બિલિયોનેર મુકેશ અંબાણીની કંપની રિલાયન્સ ઈન્ડસ્ટ્રીઝ અને અમેરિકાના પ્રાઈવેટ ઈક્વિટી(PE) ફંડ એપોલો ગ્લોબલ મેનેજમેન્ટે યુકેની કેમિસ્ટ ચેઈન કંપની બૂટ્સને ખરીદવા માટે 5 બિલિયન પાઉન્ડ (અંદાજે રૂ.500 અબજ)ની બંધનકર્તા બિડ કરી હોવાનું જાણવા મળ્યું છે. બૂટ્સની પેરેન્ટ કંપની અમેરિકા સ્થિત વોલગ્રીન્સ બૂટ્સ એલાયન્સ (WBA) લઘુમતી હિસ્સો જાળવી રાખશે. જોકે આ અહેવાલ અંગે રિલાયન્સ કે બૂટ્સ તરફ કોઇ ટીપ્પણી થઈ ન હતી. સૂત્રોએ કહ્યું હતું કે રિલાયન્સ અને એપોલો સંયુક્ત રીતે મળીને કેટલો હિસ્સો ખરીદી રહ્યા છે તે સ્પષ્ટ થયું ન હતું. રિલાયન્સ આ એક્વિઝિશન મારફતે ફાર્મસી અને બ્યૂટી રિટેલિંગમાં ઉમેરો કરશે અને તેના રિટેલ બિઝનેસને આગળ ધપાવશે. તે ભારતમાં બૂટ્સનો વ્યાપ વધારશે. રિલાયન્સે આ અંગે મોકલાયેલા ઈ-મેલનો તાત્કાલિક કોઈ પ્રતિસાદ આપ્યો ન હતો.

ભારતના વડાપ્રધાન નરેન્દ્ર મોદીએ સોમવારે ભારપૂર્વક જણાવ્યું હતું કે, ભારતીય બેન્કો અને ચલણને વૈશ્વિક વેપાર અને સપ્લાય ચેઇનનો મહત્વનો ભાગ બનાવવાની જરૂર છે. તેમણે નાણાસંસ્થાઓને ફાઇનાન્શિયલ અને કોર્પોરેટ ગવર્નન્સની ઉત્તમ પ્રણાલી માટે પ્રોત્સાહન ચાલુ રાખવા જણાવ્યું છે. ‘આઝાદી કા અમૃત મહોત્સવ’ના ભાગરૂપે નાણા મંત્રાલય અને કંપની બાબતોના મંત્રાલય દ્વારા આયોજિત સપ્તાહની ઉજવણીનું ઉદઘાટન કરતા વડાપ્રધાને જણાવ્યું હતું કે, “આપણી સ્થાનિક બેન્કો અને ચલણને વૈશ્વિક વેપાર અને સપ્લાય ચેઇનનો મહત્વનો ભાગ કેવી રીતે બનાવવો એ મુદ્દા પર ધ્યાન કેન્દ્રિત કરવું જરૂરી છે.” તેમણે જણાવ્યું હતું કે, “આપણે છેલ્લા આઠ વર્ષમાં દર્શાવ્યું છે કે ભારત સંયુક્ત રીતે કશું કરવાનો નિર્ણય કરે તો એ વિશ્વ માટે નવી આશા બને છે. આજે વિશ્વ આપણને માત્ર એક મોટા બજાર તરીકે નહીં, પણ સક્ષમ, ગેમ-ચેન્જિંગ, કુશળ, રચનાત્મક ઇકોસિસ્ટમ તરીકે જોઇ રહ્યું છે.”

ફુગાવામાં વધારો, સપ્લાય ચેઇનના અવરોધ અને ભૂરાજકીય તંગદિલીની વચ્ચે વર્લ્ડ બેન્કે ચાલુ નાણાકીય વર્ષ માટે ભારતના આર્થિક વૃદ્ધિરના અંદાજને મંગળવારે ઘટાડીને 7.5 ટકા કર્યો છે. 2022-23ના નાણાકીય વર્ષ માટે વર્લ્ડ બેન્કે ભારતની જીડીપીની વૃદ્ધિના અંદાજમાં ઘટાડો કર્યો હોય તેવું આ બીજી વખત બન્યું છે. આમ આ વૈશ્વિક નાણાસંસ્થાએ ભારતની જીડીપી વૃદ્ધિના અંદાજમાં ચાલુ વર્ષે 1.2 ટકાનો ધરખમ કાપ મૂક્યો છે. અગાઉ એપ્રિલમાં વર્લ્ડ બેન્કે ભારતની આર્થિક વૃદ્ધિ અંગેના તેના અંદાજને 8.7 ટકાથી ઘટાડીને સીધો 8 ટકા કર્યો હતો અને હવે તેને ચાલુ વર્ષે ભારતની જીડીપીમાં 7.5 ટકા વૃદ્ધિનો અંદાજ છે. ભારતે અગાઉના નાણાકીય વર્ષ એટલે કે 2022-12માં જીડીપીમાં 8.7 ટકાની મજબૂત વૃદ્ધિ નોંધાવી હતી. ગ્લોબલ ઇકોનોમિક પ્રોસ્પેક્ટ્સ અંગેના તાજા રીપોર્ટમાં વર્લ્ડ બેન્કે જણાવ્યું છે કે 2022-23ના વર્ષમાં ભારતનો જીડીપી વૃદ્ધિદર 7.5 ટકા રહેવાનો અંદાજ છે.

ડોલર સામે રૂપિયાના મૂલ્યમાં ધોવાણ, સુધારા અને વધુ સારા વળતરને પગલે ભારતના રિયલ એસ્ટેટ ક્ષેત્રમાં બિનનિવાસી ભારતીય (એનઆરઆઇ)ના રસમાં વધારો થઈ રહ્યો છે. એનઆરઆઇએ મકાન કે કોમર્શિયલ સ્પેસની ખરીદી વધારી દીધી છે. રિયલ્ટીમાં NRIના નવા રસ માટે બે-ત્રણ કારણો જવાબદાર છે. એક તરફ ડોલર સામે રૂપિયો ઘસાઈ રહ્યો છે, જેના કારણે તેઓ ઓછા ડોલર ખર્ચીને વધારે સારી પ્રોપર્ટી મેળવી શકે છે. આ ઉપરાંત વિશ્વભરમાં વ્યાજના દર પણ હવે ધીમે ધીમે વધી રહ્યા હોવાથી NRI માટે ભારતના રિયલ એસ્ટેટમાં વધારે તક છે. જાણકારોના કહેવા પ્રમાણે મિડ-ઇન્કમ પ્રોજેક્ટથી લઈને પ્રીમિયમ અને લક્ઝરી સેગમેન્ટમાં NRI દ્વારા ખરીદીમાં વધારો થયો છે. 2022માં અત્યાર સુધીમાં અમેરિકન ડોલર સામે ભારતીય રૂપિયાની વેલ્યૂમાં 5.2 ટકા જેટલો ઘટાડો થયો છે. રિયલ એસ્ટેટ ક્ષેત્રના હીરાનંદાણી ગ્રૂપના મેનેજિંગ ડિરેક્ટર અને રિયલ એસ્ટેટ ઉદ્યોગની સંગઠન NAREDCOના વાઈસ ચેરમેન નિરંજન હીરાનંદાણીએ જણાવ્યું કે સમગ્ર વિશ્વમાં ઈકોનોમિક સ્થિતિ એવી છે કે તેણે એક ચેલેન્જ પેદા કરી છે. આવામાં ભારતીય રિયલ એસ્ટેટ ઉદ્યોગ ગ્રોથની તક આપે છે.

સલમાનની ફિલ્મમાં એક્શન દૃશ્યો માટે 40 કરોડનો ખર્ચ

દર વર્ષે ઈદ પર ફિલ્મ રિલિઝ કરવાની પરંપરા સલમાન ખાને આ વર્ષે તોડી હતી. અંતિમ પછી સલમાનની કોઈ ફિલ્મ આવી નથી. અત્યારે સલમાન ખાન ટાઈગર 3 અને કભી ઈદ કભી દિવાલીના શૂટિંગમાં બિઝી છે. દર્શકોને એક્શન દૃશ્યોની મજા કરાવવા પ્રોડ્યુસર્સ વધુ નાણા ખર્ચવા માટે તૈયાર થયા છે. આ ફિલ્મમાં સલમાન અને ઈમરાન હાશ્મીના એક એક્શન સીક્વન્સ માટે 40 કરોડનો ખર્ચ કરવામાં આવશે. ટાઈગર 3માં સલમાનની સાથે કેટરિના અને ઈમરાન હાશ્મી મુખ્ય ભૂમિકામાં છે. ઈમરાન હાશ્મી વિલનનો રોલ કરી રહ્યા છે. ફિલ્મમાં સલમાન અને ઈમરાન વચ્ચે દિલધડક એક્શન દૃશ્યો જોવા મળશે. આ અંગે ફિલ્મ સમીક્ષક ઉમૈર સંધૂએ ટ્વિટર પર પોસ્ટ મૂકી હતી કે, ટાઈગર 3ના ક્લાઈમેક્સમાં સલમાન અને ઈમરાન હાશ્મી વચ્ચેનો એક્શન સીન ખૂબ સ્પેશિયલ હશે. તેના માટે યશરાજ બેનર દ્વારા 40 કરોડનો ખર્ચ કરવામાં આવશે. આ એક્શન સીન તૂર્કીમાં શૂટ થશે.સલમાનનો હવે ટૂંક સમયમાં કભી ઈદ કભી દિવાલીના શીડ્યુલ માટે હૈદરાબાદ જવાનો પ્લાન છે.

‘ધાકડ’ની નિષ્ફળતા માટે કંગનાએ મૌન તોડ્યું

કંગના રનોતનું કહેવું છે કે તેણે બોલીવૂડમાં ઘણી નકારાત્મકતા જોઈ છે, પરંતુ 2022નું વર્ષ તેના માટે બ્લૉકબસ્ટર છે. ૨૦ મેએ રિલીઝ થયેલી તેની ‘ધાકડ’ બોક્સ-ઓફિસ પર સુપર ફ્લોપ ગઇ હતી. રિલીઝના થોડા દિવસોમાં જ ફિલ્મના શો બંધ થઈ ગયા છે. ફિલ્મ લોકોને પસંદ નથી આવી. તેની પાસે ‘તેજસ’, ‘સીતા: ધ ઇન્કાર્નેશન’ અને ‘મણિકર્ણિકા : ધ લેજન્ડ ઓફ દીદ્દા’ જેવી ફિલ્મો છે. ‘ધાકડ’ની નિષ્ફળતા અંગે તેણે મૌન તોડ્યું છે. તેણે ઇન્સ્ટાગ્રામ પર એક સ્ટોરી પોસ્ટ કરીને જણાવ્યું હતું કે ‘2019માં મારી ‘મણિકર્ણિકા : ધ ક્વીન ઑફ ઝાંસી’એ 160 કરોડનો બિઝનેસ કર્યો હતો. એ સુપરહિટ ફિલ્મ હતી. 2020 તો કોવિડનું વર્ષ હતું, 2021માં મારી કરીઅરની સૌથી મોટી ફિલ્મ ‘થલાઇવી’ ડિજિટલ પ્લૅટફૉર્મ પર આવી હતી અને એ પણ ખૂબ સફળ થઈ હતી. મેં ઘણીબધી ક્યુરેટેડ નેગેટિવિટી જોઈ છે, પરંતુ 2022નું વર્ષ બ્લૉકબસ્ટર છે, કેમ કે ‘લૉક અપ’ને હોસ્ટ કર્યો હતો અને હજી વર્ષ પૂરું નથી થયું.

ગોવિંદાનું સ્ટારડમ બપ્પીદાને આભારી

એક જમાનાના ચોકલેટી હીરો અને ભૂતપૂર્વ સાંસદ ગોવિંદાનું કહેવું છે કે, તે આજે સ્ટાર છે તો તેનો શ્રેય સ્વ. બપ્પી લાહિરીને જાય છે. ગોવિંદા તાજેતરમાં જ સોની ટીવી પર આવતા ‘સુપરસ્ટાર સિંગર 2’માં જોવા મળ્યો હતો. આ શોમાં ગોવિંદા અને ચંકી સ્પેશ્યલ એપિસોડ બનાવવામાં આવ્યો છે. ગોવિંદા અને ચંકી પાન્ડેએ એક-એકથી ચડિયાતા પર્ફોર્મન્સની મજા માણી હતી. રિતુરાજ અને હર્ષિતાએ ‘ઓ લાલ દુપટ્ટે વાલી’ ગીત પર પર્ફોર્મ કર્યું હતું. આ ગીત સાંભળીને પહેલાંના સમયને યાદ કરતાં ગોવિંદાએ કહ્યું કે ‘હું ‘સુપરસ્ટાર સિંગર 2’ના સ્ટેજનો ઉપયોગ સ્વર્ગીય બપ્પીદાનો આભાર માનવા માટે કરી રહ્યો છું, કારણ કે તેમના વગર મારી સફર શક્ય નહોતી. હું આજે જે ગોવિંદા છું એ તેમનાં ગીતોને કારણે છું અને એથી હું હંમેશાં માટે તેમનો આભારી રહીશ.

એકતા કપૂર કેમ અપરિણીત છે?

પીઢ અભિનેતા જિતેન્દ્ર અને શોભા કપૂરની પુત્રી એકતા કપૂર ભારતમાં ‘ટેલિવિઝન ક્વીન’ના નામથી ઓળખાય છે. ગત સપ્તાહે તેણે પોતાનો 47 મો જન્મ દિન ઉજવ્યો હતો. એકતા કપૂરનો જન્મ 7 જૂન 1975માં થયો હતો. અંદાજે 25 વર્ષ પહેલા તેણે ‘માનો યા ન માનો’ સીરિયલથી ટેલિવિઝનની દુનિયામાં એન્ટ્રી કરી હતી અને ત્યારથી અત્યાર સુધી તે અનેક સુપરહિટ શો આપી ચુકી છે. તેણે પોતાના કરિયરની શરૂઆત 15 વર્ષની ઉંમરે એડ અને ફીચર ફિલ્મ નિર્માતા કૈલાસ સુરેન્દ્રનાથ સાથે કરી હતી. તેને ફિલ્મ નિર્માણમાં ખૂબ જ રસ હતો આથી તેણે નિર્માતા બનવાનો નિર્ણય લીધો હતો. ટેલીવિઝન અને ફિલ્મ નિર્માતા, નિર્દેશક એવી એકતાએ 1994માં બાલાજી ટેલીફિલ્મસ લિમિટેડની સ્થાપના કરી હતી જેની તે જોઈન્ટ મેનેજિંગ ડિરેક્ટર અને ક્રિએટીવ હેડ છે.