વિશ્વની બીજા ક્રમની સૌથી મોટી કન્ઝ્યુમર ગૂડ્ઝ કંપની પ્રોક્ટર એન્ડ ગેમ્બલ (P&G)એ ભારતમાં એક્સપોર્ટ હબ સ્થાપવા માટે ગુજરાતમાં રૂ.2,000 કરોડનું રોકાણ કરવાની યોજના બનાવી છે. પર્સનલ હેલ્થકેર મેન્યુફેક્ચરિંગ પ્લાન્ટમાં હેલ્થકેર પ્રોડક્ટ્સ અને ખાસ કરીને ડાયજેસ્ટિવ્સ પ્રોડક્ટ્સનું ઉત્પાદન કરવામાં આવશે. આ પ્લાન્ટ આગામી થોડા વર્ષોમાં કાર્યરત થશે અને વૈશ્વિક સ્તરે P&G માટે નિકાસ હબ બનશે. તેનાથી P&G ઈન્ડિયાને સમગ્ર વિશ્વમાં ગ્રાહકોને પ્રોડક્ટ્સ પહોંચાડવામાં મદદ મળશે. આ રોકાણ સાથે, P&G ઇન્ડિયા સેંકડો પ્રત્યક્ષ અને પરોક્ષ નોકરીઓનું સર્જન કરવામાં મદદ કરશે, જેનાથી સ્થાનિક અર્થતંત્રમાં નોંધપાત્ર વધારો થશે.

સ્વિસ બેન્કિંગ ગ્રુપ UBS એ ક્રેડિટ સુઈસના 35,000 કર્મચારીઓની છટણી કરવાની યોજના બનાવી રહી છે. તેનાથી ક્રિડિટ સુઇસલના કર્મચારીઓની સંખ્યા અડધાથી પણ ઓછી થઈ જશે. અગાઉ સ્વિત્ઝર્લેન્ડની સરકારે બેલઆઉટ પેકેજ આપીને મુશ્કેલીમાં મુકાયેલી ક્રેડિટ સુઈસને બચાવી હતી અને તેને યુબીએસએ હસ્તગત કરી હતી. ક્રેડિટ સુઈસમાં અંદાજે 45,000 કર્મચારીઓ છે. ક્રેડિટ સુઈસની સોલ્વન્સી પર રોકાણકારોના ડરને કારણે તે પતનની નજીક આવી ગઈ હતી. આવું ન થાય તે માટે, સ્વિસ સરકારે મોટા પાયે બેલઆઉટની વ્યવસ્થા કરી હતી. વિશ્લેષકોએ ચેતવણી આપી હતી કે વિશ્વની બે સૌથી મહત્વપૂર્ણ બેંકોમાં ઓવરલેપ થવાથી મોટાપાયે નોકરીઓમાં કાપ આવી શકે છે.

યુએસ સ્થિત ઇન્વેસ્ટમેન્ટ ફર્મ GQG પાર્ટનર્સ અને અન્ય રોકાણકારોએ અદાણી એન્ટરપ્રાઇઝ લિમિટેડ અને અદાણી ગ્રીન એનર્જીમાં $900 મિલિયનથી વધુનો હિસ્સો ખરીદ્યો છે, સૂત્રોના જણાવ્યા અનુસાર રોકાણકારોએ અદાણી પરિવાર પાસેથી હિસ્સો ખરીદ્યો હતો. અબજોપતિ ગૌતમ અદાણીની મુખ્ય કંપની અદાણી એન્ટરપ્રાઇઝિસના શેરોમાં બુધવારે 1.8 કરોડ શેરની બ્લોક ડીલ થઈ હતી. અદાણી ગ્રીન એનર્જીના શેરોમાં 24 મોટા સોદાઓ થયા હતા અને કુલ 11.4 લાખ શેરના સોદા થયા હતા. અદાણી એન્ટરપ્રાઈઝમાં ₹2,300ના ભાવે બ્લોક ડીલ થઈ હતી. અદાણી ગ્રીન માટે સોદાની કિંમત ₹920 રૂપિયા હતી.

ટાટા મોટર્સની પેટાકંપની ટાટા ટેક્નોલોજીના આઈપીઓને સેબીએ મંગળવારે મંજૂરી આપી હતી. આશરે 20 વર્ષ પછી ટાટા ગ્રૂપની કોઇ કંપનીનો આ પ્રથમ આઇપીઓ હશે. ટાટા ટેકનોલોજી સહિતની આ ત્રણ કંપનીઓએ આઈપીઓ માટે ડિસેમ્બર 2022થી માર્ચ 2023 વચ્ચે તેમના ડ્રાફ્ટ રેડ હેરિંગ પ્રોસ્પેક્ટસ રજૂ કર્યા હતા. તેમને 21થી 23 જૂન વચ્ચે મંજૂરી મળી હતી ડ્રાફ્ટ પેપર્સ અનુસાર ટાટા ટેક્નોલોજીનો આઈપીઓ સંપૂર્ણપણે ઓફર ફોર સેલ (OFS) સ્વરૂપનો છે જેમાં કંપની 9.57 કરોડ ઈક્વિટી શેર વેચશે, જે કંપનીની કુલ પેઈડ-અપ શેર કેપિટલના 23.60 ટકા છે.

બોલિવૂડની રોમેન્ટિક ફિલ્મોને લાગ્યો ગરબાનો રંગ

બોલીવૂડની ફિલ્મોમાં વર્ષોથી દેશનાં વિવિધ રાજ્યોનાં લોકગીતો અને સંસ્કૃતિ આધારિત ગીતો જોવા મળે છે, જેમાં ગુજરાતી ગરબાનો પણ સમાવેશ થાય છે. નવરાત્રિ એટલે ગુજરાતીઓનો જાણીતો તહેવાર. અત્યાર સુધી અનેક ફિલ્મોમાં ગરબા ગીતોનું અદભૂત ફિલ્માંકન કરવામાં આવ્યું છે. કેટલાંક ગીતો સુપરહીટ સાબિત થયા છે. જૂની ફિલ્મોની વાત કરીએ તો “મૈં તો ભૂલ ચલી બાબુલ કા દેસ” (સરસ્વતીચંદ્ર), “મૈં તો આરતી ઊતારું રે” (જય સંતોષી મા), “ઓ શેરોવાલી (સુહાગ)” જેવા ગરબા આધારિત ગીતો ખૂબ લોકપ્રિય બન્યા હતા.

અમિતાભ-કમલ હાસન ૩8 વર્ષે સાથે દેખાશે

આદિપુરુષની નિષ્ફળતાને ભૂલીને પ્રભાસે નવા ફિલ્મ પ્રોજેક્ટ K પર ધ્યાન કેન્દ્રિત કર્યું છે. આ ફિલ્મમાં પ્રભાસની સાથે અમિતાભ બચ્ચન અને દીપિકા પદુકોણ પણ મુખ્ય ભૂમિકામાં છે. સાઉથ અને બોલિવૂડનું કોમ્બિનેશન ધરાવતી આ ફિલ્મમાં કમલ હાસનની એન્ટ્રી થઈ છે. આ સાથે કમલ હાસન અને અમિતાભ બચ્ચન 38 વર્ષ પછી સાથે કોઈ ફિલ્મમાં કામ કરશે. પ્રોજેક્ટ Kમાં કમલ હાસનના સમાવેશ અંગે લાંબા સમયથી અટકળો ચાલી રહી હતી. ટ્રેડ એનાલિસ્ટ તરણ આદર્શે એક વીડિયો સોશિયલ મીડિયામાં પોસ્ટ કર્યો છે, જેમાં કમલ હાસનના રોલના વિઝ્યુઅલ્સ જોવા મળે છે. આ નાના વીડિયોની સાથે ઈન્ટ્રોડક્શન પણ અપાયું છે.

સોનમને લંડનમાં મળ્યું અનોખું સન્માન

બોલિવૂડની ફેશન આઈકોન ગણાતી સોનમ કપૂરને લંડનમાં વડાપ્રધાન રિશિ સુનકે ખાસ આમંત્રણ આપ્યું છે. લંડનમાં વડાપ્રધાનના સત્તાવાર નિવાસ સ્થાન-10 ડાઉનિંગ સ્ટ્રીટ ખાતે તાજેતરમાં યુકે-ઈન્ડિયા વીકનું આયોજન કરાયું છે. ઈન્ડિયા ગ્લોબલ ફોરમ દ્વારા 26થી 30 જૂન દરમિયાન લંડન ખાતે વિવિધ કાર્યક્રમો યોજવામાં આવ્યા હતા. જેમાં 28મીએ વડાપ્રધાનના નિવાસ સ્થાને રિસેપ્શનનું આયોજન કરાયું હતું. વડાપ્રધાન સુનકના યજનમાન પદે રીસેપ્શન યોજાઈ રહ્યું હોવાથી સોનમ કપૂર પણ લંડન પહોંચી છે.

હોલિવૂડ ફિલ્મમાં આલિયા ભટ્ટ નેગેટિવ ભૂમિકામાં

બોલિવૂડની યુવા અભિનેત્રી આલિયા ભટ્ટે હોલીવૂડની ફિલ્મમાં વિલન તરીકે પ્રવેશ કર્યો છે. હોલિવૂડ સ્ટાર ગલ ગેડોટ સાથે ‘હાર્ટ ઓફ સ્ટોન’માં આલિયા નેગેટિવ ભૂમિકામાં જોવા મળશે. આલિયાએ તાજેતરમાં આ ફિલ્મનું ટ્રેલર સોશિયલ મીડિયા પર પોસ્ટ કર્યું હતું, જેમાં તે આકર્ષક વિલન તરીકે નજરે પડે છે. બોલિવૂડના સૌથી વધુ લોકપ્રિય કપલમાં આલિયા ભટ્ટ અને રણબીર કપૂરનો સમાવેશ થાય છે. દીકરી રાહા અને રણબીર સાથેના બોન્ડિંગ ઉપરાંત ફિલ્મોના કારણે પણ આલિયા ચર્ચામાં રહે છે. પાછલા કેટલાક દિવસથી આલિયાના હોલિવૂડ ડેબ્યુની ચર્ચા હતી. આલિયાને પ્રથમવાર ઈંગ્લિશ ફિલ્મમાં જોવા માટે દર્શકો આતુર છે.