અનિલ અગ્રવાલના વડપણ હેઠળના વેદાંત ગ્રુપ સાથેના $19.5 બિલિયનના સેમિકન્ડક્ટર સંયુક્ત સાહસમાંથી ખસી ગયાના એક દિવસ પછી ફોક્સકોને મંગળવારે જણાવ્યું હતું કે તેને ભારતમાં ચિપ ઉત્પાદન સુવિધાની સ્થાપના કરવામાં હજી પણ રસ છે અને તે નવા, વૈવિધ્યપૂર્ણ ભાગીદારોની શોધમાં છે. ફોક્સકોન ભારતની સેમિકન્ડક્ટર મેન્યુફેક્ચરિંગ પોલિસી હેઠળના પ્રોત્સાહનોનો લાભ લેવાની યોજના વિચારી રહ્યું છે. અહીં ઉલ્લેખનીય છે કે વેદાંત અને ફોક્સકોને ગુજરાતમાં સેમિકન્ડકટર પ્લાન્ટ નાંખવાની સમજૂતી કરી હતી. હવે ફોક્સકોન તેમાંથી ખસી ગઈ છે. જોકે આ બંને કંપનીઓ નવા ભાગીદાર શોધે તેવી શક્યતા છે.

ચાલુ કેલેન્ડર વર્ષના પ્રથમ છ મહિના વિશ્વના ટોચના અબજોપતિઓ માટે ભારે ઉથલપાથલ ભર્યા રહ્યા હતા. ટ્વીટર અને ટેસ્લાના માલિક ઈલોન મસ્કની સંપત્તિમાં છ મહિનામાં સૌથી વધારે વધારો થયો હતો, જ્યારે અદાણી જૂથના વડા ગૌતમ અદાણીની નેટવર્થમાં સૌથી મોટો ઘટાડો થયો હતો. છ મહિનામાં વિશ્વના ટોચના 500 ધનાઢ્યોની સંપત્તિમાં 852 બિલિયન ડોલરનો વધારો થયો હતો. બ્લૂમબર્ગના બિલિયનર્સ ઈન્ડેક્સના દરેક સભ્યની સંપત્તિમાં છેલ્લા છ મહિનામાં રોજના 14 મિલિયન ડોલરના દરે વધારો થયો હતો. 2020 પછી આ વર્ષના છ મહિના સૌથી વધુ લાભદાયક રહ્યા છે.

વૈશ્વિક સોશિયલ મીડિયા કંપની મેટાના માલિક માર્ક ઝકરબર્ગે બુધવાર, 6 જુલાઈએ માઇક્રોબ્લોગિંગ સાઇટ ટ્વીટરને સ્પર્ધા આપવા માટે નવા થ્રેડ્સ નામનું પ્લેટફોર્મ લોન્ચ કર્યું હતું અને તેમાં પ્રથમ સાત કલાકમાં 10 મિલિયન યુઝર્સે સાઇન અપ કર્યું હતું. તેનાથી બિલિયોનેર માર્ક ઝુકરબર્ગ અને ઇલોન મસ્ક વચ્ચેની હરીફાઈમાં વધારો થયો છે. થ્રેડ્સ ઇલોન મસ્કની માલિકીના ટ્વિટર માટે સૌથી મોટો પડકાર માનવામાં આવે છે. થ્રેડ્સ લોન્ચ કરવામાં આવ્યાના પ્રથમ સાત કલાકમાં 10 મિલિયન યુઝર્સે સાઇન-અપ કર્યું હતું.

આઈડીએફસી ફર્સ્ટ બેન્કે જણાવ્યુ હતું કે તેની પેરેન્ટ આઈડીએફસી લિમિટેડનું તેની સાથે મર્જર થઈ જશે. આમ એચડીએફસી ટ્વિન્સના મર્જર પછી બેન્કિંગ સેક્ટરમાં આ બીજું મર્જર આકાર લેશે. આઈડીએફસી ફર્સ્ટ બેન્ક અને આઈડીએફસી લિમિટેડના બોર્ડે આ રિવર્સ મર્જરને મંજૂરી આપી હતી. બેન્કે મર્જ્ડ એન્ટિટીનાં વેલ્યૂએશન અંગે કોઈ વિગત આપી ન હતી, પરંતુ સોમવારના તેમના બંધ ભાવ મુજબ વેલ્યૂએશન રૂ.71,767 કરોડનું થાય છે. રિવર્સ મર્જર સ્કીમ અંતર્ગત આઈડીએફસીના શેરધારકોને પ્રત્યેક 100 શેર સામે આઈડીએફસી બેન્કના 155 શેર મળશે. મૂળભૂત રીતે ઇન્ફ્રાસ્ટ્રક્ચર સેક્ટરમાં ખાનગી કંપનીઓને ધિરાણ કરતી કંપની તરીકે આઈડીએફસીની સ્થાપના થઈ હતી.

KBCની 15 મી સીઝનમાં ટેકનોલોજિકલ ફેરફાર જોવા મળશે

અમિતાભ બચ્ચન આજે પણ ફિલ્મોની સાથે ટેલિવિઝન ક્ષેત્રે પોતાનું અનોખું સ્થાન ધરાવે છે. છેલ્લા 23 વર્ષથી તેઓ જાણીતા ટીવી શો- કૌન બનેગા કરોપડતિ (KBC)નું સંચાલન કરી રહ્યા છે. હવે તેઓ કેબીસીની 15મી સિઝન લઈને આવી રહ્યા છે. આ અંગે ઓફિશિયલ એનાઉન્સમેન્ટ કરતાં સોની ટીવીએ પ્રોમો રિલીઝ કર્યો છે, જેમાં આ શોમાં મોટા ફેરફાર લાવવાની જાહેરાત કરવામાં છે. સોની એન્ટરટેઈનમેન્ટ ટેલિવિઝને પોસ્ટ કરેલા 15મી સિઝનના પ્રોમોમાં શોના હોસ્ટ તરીકે અમિતાભ બચ્ચન જોવા મળે છે. તેઓ શોમાં કેટલાક ફેરફારની વાત કરે છે.

અનિલ કપૂરની બોલીવૂડમાં 40 વર્ષની કારકિર્દી

બોલિવૂડ અભિનેતા અનિલ કપૂરે તાજેતરમાં અભિનેતા તરીકેની કારકિર્દીના ચાર દાયકા પૂર્ણ કર્યા છે. તેણે 1983માં સત્તીરાજુ લક્ષ્મીનારાયણ દ્વારા દિગ્દર્શિત રોમેન્ટિક-ડ્રામા ફિલ્મ વો સાત દિનથી હિન્દી ફિલ્મમાં પ્રવેશ કર્યો હતો. આ પ્રસંગની ઉજવણી કરવા તેણે ઇન્સ્ટાગ્રામ પર ફિલ્મના એક દૃશ્યનો એક વિડિયો પોસ્ટ કર્યો અને તેને કેપ્શન આપ્યું, “આજે એક અભિનેતા અને મનોરંજક તરીકે 40 વર્ષ પૂરા થયા છે.” દર્શકો, તમારી સ્વીકૃતિ, પ્રેમ અને આશીર્વાદના 40 વર્ષ પૂર્ણ થયા છે. તેણે વધુમાં લખ્યું, તેઓ કહે છે કે જ્યારે તમે તમને ગમતી વસ્તુ કરો છો, ત્યારે સમય પસાર જાય છે.

ક્રિતિ સેનન માટે કપરો સમય

બોલિવૂડમાં પોતાનું આગવું સ્થાન જમાવી ચૂકેલી ક્રિતિ સેનન માટે અત્યારે કપરો સમય ચાલી રહ્યો છે. ક્રિતિએ મોટા સ્ટાર્સ સાથે બિગ બજેટ ફિલ્મોમાં કામ કર્યું છે, પરંતુ તેની આ ફિલ્મો બોક્સઓફિસ પર ખાસ સફળ થઇ શકી નથી. છેલ્લા દોઢ વર્ષમાં તેની ચાર ફિલ્મો ફ્લોપ ગઈ છે. જેમાં બચ્ચન પાંડેથી લઈને આદિપુરુષ સુધીની ફિલ્મોનો સમાવેશ થાય છે. પ્રભાસ અને સૈફ અલી ખાન સાથેની તેની ફિલ્મ આદિપુરુષ અત્યારે ચર્ચામાં છે. આ ફિલ્મે રિલીઝના પ્રથમ દિવસે તો રૂ. 140 કરોડનું કલેક્શન મેળવ્યું હતું, પરંતુ બીજા દિવસથી તેમાં ઘટાડો જોવા મળ્યો છે.

ચંકી પાંડેએ અક્ષયકુમાર અંગેની હકીકત સ્વીકારી

છેલ્લા બે વર્ષમાં સતત ફ્લોપ ફિલ્મો આપવા છતાં અક્ષયકુમારનો દબદબો યથાવત છે. સામાન્ય રીતે અક્ષયકુમાર વર્ષમાં ચાર-પાંચ ફિલ્મો કરે છે અને તેમની દરેક ફિલ્મ સારી ચાલે છે. ગત વર્ષથી એક પણ ફિલ્મ હિટ ન હોવા છતાં અક્ષયકુમાર શૂટિંગમાં વ્યસ્ત છે. અક્ષયકુમારની કારકિર્દી આ નાજુક તબક્કામાં ચંકી પાંડેએ રસપ્રદ ખુલાસો કર્યો છે. ચંકી પાંડેએ જણાવ્યું હતું કે, અક્ષયકુમાર ઈન્ડસ્ટ્રીમાં નવા હતા ત્યારે તેમણે અભિનય કેવી રીતે કરવો શીખવાડ્યું હતું. જેના કારણે શરૂઆતના પાંચ વર્ષ અક્ષયની ફિલ્મો ફ્લોપ રહી હતી. ચંકી પાંડેએ ‘ખાને મૈં કૌન હૈ’ના લેટેસ્ટ એપિસોડ દરમિયાન જણાવ્યું હતું કે, 1986-87ના વર્ષમાં હું મધુમતિ ડાન્સ એકેડમીમાં હતો.