બ્રિટનને પાછળ રાખીને ભારત દુનિયાનું પાંચમાં ક્રમનું સૌથી મોટું અર્થતંત્ર બન્યું છે. ભારતે 2021ના છેલ્લાં ત્રણ મહિનામાં બ્રિટનને પાછળ રાખી દીધું હતું. ભારતના અર્થતંત્રનું કદ 854.7 બિલિયન ડોલર રહ્યું હતું, જ્યારે યુકેનું ઇકોનોમી 816 બિલિયન ડોલરનું રહ્યું હતું. દુનિયાના સૌથી મોટા ચાર ઇકોનોમીમાં અમેરિકા, ચીન, જાપાન અને જર્મનીનો સમાવેશ થાય છે. હવે પાંચમું સ્થાન ભારતે હાંસલ કર્યું છે.ઇન્ટરનેશનલ મોનેટરી ફંડના જીડીપી ડેટા મુજબ ભારતે 2021ના છેલ્લાં ક્વાર્ટરમાં આ સિદ્ધિ હાંસલ કરી હતી. આ ગણતરી યુએસ ડોલરમાં કરવામાં આવેલી છે. એક દાયકા પહેલા વિશ્વના સૌથી મોટા અર્થતંત્રમાં ભારતનો ક્રમ 11મો હતો, જ્યારે બ્રિટન પાંચમાં સ્થાને હતું. ઇન્ટરનેશનલ રેન્કિંગમાં બ્રિટનની આ પીછેહટ તેના નવા વડાપ્રધાન માટે સારા સંકેત નથી.

વિશ્વની પ્રખ્યાત કોફી ચેઈન સ્ટારબક્સે ગુરુવારે ભારતીય મૂળના લક્ષ્મણ નરસિમ્હનની તેના નવા CEO તરીકે નીમવાની જાહેરાત કરી છે. અગાઉ નરસિમ્હન હાઇજિન કંપની રેકિટના CEO તરીકે ફરજ બજાવતા હતા.સ્ટારબક્સે જણાવ્યું હતું કે લક્ષ્મણ નરસિમ્હન ઓક્ટોબરમાં સ્ટારબક્સ સાથે જોડાશે, પરંતુ એપ્રિલ 2023થી કંપનીની બાગડોળ સંભાળશે. વચગાળાના સીઈઓ હોવર્ડ શુલ્ટ્ઝ જ્યાં સુધી નરસિમ્હન સીઈઓનું પદ સંભાળશે નહીં ત્યાં સુધી કંપનીનું નેતૃત્વ ચાલુ રાખશે.આ અગાઉ નરસિમ્હન પેપ્સીકોમાં પણ અનેક મહત્વના હોદ્દા પર કામ કરી ચૂક્યાં છે. તેઓ પેપ્સિકોમાં ગ્લોબલ ચીફ કોમર્શિયલ ઓફિસર પણ હતા. તેમણે કંપનીના લેટિન અમેરિકા, યુરોપ અને સબ-સહારન આફ્રિકાન કારોબારના સીઈઓ તરીકે પણ સેવા આપી હતી. નરસિમ્હને કન્સલ્ટિંગ ફર્મ મેકકિન્સે એન્ડ કંપનીમાં સીનિયર પાર્ટનર તરીકે પણ સેવા આપી છે.મહામુસીબતે ફરી પાટે ચઢી રહેલ કોફી ચેઈન-સ્ટારબક્સને ફરી કોરોનાએ ફટકો માર્યો હતો. અમેરિકામાં કંપનીના લગભગ 200 સ્ટોર્સમાં કર્મચારીઓ વધતી જતી મોંઘવારીને અનુરૂપ વધુ સારા લાભો અને વેતનની માંગ સાથે યુનિયનો બનાવી રહ્યા છે. કંપની માટે ચીન પણ સૌથી મોટું વિદેશી બજાર છે.

વર્જિન એટલાન્ટિકે ભારતની સૌથી મોટી એરલાઇન ઇન્ડિગો સાથે બુધવારે કોડશેર એગ્રીમેન્ટ કર્યા છે. આ સમજૂતિ હેઠળની ફ્લાઇટ્સ 27 સપ્ટેમ્બરથી ચાલુ થશે. ભારતની કંપની સાથે રિચાર્ડ બ્રેન્સને પ્રમોટ કરેલી કંપનીએ કરેલી આ સૌથી મોટી એગ્રીમેન્ટ પૈકીની એક છે.આ એગ્રીમેન્ટથી બંને એરલાઇન્સ એકબીજાની ફ્લાઇટની સીટનું વેચાણ કરી શકશે. ઇન્ડિગો-વર્જિન એટલાન્ટિકની ભાગીદારી હેઠળના પ્રારંભિક કોડશેર ડેસ્ટિનેશનમાં ચેન્નાઇ, બેંગલુરુ, હૈદરાબાદ, કોલકતા, અમદાવાદ, અમૃતસર, ગોવા, દિલ્હી અને મુંબઈનો સમાવેશ થાય છે. આ સમજૂતી હેઠળ કોચી, ચંદીગઢ, જયપુર, પૂણે, કોઇમ્બતુર, નાગપુર, વડોદરા, ઇન્દોર અને વિશાખાપટ્ટનમને પછીથી આવરી લેવામાં આવશે.

ટાટા સન્સના ભૂતપૂર્વ ચેરમેન સાયરસ મિસ્ત્રીનું મુંબઈ નજીકના પાલઘર જિલ્લામાં રોડ એક્સિડન્ટમાં રવિવાર, 4 સપ્ટેમ્બરે અવસાન થયું હતું. દુર્ઘટના પછી 54 વર્ષના સાયરસ મિસ્ત્રીને હોસ્પિટલ લઈ જવાયા કે જ્યાં તેઓને મૃત જાહેર કરાયા હતા. ગાડીમાં કુલ 4 લોકો સવાર હતા જેમાં સાયરસ મિસ્ત્રી સહિત 2નાં મોત થયા હતા. સાયરસ મિસ્ત્રી અમદાવાદથી મુંબઈ જઈ રહ્યાં હતા ત્યારે મર્સિડીઝ કાર ડિવાઈડર સાથે અથડાઈ હતી.સાયરસ મિસ્ત્રીની અચાનક ચિરવિદાયથી વડાપ્રધાન નરેન્દ્ર મોદી તથા ઉદ્યોગ જગતના વડાઓએ ઊંડા શોક અને દુખની લાગણી વ્યક્ત કરી હતી. પોલીસે જણાવ્યું કે એક્સિડેન્ટની જાણકારી મળતાં જ મિસ્ત્રી સહિત તમામ ઈજાગ્રસ્તોને હોસ્પિટલ લઈ જવામાં આવ્યા હતા, પરંતુ ત્યાં બે લોકોને મૃત જાહેર કરવામાં આવ્યા હતા.

67મા ફિલ્મફેર એવોર્ડ્સ જાહેરઃ ‘સરદાર ઉધમ’ને 7 એવોર્ડસ, ‘શેરશાહ’ શ્રેષ્ઠ ફિલ્મ

મુંબઈમાં 30 ઓગસ્ટની સાંજે 67મા ફિલ્મફેર અવોર્ડ સમારંભમાં સિદ્ધાર્થ મલ્હોત્રા અને કિયારા અડવાણીની ફિલ્મ ‘શેરશાહ’ને બેસ્ટ ફિલ્મ (પોપ્યુલર) અવોર્ડ મળ્યો હતો. 67મા ફિલ્મફેર અવોર્ડના હોસ્ટ રણવીર સિંહ અને વિકી કૌશલ સહિતના એક્ટર હાજર રહ્યાં હતા. વિવિધ સેલિબ્રિટીઝ ઉપરાંત ફિલ્મફેર અવોર્ડમાં મહારાષ્ટ્રના નાયબ મુખ્યપ્રધાન દેવેન્દ્ર ફડણવીસ પણ ઉપસ્થિત રહ્યા હતા. બે વર્ષ પછી ફિલ્મફેર અવોર્ડનો સમારંભ યોજાયો હતો.

હું લાગણીશીલ વ્યક્તિ છુંઃ નેહા કક્કર

જાણીતી ગાયિકા નેહા કક્કરે તેની ગાયકીના કારણે બોલીવૂડમાં પોતાનું સ્થાન જમાવ્યું છે. તે ઘણા સમયથી રિયાલિટી શો- ઈન્ડિયન આઈડલમાં જ્યૂરીની ભૂમિકા ભજવે છે. તે ઘણીવાર શોમાં ભાગ લઇ રહેલા લોકોના દુઃખદ કિસ્સા સાંભળીને વ્યથિત થઇ જાય છે અને આવા એપિસોડ જોઇને દર્શકો પણ તેના પ્રત્યે લાગણી દર્શાવે છે. બીજી બાજુ, તેની આવી ટેવના કારણે તેને ઘણીવાર ટ્રોલ પણ થવું પડ્યું છે અને તેના અનેક મીમ્સ સોશિયલ મીડિયા પર પણ વાઇરલ થાય છે.

આમિરે સ્વીકારી ફિલ્મની નિષ્ફળતાની જવાબદારી

બોલીવૂડમાં આમિરખાનની ગણના એક જવાબદાર અભિનેતા તરીકે થાય છે. ચાર વર્ષ પછી તેની ફિલ્મ લાલસિંહ ચઢ્ઢા સિનેમાહોલમાં દર્શાવવામાં આવી હતી. પરંતુ કરિના કપૂર સાથેની તેની આ ફિલ્મ ઘણી ખરાબ રીતે નિષ્ફળ ગઇ છે. કોઇ વિચારી પણ ન શકે કે આમિરખાનની ફિલ્મ સાથે પણ આવું થઇ શકે. હવે એવું કહેવાય છે કે, ફિલ્મની નિષ્ફળતાની જવાબદારી ખુદ આમિરખાને લીધી છે. આ ફિલ્મના નિર્માતાઓને વધુ આર્થિક નુકસાન ન જાય તે માટે તેણે આ ફિલ્મની ફી લેવાની પણ ના કહી છે. સૂત્રો કહે છે કે, જો આમિરખાન પોતાની ફી લે તો વાયાકોમ 18 સ્ટુડિયોનેે અંદાજે રૂ. 100 કરોડાનું નુકસાન થશે. તેવામાં આમીર આગળ આવ્યો છે અને જાતે જ આ નુકસાનને સહન કરવાનો નિર્ણય લીધો છે.

મની લોન્ડરિંગ કેસમાં જેકલીન ફર્નાન્ડીસને કોર્ટનું સમન્સ

મહાઠગ સુકેશ ચંદ્રશેખર સાથે સંબંધિત મની લોન્ડરિંગ કેસમાં દિલ્હીની પટિયાલા હાઉસ કોર્ટે બુધવારે બોલિવૂડ અભિનેત્રી જેકલીન ફર્નાન્ડીઝને સમન્સ પાઠવીને 26 સપ્ટેમ્બરે હાજર થવાનો આદેશ આપ્યો છે. કોર્ટે આ સાથે એન્ફોર્સમેન્ટ ડિરેક્ટોરેટ (ED)ને જેકલીનના વકીલને ચાર્જશીટની કોપી સોંપવાનો આદેશ કર્યો હતો.