ટેકનોલોજી પાર્ટનર શોધવામાં મુશ્કેલી અને ગુજરાત સરકાર પાસેથી નાણાકીય પ્રોત્સાહનો મેળવવા સામેના પડકારોને કારણે ગુજરાતમાં 19 બિલિયન ડોલરનો સેમિકન્ડર પ્લાન્ટ નાંખવાની અનિલ અગ્રવાલની યોજના હાલમાં અટવાઈ પડી હોવાનું મીડિયા રીપોર્ટમાં જણાવાયું છે. 2022માં ગુજરાત વિધાનસભાની ચૂંટણી યોજવાની તૈયારીઓ ચાલતી હતી ત્યારે અનિલ અગ્રવાલે ગુજરાતના ધોલેરા ખાતે એક સેમીકન્ડક્ટર (ચિપ્સ) પ્લાન્ટ સ્થાપવાની જાહેરાત કરી હતી. અગરવાલની કંપની વેદાંતા અને તાઈવાનની ફોક્સકોન ગુજરાતમાં 20 અબજ ડોલરનું રોકાણ થવાનું હતું. પરંતુ હવે આ પ્રોજેક્ટમાં અવરોધ પેદા થયા હોય તેમ લાગે છે.

તાજેતરમાં ભારતની અગ્રણી આઈટી કંપની ઈન્ફોસિસે ચાલુ નાણાકીય વર્ષના ચોથા ક્વાર્ટર માટે તેના નાણાકીય પરિણામ અને તેની સાથે ડિવિડન્ડની જાહેરાત કરી હતી. તેનાથી સીધો ફાયદો યુકેના વડાપ્રધાન રિશિ સુનકના ઘર સુધી પહોંચ્યો હતો. રિશિ સુનાકના પત્ની અક્ષતા મૂર્તિ ઈન્ફોસિસના સ્થાપક નારાયણ મૂર્તિના પુત્રી છે. ઈન્ફોસિસે ડિવિડન્ડની જાહેરાત કરી તેના કારણે અક્ષતા મૂર્તિને રૂ.68 કરોડથી વધુ આવક થશે. કંપનીએ નાણાકીય વર્ષ 2023 માટે શેર દીઠ 17.50ના અંતિમ ડિવિડન્ડની જાહેરાત કરી હતી.

ચાલુ વર્ષના બીજા ક્વાર્ટર માટે ઇકોનોમિક ઇન્ટેલિજન્સ યુનિટ (EIU)ના બિઝનેસ એન્વાયર્નમેન્ટ રેન્કિંગ અનુસાર સિંગાપોર આગામી પાંચ વર્ષ માટે વિશ્વમાં શ્રેષ્ઠ બિઝનેસ વાતાવરણ ધરાવતો દેશ બન્યો છે. આ બીજા ક્રમે સમાન સ્કોર સાથે કેનેડા અને ડેનમાર્ક છે. ટોચના 10 દેશમાં અમેરિકા, હોંગકોંગ અને ન્યૂઝીલેન્ડ ઉપરાંત પશ્ચિમ યુરોપના કેટલાંક દેશોનો સમાવેશ થાય છે. એશિયામાં ઓસ્ટ્રેલિયા, તાઈવાન અને દક્ષિણ કોરિયા પણ વૈશ્વિક ટોચના 20 દેશોમાં સ્થાન ધરાવે છે. આ રેન્કિંગ અનુસાર ભારત ૨૦૨૨ના બીજા ક્વાર્ટર અને ૨૦૨૩ના બીજા ક્વાર્ટર વચ્ચે ૬ સ્થાન આગળ વધી ગયું છે.

આશરે 19 બિલિયન ડોલરની નેટવર્થ ધરાવતા મહિન્દ્રા એન્ડ મહિન્દ્રા ગ્રૂપના ભૂતપૂર્વ ચેરમેન અને ઉદ્યોગપતિ કેશબ મહિન્દ્રાનું બુધવાર, 12 એપ્રિલે અવસાન થયું હતું. તેઓ 99 વર્ષના હતા. કેશબ મહિન્દ્રાનો જન્મ 9 ઓક્ટોબર 2023ના રોજ હિમાચલ પ્રદેશના શિમલામાં થયો હતો. તેમણે યુએસએની પેન્સિલવેનિયા યુનિવર્સિટીમાંથી ગ્રેજ્યુએશનની ડિગ્રી મેળવી હતી. તાજેતરમાં ફોર્બ્સની અબજપતિઓની યાદીમાં કેશબ મહિન્દ્રાને સ્થાન મળ્યું હતું. કેશબ મહિન્દ્રાની સંપત્તિ છેલ્લા આંકડા પ્રમાણે 1.20 બિલિયન ડોલર હતી. તેમણે 48 વર્ષ સુધી મહિન્દ્રા એન્ડ મહિન્દ્રા વડપણ સંભાળ્યું હતું. 2012માં તેમણે જવાબદારીઓમાંથી નિવૃત્તિ લીધી હતી.

જૂનમાં ચાર ફિલ્મોની જમાવટ: રૂ.1500 કરોડનો જુગાર ખેલાશે

જૂન મહિનામાં મોટા સ્ટાર્સની ચાર બિગ બજેટ ફિલ્મો આવી રહી છે. જેમાં જવાન, આદિપુરુષ, મૈદાન અને સત્યપ્રેમ કી કથાનો સમાવેશ થાય છે. પઠાણ ફિલ્મની સફળતા પછી શાહરૂખ ખાનનો કોન્ફિડન્સ સાતમા આસમાને છે. શાહરૂખની બીજી ફિલ્મ ‘જવાન’ બીજી જૂને આવી રહી છે અને ત્યારબાદ ૧૬ જૂને પ્રભાસની આદિપુરુષ રિલીઝ થશે. ૨૩મીએ અજય દેવગણની મૈદાન અને ૨૯મીએ કાર્તિક-કિયારાની સત્યપ્રેમ કી કથા આવશે. આ ચાર ફિલ્મોમાં બોલિવૂડના રૂ.૧૫૦૦ કરોડ દાવ પર લાગેલા છે.

પ્રિયંકા ચોપરા અમેરિકામાં કેમ સ્થાયી થઇ?

પ્રિયંકા ચોપરાએ મિસ વર્લ્ડનો ખિતાબ જીત્યા પછી ભારતીય ફિલ્મ ઈન્ડસ્ટ્રી અને હોલિવૂડમાં પણ પોતાનું આગવું સ્થાન જમાવ્યું છે. તમિલ ફિલ્મ સાથે અભિનયની કારકિર્દી શરૂ કરનાર પ્રિયંકાની પ્રથમ બોલિવૂડ ફિલ્મ ‘અંદાજ’ હતી. જેમાં તેની સાથે અક્ષયકુમાર અને લારા દત્તાએ મુખ્ય ભૂમિકા ભજવી હતી. એક પછી એક અનેક ફિલ્મોમાં શાનદાર અભિનયથી બોલિવૂડમાં અગ્રેસર રહેનાર પ્રિયંકા સાથે બોલિવૂડમાં ભેદભાવ થયો હોવાનું સામે આવ્યું છે અને આ અંગે ખુદ પ્રિયંકાએ જ સ્પષ્ટતા કરી છે. પ્રિયંકાએ તેની બોલિવૂડ કારકિર્દી અંગે જણાવ્યું હતું કે, તેણે શા માટે અમેરિકામાં કામ કરવાનું શરૂ કર્યું તેની પાછળ ઘણા કારણો હતા.

શાહરુખ ખાનનો વૈશ્વિક દબદબો યથાવત

બોલિવૂડના બાજીગર-કિંગ ખાન, બાદશાહ તરીકે ઓળખાતા શાહરૂખ ખાને વૈશ્વિક સ્તરે પણ પોતાનો દબદબો જાળવી રાખ્યો છે. ટાઈમ મેગેઝિને તૈયાર કરેલા એન્યુઅલ ‘TIME100’ લિસ્ટમાં શાહરૂખ ખાને વિશ્વના સૌથી વધુ પ્રભાવશાળી વ્યક્તિની યાદીમાં ટોચનું સ્થાન મેળવ્યું છે. તેને ફૂટબોલ લીજન્ડ લીઓનલ મેસ્સી, મેટા સીઈઓ માર્ક ઝુકરબર્ગ, ઓસ્કાર વિનર માઈકલ યેઓહ અને પ્રિન્સ હેરી મેગન મર્કલે કરતાં પણ વધુ મત પ્રાપ્ત થયા છે. ભારતમાં શાહરુખે 100થી વધુ ફિલ્મોમાં કામ કર્યું છે. ચાર વર્ષના બ્રેક પછી રિલીઝ થયેલી ‘પઠાણ’ ફિલ્મને હોલિવૂડના સ્ટાર્સે પણ વખાણી છે.

મલાઇકાની સંબંધોની ફિલોસોફી શું છે?

બોલિવૂડની ગ્લેમરસ અભિનેત્રી મલાઈકા અરોરાનું નામ હંમેશા મીડિયામાં ચર્ચાતું રહે છે. તે પોતાની ફિલ્મી કરિયર કરતાં પર્સનલ લાઈફને કારણે વધુ ચર્ચામાં રહે છે. હવે મલાઈકાએ લગ્નને બાબતે ચોંકાવનારી સ્પષ્ટતા કરી છે. મલાઈકા અત્યારે પોતાનાથી ઉંમરમાં નાના એવા એક્ટર અર્જુન કપૂર સાથેના ગાઢ સંબંધોના કારણે ચર્ચામાં રહે છે. તે બંને અવારનવાર સાથે જોવા મળતા હોય છે. હવે તેણે જણાવ્યું છે તે ફરી લગ્ન કરવા માટે વિચારી રહી છે, પરંતુ અત્યારે તે આ અંગે તમામ વાતો જાહેર કરવા ઇચ્છતી નથી.