ચીન પરની નિર્ભરતામા ઘટાડો કરવા માટે અમેરિકન આઇફોન ઉત્પાદક કંપની એપલ ભારતમાં તેનું ઉત્પાદન આગામી પાંચ વર્ષમાં પાંચ ગણું વધારીને 40 અબજ ડોલર કરવાની યોજના બનાવી રહી છે. સરકારી અધિકારીએ કહ્યું હતું કે 2022-23માં એપલનું ભારતમાં ઉત્પાદન 7 અબજ ડોલરને પાર થયું હતું. એપલ આગામી 4-5 વર્ષમાં ભારતમાં તેનું ઉત્પાદન વધારીને 40 અબજ ડોલરથી વધારે કરવા માગે છે. એપલ ભારતમાં આઈફોન બનાવે છે અને આગામી વર્ષથી એરપોડનું ઉત્પાદન શરૂ કરવાનું પણ તેનું આયોજન છે. અધિકારીએ કહ્યું હતું કે હાલમાં આઈપેડ કે લેપટોપનું ઉત્પાદન ભારતમાં કરવાનું એપલનું આયોજન નથી.

ટોયોટા મોટરે ભારતમાં ત્રીજો કાર પ્લાન્ટ સ્થાપવાની યોજના બનાવી છે. સુઝુકી મોટર સાથેની તેની ભાગીદારીને કારણે સ્થાનિક સેલ્સ વોલ્યુમમાં વધારો થયો હતો કંપની એક દાયકામાં પ્રથમ વખત ભારતમાં ઉત્પાદન ક્ષમતાનું વિસ્તરણ કરશે. વિશ્વની સૌથી મોટી કાર કંપની વાર્ષિક 80,000-120,000 વાહનોની ક્ષમતા સાથે પ્લાન્ટ શરૂ કરવા માગે છે. આ ક્ષમતા વધારીને વાર્ષિક લગભગ 200,000 સુધી કરાશે. ભારતમાં ટોયોટાની હાલની ઉત્પાદન ક્ષમતા400,000 વાહનોની છે. નવા પ્લાન્ટ પછી ઉત્પાદન ક્ષમતામાં આશરે 30 ટકા વધારો થશે. ટોયોટાએ ભારતીય બજાર માટે નવા સ્પોર્ટ યુટિલિટી વ્હીકલ (SUV)નું ડેવલપમેન્ટ ચાલુ કર્યું છે.

રિઝર્વ બેંક ઓફ ઈન્ડિયાએ 2000 રૂપિયાની નોટ બદલવાની કે બેન્કમાં જમા કરવાની સમયમર્યાદા 7 ઓક્ટોબર સુધી લંબાવી હતી. અગાઉ 2000 રૂપિયાની નોટ બદલવા અથવા જમા કરાવવાની અંતિમ તારીખ 30 સપ્ટેમ્બર હતી. પરંતુ મધ્યસ્થ બેંકે તેને વધુ એક સપ્તાહ માટે લંબાવી હતી. જે લોકો અત્યાર સુધી 2000 રૂપિયાની નોટ બદલી શક્યા નથી તેમના માટે આ મોટી રાહત છે. આરબીઆઈના જણાવ્યા અનુસાર, અત્યાર સુધીમાં 2000 રૂપિયાની 96 ટકા નોટ પરત આવી છે. રિઝર્વ બેન્ક વર્ષ 2018-19માં જ 2000 રૂપિયાની નોટોનું પ્રિન્ટિંગ બંધ કર્યું છે. આરબીઆઈના પરિપત્ર મુજબ જો તમે 7 ઓક્ટોબર, 2023 પછી નોટો બદલી શકતા નથી, તો પણ તમારે ચિંતા કરવાની જરૂર નથી.

દેવાનો બોજ હળવો કરવા અને રોકાણકારોને આકર્ષવા માટે બિલિયોનેર અનિલ અગ્રવાલના વડપણ હેઠળની વેદાંત લિમિટેડે આ ગ્રૂપનું છ અલગ-અલગ લિસ્ટેડ કંપનીઓમાં વિભાજન કરવાની યોજના બનાવી છે. કંપનીના બોર્ડે એસેટ-ઓનર બિઝનેસ મોડલને શુક્રવારે મંજૂરી આપી હતી. આ પુનર્ગઠન કવાયત 12થી 15 મહિનામાં પૂરી થવાની ધારણા છે. સૂચિત યોજનામાં વેદાંત લિમિટેડ ઉપરાંત પાંચ નવી લિસ્ટેડ કંપનીઓ હશે. તેમાં વેદાંત એલ્યુમિનિયમ, વેદાંત ઓઈલ એન્ડ ગેસ, વેદાંત પાવર, વેદાંત સ્ટીલ અને ફેરસ મટિરિયલ્સ અને વેદાંત બેઝ મેટલ્સનો સમાવેશ થાય છે. વેદાંત લિમિટેડના ચેરમેન અનિલ અગ્રવાલે જણાવ્યું હતું કે અમે માનીએ છીએ કે આ ડિમર્જરથી મૂલ્ય બહાર લાવી શકાશે અને દરેક બિઝનેસના ઝડપી વૃ્દ્ધિની સંભાવના ખુલશે.

બોલીવૂડમાં નવોદિતોના જમાનામાં પણ પીઢ કલાકારોનો દબદબો યથાવત

અંગ્રેજીમાં એક કહેવત છે કે ‘ઓલ્ડ ઇઝ ગોલ્ડ’ અને અસલી સોનાનું મૂલ્ય તો ક્યારે ઘટતું નથી. આવી માન્યતા બોલીવૂડમાં પણ છે. અત્યારે ભારતની ફિલ્મી દુનિયામાં ઘણા નવોદિત કલાકારો જોવા મળે છે, જેવા કે જ્હાન્વી કપૂર, અનન્યા પાંડે, કાર્તિક આર્યન, વરુણ ધવન વગેરે પોતાનું સ્થાન મજબૂત કરવા માટે મહેનત કરી રહ્યા છે. તો બીજી તરફ તેમના પણ જુનિયર એવા સુહાના ખાન, શનાયા કપૂર, આર્યન ખાન જેવા અવનવા કલાકારો પણ આ ક્ષેત્રે પદાર્પણ કરવાની તૈયારીમાં છે. આ બધાની વચ્ચે ઘણા જુના-પીઢ કલાકારોનું સ્ટારડમ આજે પણ યથાવત છે. અચાનક ફિલ્મોમાંથી ગાયબ થયા પછી ‘ગદર-2’, ‘પઠાણ’, ‘પોન્નીયિન સેલવાન’1 અને 2, ‘મિસિસ ચેટર્જી વર્સસ નોર્વે’ અને ‘જવાન’ જેવી ફિલ્મોથી તેમણે ફરીથી ધમાકેદાર પદાર્પણ કર્યું છે. આ સુપરસ્ટાર રીટર્ન કલાકારો તેમના અભિનયની પ્રતિભા દ્વારા આજે પણ દર્શકોના દિલોમાં આગવું સ્થાન ધરાવે છે.

આમિર ખાનની દરિયાદિલી

હિમાચલ પ્રદેશમાં કુદરતની આફતના કારણે મોટી સંખ્યામાં લોકોની હાલત કફોડી બની ગઈ હતી. આથી પરિસ્થિતિની ગંભીર નોંધ લઇને આમિર ખાને દરિયાદિલ દર્શાવી છે અને તેણે પૂરપીડિતોની મદદ માટે 25 લાખ રૂપિયાનું દાન આપ્યું છે. હિમાચલમાં ભૂસ્ખલન થતાં મોટાપાયે જાનમાલનું નુકસાન થયું હતું. આ અંગે માહિતી આપતાં હિમાચલ પ્રદેશના મુખ્ય પ્રધાન ઠાકુર સુખવિન્દર સિંહ સુખુએ કહ્યું કે ‘આ રકમ લોકોને રાહત આપવા અને તેમના પુનર્વસન માટે ખૂબ મદદ કરશે. આમિર ખાને કરેલી મદદથી રાજ્યમાં પ્રભાવિત લોકોને ફરીથી બેઠા કરવામાં મદદ મળશે.’

15 ઓક્ટોબરથી ‘બિગ બોસ-17’ નવા સ્વરૂપે

સલમાન ખાનના રિયલિટી શો ‘બિગ બોસ 17’નું ટીઝર લોન્ચ થઇ ગયું છે. તેમાં સલમાન ખાન ટૂંકા વાળમાં જોવા મળી રહ્યો છે. આ શો 15 ઓક્ટોબરથી શરૂ થશે તેવું કહેવાય છે. આ વખતની થીમ દિલ, દિમાગ અને દમ રાખવામાં આવી છે. કલર્સ ચેનલે ઇન્સ્ટાગ્રામ પર એનું ટીઝર પોસ્ટ કર્યું હતું. એ ટીઝરમાં સલમાન કહી રહ્યો છે કે ‘અત્યાર સુધી તમે બિગ બોસની માત્ર આંખો જોઈ છે. હવે જોશો તમે બિગ બોસના ત્રણ નવા અવતાર.’ સલમાન આ ટીઝરમાં ત્રણ અલગ-અલગ લુકમાં આવે છે અને દરેક લુકમાં દિલ, દિમાગ અને દમનો ઉલ્લેખ કરે છે.

ફિલ્મ રીવ્યૂઃ જાને જાન

કરીના કપૂર, જયદીપ અહલાવત અને વિજય વર્મા અભિનિત ફિલ્મ જાને જાન ઓટીટી પ્લેટફોર્મ પર રિલીઝ થઈ છે. સુજોય ઘોષના ડાયરેક્શનમાં બનેલી આ ક્રાઈમ થ્રિલર ફિલ્મ છે, જેમાં કરીના સિંગલ મધરની ભૂમિકા ભજવી રહી છે. તેના પૂર્વ પતિની હત્યા પછી તેને શંકાની નજરથી જોવામાં આવે છે. આ ફિલ્મની કથાના કેન્દ્રમાં સિંગલ મધર અને તેની પુત્રી છે. બંને એક રહસ્યમય હત્યાના કેસમાં ફસાઇ જાય છે. આ દરમિયાન તેમને પાડોશી તરીકે એક મદદગાર મળે છે. તે એક સાધારણ પણ હોંશિયાર શિક્ષક છે.