એશિયાના સૌથી ધનાઢ્ય વ્યક્તિ ગૌતમ અદાણી અને તેમના પરિવારે ગૌતમ અદાણીના 60મા જન્મદિવસ નિમિત્તે સામાજિક સેવાના કાર્યો માટે 7.7 બિલિયન ડોલર (આશરે રૂ.60,000 કરોડ)નું દાન આપવાની પ્રતિબદ્ધતા વ્યક્ત કરી છે. ગૌતમ અદાણીના 24 જુને 60માં જન્મદિન નિમિતે આ જાહેરાત કરવામાં આવી હતી. બ્લૂમબર્ગ બિલિયોનેર ઇન્ડેક્સ મુજબ ગૌતમ અદાણીની કુલ સંપત્તિ આશરે 92 બિલિયન ડોલર છે. આ ભંડોળનું સંચાલન અદાણી ફાઉન્ડેશન દ્વારા કરવામાં આવશે અને તે આરોગ્ય, શિક્ષણ અને સ્કીલ ડેવલપમેન્ટને પ્રોત્સાહન આપવા જેવા સામાજિક કામગીરી પાછળ ખર્ચવાનો નિર્ધાર કરવામાં આવ્યો છે. અદાણી ગ્રૂપે જણાવ્યું કે, “ભારતીય કોર્પોરેટ સેક્ટરના ઈતિહાસમાં કોઇ ફાઉન્ડેશન તરફથી અત્યાર સુધીનું આ સૌથી મોટું દાન છે. ઉપરાંત ગૌત્તમ અદાણીના પિતા શાંતિલાલ અદાણીની જન્મ શતાબ્દી વર્ષને ધ્યાનમાં રાખીને પણ આ સખાવત કામગીરી હાથ ધરાવામાં આવી છે.

તીવ્ર નાણાભીડનો સામનો કરી રહેલા પાકિસ્તાને 6 બિલિયન ડોલરના સહાય પેકેજને ફરી ચાલુ કરવા માટે આખરે ઇન્ટરનેશનલ મોનેટરી ફંડ (આઇએમએફ) સાથે ડીલ કરી છે. તેનાથી બીજા આંતરરાષ્ટ્રીય સ્રોત મારફત પણ ફાઇનાન્સિંગના દ્વાર ખુલશે, એમ બુધવારે મીડિયા અહેવાલમાં જણાવાયું હતું. કરો યા મરોની આ ડીલ મંગળવારની રાત્રે થઈ હતી. આઇએમએફ સ્ટાફ મિશન અને પાકિસ્તાનની ટીમ 2022-23ના બજેટ અંગે સંમત થયા બાદ આ ડીલ થઈ હતી.આ ડીલ મુજબ પાકિસ્તાનની સરકારે ટેક્સ મારફત વધુ રૂ.43,600 કરોડ ઊભા કરવા પડશે. આ ઉપરાંત પેટ્રોલિયમ ટેક્સને વધારીને ધીમે ધીમે લિટર દીઠ રૂ.50 કરવો પડશે, એમ ડોન વર્તમાનપત્રના અહેવાલમાં જણાવાયું હતું. એક્સ્ટેન્ડેડ ફંડ ફેસિલિટી પેકેજ માટે જુલાઈ 2019માં સમજૂતી થઈ હતી અને તે 39 મહિના માટે હતું. આ રાહત પેકેજ ફરી ચાલુ થયું હોવાથી પાકિસ્તાનને તાકીદે એક બિલિયન ડોલરની સહાય મળશે. પાકિસ્તાનને તેની ઘટતી જતી ફોરેક્સ રિઝર્વને મજબૂત કરવા માટે તાકીદે વિદેશી નાણાની જરૂર છે.

ભારતના નાગરિક ઉડ્ડયન ક્ષેત્રમાં આગામી મહિનાથી વધુ એક નવી એરલાઈન કંપની એન્ટ્રી લેવા જઈ રહી છે. શેરબજારના જાણીતા રોકાણકાર રાકેશ ઝુનઝુનવાલાના રોકાણવાળી આકાશા એર કંપનીની પહેલી ફ્લાઈટ જુલાઈ મહિનામાં ઉડાન ભરે તેવી સંભાવના છે. કંપનીને તેના પહેલા એરક્રાફ્ટની ડિલિવરી મળી ગઈ છે. આકાશા એર કંપનીએ બોઈંગ કંપનીને 737 મેક્સ પ્રકારના 72 વિમાનોનો ઓર્ડર આપ્યો છે. આ પૈકી પહેલુ વિમાન ભારત આવી પહોંચ્યુ હતું. આમ આકાશા એર હવે એર ઓપરેટર પરમિટ મેળવવાની નજીક પહોંચી ગઈ છે. કંપનીનું કહેવું છે કે, પહેલુ એરક્રાફ્ટ સમય પહેલા જ ભારત આવી ગયુ છે અને ભારતીય એવિએશન સેક્ટરમાં અમે દેશની સૌથી વિશ્વસનિય અને સસ્તી સેવા પુરી પાડવા માટે કટિબધ્ધ છે. ભારત દુનિયાની સૌથી ઝડપથી વિકસતી ઈકોનોમી પૈકી એક છે. કંપની જુલાઈ મહિનાથી ફ્લાઈટ શરૂ કરવા માટેની યોજના બનાવી રહી છે. કંપનીને ક્યૂપી કોડ આપવામાં આવ્યો છે.

ભારતના ટોચના ઉદ્યોગપતિ પાલોનજી મિસ્ત્રીનું ગત સોમવારે રાત્રે 93 વર્ષની વયે મુંબઈ ખાતે તેમના નિવાસસ્થાને અવસાન થયું હતું. તેઓ શાપૂરજી પાલોનજી ગ્રુપના ચેરમેન હતા અને હંમેશા લાઇમલાઇટથી દુર રહેવાનું પસંદ કરતા હતા. તેમને સૌથી અમીર પારસી વ્યક્તિ પણ ગણવામાં આવતા હતા. 150 વર્ષથી વધુ જૂની કંપની શાપૂરજી પાલોનજી ગ્રુપની સફળતાનો શ્રેય પાલોનજી મિસ્ત્રીને આપવામાં આવે છે. આશરે 50 દેશોમાં પથરાયેલા તેમના ઔદ્યોગિક સામ્રાજ્યમાં 50,000થી વધુ કર્મચારીઓ કામ કરે છે. પાલોનજી મિસ્ત્રીનો જન્મ વર્ષ 1929માં ગુજરાતના પારસી પરિવારમાં થયો હતો. પાલોનજી મિસ્ત્રીએ એક આઇરિશ મહિલા પેટ્સી પેરિન દુબાશ સાથે લગ્ન કર્યા હતા અને તે પછી તેઓ આયર્લેન્ડના નાગરિક બન્યા હતા. જોકે, એ પછી પણ તેઓ મોટાભાગનો સમય ભારતમાં જ રહ્યા હતા. પાલોનજીના મોટા પુત્ર શાપોરજી મિસ્ત્રી હાલમાં તેમના પિતાના વારસાને આગળ વધારી રહ્યા છે. પાલોનજી મિસ્ત્રીના નાના પુત્ર સાયરસ મિસ્ત્રી ટાટા જૂથ સાથેના તેમના વિવાદોને કારણે ચર્ચામાં આવ્યા હતા. સાયરસ મિસ્ત્રી 2012 થી 2016 સુધી ટાટા સન્સના ચેરમેન હતા.

અક્ષયકુમારે ફિલ્મની ફી ઘટાડી ?

બોલીવૂડમાં એવું કહેવાય છે કે, ફિલ્મને સુપરહિટ બનાવવી હોય તો અક્ષયકુમારને મુખ્ય રોલ આપવો પડે. પરંતુ તાજેતરમાં અક્ષયકુમારની સતત બે ફિલ્મો ફ્લોપ પુરવાર થઈ છે. એક સમયે ખૂબ સરળતાથી અક્ષયની ફિલ્મો 100 કરોડની ક્લબમાં આવી જતી હતી. જોકે, કોરોના પછી સમય પલટાયો છે અને અક્ષયની ફિલ્મોને બજેટ જેટલું કલેક્શન મેળવવામાં પણ ખૂબ મુશ્કેલી પડે છે. કોરોના પછી સૂર્યવંશી હિટ રહી હતી, પરંતુ તે સિવાયની બે ફિલ્મો ખાસ આકર્ષણ ઊભું કરી શકી નથી. આથી અક્ષયકુમારને ફીમાં ઘટાડો કરવાની ફરજ પડી છે તેવી ચર્ચા બોલીવૂડમાં થઇ રહી છે. તેની બચ્ચન પાંડે અને સમ્રાટ પૃથ્વીરાજ બિગ બજેટ ફિલ્મો હતી, પરંતુ તેનું કલેક્શન નિરાશાજનક રહ્યું હતું. આ બંને ફિલ્મો થીયેટરમાં બે વીક પણ ટકી શકી ન હતી. આ બંને ફિલ્મો ફ્લોપ જતાં એ સ્પષ્ટ થયું છે કે, અક્ષય કુમારની લોકપ્રિયતા પણ ઘટી છે. જેના કારણે અક્ષય કુમારે પોતાની ફીમાં ઘટાડો કરવાનો નિર્ણય કર્યો હોવાનું સૂત્રો જણાવે છે.

શાહરુખ-કાજોલ પણ રીયાલિટી શોમાં

વર્તમાન સમયમાં ટેલિવિઝન શોમાં આવવા માટે બોલીવૂડના મોટા સ્ટાર્સને પણ ઘેલું લાગ્યું છે. સલમાનખાને બિગ બોસમાં હોસ્ટની જવાબદારી લીધી છે અને ઘણાં સ્ટાર્સ તેને ફોલો કરી રહ્યા છે. ઝલક દિખલા જા 10 અને ડીઆઈડી મોમ્સ જેવા શોમાં બોલિવૂડના એક્ટર્સ જજ તરીકે જોવા મળશે. કેટલાક સ્ટાર્સ પહેલેથી રિયાલિટી શોને જજ કરી રહ્યા છે અને હવે આ યાદીમાં નવા નામનો ઉમેરો થશે. કોરોનાકાળમાં વેબસિરિઝ ખૂબ જ લોકપ્રિય બની છે અને તેના પડકારો સ્વીકારવા માટે ટેલિવિઝન જગત પણ તૈયાર છે. ઓટીટી પર જે રીતે મોટા સ્ટાર્સ પદાર્પણ કરી રહ્યાં છે, તે રીતે હવે ટીવીના પડદે પણ લોકપ્રિય સ્ટાર્સની એન્ટ્રી થશે. ઘણા સમયથી ફિલ્મોમાંથી બહાર રહેલા કાજોલ પણ હવે ટીવી શોમાં એન્ટ્રી કરવા તૈયાર છે. રિપોર્ટ્સ મુજબ, ઝલક દિખલા જા 10ને કાજોલ જજ કરવાની છે. કાજોલની જેમ શાહરૂખ ખાન પણ ઝલક દિખલા જા 10માં જજ તરીકે જોવા મળે તેવી શક્યતા છે.

નવા ક્ષેત્રમાં નસીબ અજમાવશે મલાઈકા

ફિલ્મ, મોડેલીંગ, ડાન્સર અને રિયાલિટી ટીવી શો જજ જેવા અનેક ક્ષેત્રોમાં પોતાનું નસીબ અજમાવનાર મલાઈકા અરોરાએ હવે વધુ એક ક્ષેત્રમાં પદાર્પણ કરવાની તૈયારી કરી રહી છે. મલાઈકા હવે લેખિકા બનવાની છે અને તેણે તેના પ્રથમ પુસ્તક વિશે વાત કરી છે. મલાઈકાએ કહ્યું હતું કે, આ પુસ્તક ન્યૂટ્રિશન વિષય પર હશે અને તેમાં વેલનેસ માટે ટિપ્સ અપાશે. ઘણા લોકો માટે મલાઇકા વર્ષોથી ફિટનેસ આઇકોન છે. સોશિયલ મીડિયા પર તેના વર્કઆઉટ કરતાં ફોટોગ્રાફ્સ-વીડિયો ઝડપથી વાઈરલ થાય છે. મલાઈકાના ફિટનેસ રૂટિન વિશે જાણવા ફેન્સ હંમેશા ઉત્સુક રહે છે અને તેથી જ મોટી ફિટનેસ બ્રાન્ડ-પ્રોજેક્ટ્સ મલાઈકા સાથે જોડાતી હોય છે. મલાઈકા યોગા સ્ટુડિયો પણ ચલાવે છે અને ડેઈલી યોગા પ્રેક્ટિસ પણ કરે છે. આ પુસ્તકમાં મલાઈકા પોતાના ડેઈલી ફૂડ વિશે વાત કરશે. આ ઉપરાંત મહત્ત્વના ફૂડ ટોપિક્સ ડિસ્કસ કરશે. ખોરાક અને તેની મદદથી સ્વસ્થ રહેવાની સાથે કુપોષણનો ભોગ નહીં બનવા માટેની સમગ્ર પ્રક્રિયા મલાઈકા રજૂ કરશે.

ધાકડઃ ખર્ચ 85 કરોડ અને આવક 2.58 કરોડ

કંગના રણોત અભિનિત ફિલ્મ ધાકડ બોક્સ ઓફિસ સુપર ફ્લોપ ગઇ છે. તેનું નિર્માણ રૂ. 85 કરોડ થયું હતું અને તેની તમામ પ્રકારની આવક ફક્ત રૂ. 2.58 કરોડ થઇ છે. આથી નિર્માતાઓને રૂ. 78 કરોડ ખૂબ જ મોટું નુકસાન ગયું હોવાનો અંદાજ છે. ફિલ્મના મેકર્સે ડિજિટલ અને સેટેલાઈટ રાઈટ્સ રિલીઝ પહેલા વેચ્યા ન હતા. બોક્સ ઓફિસ પર ફિલ્મનું પરફોર્મન્સ જોતાં આ બંને રાઈટ્સ પણ ખૂબ જ ઓછા ભાવે વેચવા પડશે તેવી સ્થિતિ ઊભી થઇ છે. થીયેટરમાં ફિલ્મને મળેલા રિસ્પોન્સને જોતાં ધાકડના ડિજિટલ અને સેટેલાઈટ રાઈટ્સ માંડ પાંચ કરોડમાં વેચાય તેવી શક્યતા છે. આથી તેને જોતાં પ્રોડ્યુસર્સને એકંદરે 78 કરોડનું નુકસાન વેઠવું પડે તેવું બોલીવૂડના લોકો માની રહ્યા છે.