બ્રિટિશ એરલાઈન્સ કંપની વર્જિન એટલાન્ટિકે પાકિસ્તાનમાં તેની ફ્લાઇટ સર્વિસ બંધ કરી દીધી છે. સિવિલ એવિયેશન ઓથોરિટીના એક પ્રવક્તાએ જણાવ્યું કે સાત વીકલી ફ્લાઇટ સાથે બ્રિટિશ એરલાઈન્સે ડિસેમ્બર 2020માં અઠવાડિયામાં સાત ફ્લાઈટ સાથે ઈસ્લામાબાદ એરપોર્ટ પર વિમાન સેવા ચાલુ કરી હતી. વર્જિન એટલાન્ટિકના પ્રવક્તાએ જણાવ્યું હતું કે મે 2023માં અમારા ફ્લાઇંગ પ્રોગ્રામને આગળ ધપાવવાનું ચાલુ રાખ્યું હોવાથી, અમે અમારા સમગ્ર નેટવર્કની સમીક્ષા કરવાની તક ઝડપી છે અને થોડા ફેરફારો કરવાનું નક્કી કર્યું છે. આ અમે હળવાશથી લીધેલો નિર્ણય નથી, અને અમને થયેલી કોઈપણ અસુવિધા માટે અમે માફી માંગીએ છીએ.

ગૌતમ અદાણી દેવામાં ડુબેલા અનિલ અંબાણીના પાવર પ્લાન્ટ્સ ખરીદવાનું વિચારે છે. અનિલ અંબાણીના કોલસા આધારિત પાવર પ્લાન્ટ્સની હરાજી થવાની છે જેમાં ગૌતમ અદાણી બોલી લગાવી શકે છે. અનિલ અંબાણીની કંપનીઓ દેવું ભરવામાં નિષ્ફળ રહેતા ઈન્ડિયન બેન્કરપ્સી કોર્ટ દ્વારા તેની હરાજી કરવામાં આવશે. અદાણી જૂથે તાજેતરમાં 2.8 અબજ ડોલરની નવી મૂડી એકઠી કરી છે. અદાણીને વિદર્ભ ઈન્ડસ્ટ્રીઝ પાવર લિમિટેડની ખરીદીમાં રસ છે જેની પ્રમોટર તરીકે અનિલ અંબાણીની કંપની રિલાયન્સ પાવર છે. વિદર્ભ ઈન્ડસ્ટ્રીઝ મધ્ય ભારતમાં 600 મેગાવોટ વીજ ઉત્પાદનની ક્ષમતા ધરાવતા પ્લાન્ટ ધરાવે છે.

એક્સપેટ્સ ઇન્સાઇડર 2023 નામના એક ગ્લોબલ સરવેમાં મેક્સિકો અને સ્પેન વિદેશી કર્મચારીઓ માટે શ્રેષ્ઠ ગણવામાં આવ્યા છે જ્યારે કુવૈત અને નોર્વેને સૌથી ખરાબ દેશ ગણવામાં આવ્યા છે. આ સરવેમાં કુલ 53 દેશોને આવરી લેવાયા હતા જેમાં ભારત 36મા સ્થાને આવ્યું છે. એટલે કે વિદેશીઓ માટે ભારતમાં કામ કરવું એટલું સરળ નથી. તેની તુલનામાં મેક્સિકો, પનામા, સ્પેન, મલેશિયા અને તાઈવાનમાં બહારના લોકો સુખેથી કામ કરી શકે છે. આ વિગતો બહાર આવી હતી. નવાઈની વાત એ છે કે વિદેશીઓ માટે ખરાબ દેશોમાં જર્મની, સાઉથ કોરિયા, તુર્કી, નોર્વે અને કુવૈતનો સમાવેશ થાય છે.

1.4 બિલિયન વસ્તી ધરાવતા ભારતના અર્થતંત્રમાં નાટકીય વધારો થવાની ધારણા અને ભારત 2075 સુધીમાં વિશ્વની બીજી સૌથી મોટી અર્થવ્યવસ્થા બની જશે, એમ ગોલ્ડમેન સૅક્સના એર રીસર્ચ રીપોર્ટમાં જણાવાયું છે. હાલમાં ભારતનું ઇકોનોમી આ સમયગાળા સુધીમાં 52.5 ટ્રિલિયન ડોલરનું થશે જે અમેરિકા કરતાં મોટું હશે અને ચીન પછી વિશ્વમાં બીજા ક્રમે હશે. રીપોર્ટમાં જણાવ્યા મુજબ ભારત ટૂંક સમયમાં વિશ્વના ટોપ-3 શક્તિશાળી દેશોમાં સામેલ થઈ જશે. વિશ્વની અગ્રણી ઇન્વેસ્ટમેન્ટ બેંક ગોલ્ડમેન સેક્સે બહાર પાડેલ રીપોર્ટ મુજબ વર્ષ 2075 સુધીમાં ભારતીય અર્થવ્યવસ્થા અમેરિકાને પછાડી દેશે અને વિશ્વની બીજી સૌથી મોટી અર્થવ્યવસ્થા બની જશે.

ક્રિતિ સેનન નિર્માત્રી બની

ક્રિતિ સેનને અભિનય પછી હવે નિર્માત્રી બનીને બોલીવૂડમાં પોતાનું નસીબ અજમાવ્યું છે. ક્રિતિએ પ્રોડ્યુસર તરીકે પોતાની પહેલી ફિલ્મ ‘દો પત્તી’ બનાવવાની જાહેરાત કરી છે. મર્ડર મિસ્ટ્રી ધરાવતી આ ફિલ્મમાં કાજોલનો લીડ રોલ છે. કાજોલ અને ક્રિતિ આઠ વર્ષ પછી સાથે કામ કરશે. છેલ્લા કેટલાક દિવસોથી આદિપુરુષના કારણે ક્રિતિ ઘણી ટ્રોલ થઈ છે. આદિપુરુષ થીયેટરમાંથી ઉતરી ગયા બાદ હવે તેની ચર્ચાઓ પણ અટકી ગઈ છે ત્યારે ક્રિતિએ ફરી એક વખત ધ્યાન ખેંચ્યું છે. પાછલા નવ વર્ષથી ફિલ્મ ઈન્ડસ્ટ્રીમાં એક્ટિવ રહેલી ક્રિતિએ પોતાનું પ્રોડક્શન હાઉસ શરૂ કર્યું છે અને તેનો પ્રથમ પ્રોજેક્ટ પણ એનાઉન્સ કર્યો છે.

પેરિસ ફેશન શોમાં સોનમનો દબદબો

અભિનેત્રી સોનમ કપૂર સાચા અર્થમાં ફેશન આઇકોન છે. જ્યારે પણ તે શહેરની બહાર જાય છે અથવા તો કોઇ ઇવેન્ટમાં જાય ત્યારે પોતાનાં ફેશનેબલ લૂકથી તે ચાહકો અને મીડિયામાં છવાઇ જાય છે. સોનમ બોલીવૂડની એવી અભિનેત્રી છે જેણે ફિલ્મ ઉદ્યોગમાં સ્ટાઇલ અને ફેશનની વ્યાખ્યા બદલી નાખી છે. લીજેન્ડરી ફેશન ડિઝાઇનર ક્રિસ્ટિયન ડિઓર સાથે નજીકનાં સંબંધો ધરાવતી ગ્લોબલ ફેશન આઇકન સોનમને પેરિસ ફેશન વીક ખાતે ડિઓરનાં ઓટમ-વિન્ટર શોમાં આમંત્રણ આપવામાં આવ્યું છે. એક પુત્રની માતા સોનમે તાજેતરમાં આ ભવ્ય ઇવેન્ટમાં હાજરી આપી હતી.

રેખાઃ કલ, આજ ઔર કલ

ભારતીય સિનેમાની સદાબહાર અભિનેત્રી રેખાના ચાહકો દેશ-વિદેશમાં છે. તેઓ ઘણાં વર્ષોથી ફિલ્મો અને ફોટોશૂટથી દૂર રહ્યાં છે. તાજેતરમાં તેમણે વોર અરેબિયા મેગેઝિનના કવરપેજ માટે ફોટોશૂટ કરાવ્યું હતું. રેખાએ મુગલ અને મહારાજા શૈલીના ડ્રેસ-જ્વેલરી સાથે કરાવેલું ફોટોશૂટ ‘ઉમરાવ જાન’ ફિલ્મના તેમના આઈકોનિક લૂકની યાદ અપાવે છે. ૬૯ વર્ષનાં રેખાના નવા ફોટોગ્રાફ્સ જોઈને અનેક લોકોએ ઉમરાવ જાનના યાદગાર ગીત ‘ઈન આંખો કી મસ્તી કે દિવાને હજારો હૈં’ ની પંક્તિ યાદ કરી હતી. રેખાએ ગોલ્ડન એમ્બ્રોઈડરી અને ગોલ્ડન જરી સાથે મુગલ શૈલીના ડ્રેસ અને રજવાડી શૈલીના ડ્રેસમાં ફોટોશૂટ કરાવ્યું હતું.

KBCની 15 મી સીઝનમાં ટેકનોલોજિકલ ફેરફાર જોવા મળશે

અમિતાભ બચ્ચન આજે પણ ફિલ્મોની સાથે ટેલિવિઝન ક્ષેત્રે પોતાનું અનોખું સ્થાન ધરાવે છે. છેલ્લા 23 વર્ષથી તેઓ જાણીતા ટીવી શો- કૌન બનેગા કરોપડતિ (KBC)નું સંચાલન કરી રહ્યા છે. હવે તેઓ કેબીસીની 15મી સિઝન લઈને આવી રહ્યા છે. આ અંગે ઓફિશિયલ એનાઉન્સમેન્ટ કરતાં સોની ટીવીએ પ્રોમો રિલીઝ કર્યો છે, જેમાં આ શોમાં મોટા ફેરફાર લાવવાની જાહેરાત કરવામાં છે. સોની એન્ટરટેઈનમેન્ટ ટેલિવિઝને પોસ્ટ કરેલા 15મી સિઝનના પ્રોમોમાં શોના હોસ્ટ તરીકે અમિતાભ બચ્ચન જોવા મળે છે. તેઓ શોમાં કેટલાક ફેરફારની વાત કરે છે.