઝ થયેલી ફિલ્મ મિશન રાનીગંજને બોક્સઓફિસ પર સરેરાશ પ્રતિસાદ મળ્યો હતો. આ ફિલ્મ અંગે અક્ષયકુમારે જણાવ્યું હતું કે, બિઝનેસની ચર્ચા કરીએ તો ફિલ્મો પર પ્રેશર થવું જોઈએ નહીં. બિઝનેસના બદલે સ્ટોરી અને કન્ટેન્ટની વાત થવી જોઈએ. અત્યારના સમયમાં રૂ. 100 કરોડનું કલેક્શન સામાન્ય થઈ ગયું છે, તેવી સલમાન ખાને કોમેન્ટ કરી હતી. આ સંદર્ભે વાત કરતાં અક્ષયે દાવો કર્યો હતો કે, હોલિવૂડની જેમ ઈન્ડિયન સિનેમા પણ 2000-3000 કરોડની ફિલ્મ આપવા સક્ષમ છે. જવાન અને ગદર 2ના બોક્સઓફિસ કલેક્શન અંગે વાત કરતાં અગાઉ સલમાન ખાને જણાવ્યુ હતું કે, રૂ.100 કરોડની ક્લબ હવે મોટી વાત નથી.

બિગબોસમાં રાખી સાવંત જોવા મળે તેવી ચર્ચા

ભારતીય ટેલીવિઝનમાં બિગબોસ શો ખૂબ જ ચર્ચાસ્પદ રહ્યો છે. બિગબોસનું ઘર એટલે હાઈ વોલ્ટેજ ડ્રામાનું એપીસેન્ટર. આ સીઝનમાં વિકી જૈન અને અંકિતા લોખંડેનો પતિ-પત્નીનું નાટક તથા મુનાવર અને પ્રિયંકા ચોપરાની લાડલી બહેન મન્નારાના ચેપ્ટરને કારણે સતત ડ્રામા છવાયેલો જ રહે છે. આ સ્થિતિમાં વિવાદાસ્પદ અભિનેત્રી રાખી સાવંત તેમના પતિ આદિલ દુર્રાની સાથે જોવા મળે તેવી ચર્ચા છે. જોકે, આ બાબતે કોઇ સત્તાવાર જાહેરાત કરવામાં આવી નથી. રાખી સાવંત અગાઉ પણ બિગબોસમાં જોવા મળી હતી. બિગ બોસની સીઝન 1, 14 અને 15માં તે જોવા મળી હતી. જ્યારે રાખી ‘બિગ બોસ-14’માં આવી ત્યારે તેણે પોતાના લગ્નના રહસ્ય અંગે હતી. ‘બિગ બોસ 15’માં તે તેના પતિ રિતેશ સાથે શોમાં આવી હતી.