નાણાકીય વર્ષ ૨૦૨૧-૨૨માં અમેરિકા ભારતના સૌથી મોટા વેપાર ભાગીદાર તરીકે ઉભરી આવ્યું છે. અમેરિકાએ ચીનને પછાડીને આ સ્થાન હાંસલ કર્યું છે. ભારતના વાણિજ્ય મંત્રાલયના ડેટા અનુસાર ૨૦૨૧-૨૨માં અમેરિકા અને ભારતનો દ્વિપક્ષીય વેપાર વધીને ૧૧૯.૪૨ બિલિયન ડોલર થયો હતો. એક વર્ષ અગાઉ ૨૦૨૦-૨૧માં આ આંકડો ૮૦.૫૧ બિલિયન ડોલર હતો. સત્તાવાર ડેટા અનુસાર ૨૦૨૧-૨૨માં યુએસમાં ભારતની નિકાસ વધીને ૭૬.૧૧ બિલિયન ડોલર થઈ છે, જે અગાઉના નાણાકીય વર્ષમાં ૫૧.૬૨ બિલિયન ડોલર હતી.આની સામેઆ સમયગાળા દરમિયાન યુએસથી ભારતની આયાત વધીને ૪૩.૩૧ બિલિયન ડોલર થઈ હતી જે અગાઉના નાણાકીય વર્ષમાં ૨૯ બિલિયન ડોલર હતી.સરકારી આંકડા મુજબ ૨૦૨૧-૨૨માં ભારત-ચીનનો દ્વિપક્ષીય વેપાર ૧૧૫.૪૨બિલિયન ડોલર હતો

ગુજરાતના બે બિલિયોનેર્સ ઉદ્યોગપતિઓ મુકેશ અંબાણી અને ગૌતમ અદાણી વચ્ચે એશિયાના સૌથી ધનિક બનવાની સ્પર્ધા ચાલતી હોય તેવું લાગે છે. હવે અદાણી ગ્રૂપના ગૌતમ અદાણીને પાછળ રાખીને રિલાયન્સ ગ્રૂપના મુકેશ અંબાણી એશિયાના નંબર વન ધનિક બન્યા છે. બ્લૂમબર્ગના શુક્રવાર, 3 જૂનના અહેવાલ પ્રમાણે મુકેશ અંબાણીની નેટવર્થ 99.7 બિલિયન ડોલર થઈ છે, જ્યારે ગૌતમ અદાણીની નેટવર્થ 98.7 બિલિયન ડોલર થઈ છે. રિલાયન્સ ઇન્ડસ્ટ્રીઝના શેરમાં આવેલા ઉછાળા અને અદાણી જૂથના શેરોમાં થયેલા ઘટાડાના કારણે એશિયાના સૌથી મોટા અબજપતિઓના સ્થાન અદલાબદલી થઈ ગયા છે. મુકેશ અંબાણી હવે સમગ્ર એશિયામાં સૌથી ધનિક ઉદ્યોગપતિ છે જ્યારે ગૌતમ અદાણી બીજા ક્રમે આવી ગયા છે.રિલાયન્સના શેરમાં છેલ્લા બે અઠવાડિયામાં 14 ટકાનો વધારો થયો છે જ્યારે અદાણી જૂથના શેરો ઘટ્યા છે. ફોર્બ્સ રિયલ ટાઈમ બિલિયનર્સ લિસ્ટ પ્રમાણે મુકેશ અંબાણી સમગ્ર વિશ્વમાં છઠ્ઠા ક્રમે છે. તેમની સંપત્તિ 6.21 ટકા અથવા 6.1 અબજ ડોલરનો વધારો થયો છે અને 104.3 અબજ ડોલર થઈ છે.

ટાટા મોટર્સ લિમિટેડ અને ફોર્ડ ઇન્ડિયાએ ગુજરાતના સાણંદ ખાતેના ફોર્ડના પ્લાન્ટની ખરીદી માટે ગુજરાત સરકાર સાથે મંગળવાર 30 મેએ સમજૂતી કરી હતી. આ સમજૂતી હેઠળ ફોર્ડના સાણંદ પ્લાન્ટની તમામ જમીન, બિલ્ડિંગ અને વ્હિકલ એસેમ્બલી પ્લાન્ટ હવે ટાટા મોટર્સને સુપરત કરવામાં આવશે. ગુજરાતના મુખ્યપ્રધાન ભૂપેન્દ્ર પટેલની હાજરીમાં ગાંધીનગર ખાતે થયેલી સમજૂતી દરમિયાન ટાટા મોટર્સના શૈલેષ ચંદ્રા અને ફોર્ડ ઇન્ડિયાના ટ્રાન્સફોર્મેશન ઓફિસર અને કંટ્રી હેડ બાલા સુંદરમ હાજર રહ્યાં હતા. ગાંધીનગરમાં ગુજરાત સરકાર, ટાટા મોટર્સની પેટાકંપની ટાટા પેસેન્જર ઈલેક્ટ્રીક મોબિલિટી લિમિટેડ અને ફોર્ડ ઈન્ડિયા વચ્ચે ત્રિપક્ષીય સમજૂતી કરાર થયા હતા. ગુજરાત સરકારે 2011માં ફોર્ડ ઈન્ડિયા સાથે કરેલા સ્ટેટ સપોર્ટ એગ્રીમેન્ટ હેઠળ તથા ટાટા મોટર્સની પેટાકંપની ટાટા પેસેન્જર ઈલેક્ટ્રિક મોબિલિટી લિમિટેડ વચ્ચે થયેલી સમજૂતીના સંદર્ભમાં આ ત્રિપક્ષીય સમજૂતી કરાર કરવામાં આવ્યા છે.

ભારતનો જીડીપી વૃદ્ધિદર જાન્યુઆરી-માર્ચના ક્વાર્ટર (Q4)માં 4.1 ટકા રહ્યો હતો. સમગ્ર વર્ષ 2021-22નો જીડીપી ગ્રોથ 8.7 ટકા રહ્યો હતો.દુનિયાભરના દેશો યુક્રેન યુદ્ધ અને કોરોનાના મહામારીને કારણે આર્થિક વૃદ્ધિ માટે મુશ્કેલી અનુભવી રહ્યું છે ત્યારે ભારતે આ સૌથી ઝડપથી વૃદ્ધિ નોંધાવી છે. ગયા વર્ષના ચાર ક્વાર્ટર પૈકી ચોથા સૌથી નીચો ગ્રોથ જોવાયો છે. નેશનલ સ્ટેટિસ્ટિકલ ઓફિસ (NSO)એ મંગળવારે આ ડેટા જાહેર કર્યા હતા. અગાઉના વર્ષ 2020-21માં કોરોનાને કારણે જીડીપીમાં 6.6 ટકા નેગેટિવ ગ્રોથ જોવાયો હતો. એનએસઓના ડેટા અનુસાર વિતેલા વર્ષ 2021-22માં પ્રથમ ક્વાર્ટર (Q1)માં જીડીપી ગ્રોથ 20.1 ટકા રહ્યો હતો, Q2માં 8.4 ટકા, Q3માં 5.4 ટકા રહ્યો હતો. Q4માં સૌથી ઓછો 4.1 ટકા ગ્રોથ જોવાયો છે. અગાઉના વર્ષે Q4માં 2.5 ટકા જીડીપી ગ્રોથ જોવાયો હતો. એનએસઓએ ગત ફેબ્રુઆરીમાં રજૂ કરેલા બીજા અંદાજમાં 2021-22 માટે 8.9 ટકા જીડીપી ગ્રોથનો અંદાજ આપ્યો હતો. આમ, તેના કરતાં પણ વાસ્તવિક ગ્રોથ નીચો આવ્યો છે. સંસદમાં ફેબ્રુઆરીમાં રજૂ કરાયેલા આર્થિક સર્વેક્ષણમાં નવા વર્ષ 2022-23 માટે 8-8.5 ટકા જીડીપી ગ્રોથનો અંદાજ અપાયો છે.

અબુધાબીમાં ‘આઈફા’ એવોર્ડ સમારંભ યોજાયોઃ શેરશાહ શ્રેષ્ઠ ફિલ્મ, વિકી કૌશલ શ્રેષ્ઠ અભિનેતા

અબુધાબી ખાતે યોજાયેલા ૨૨મા આઈફા એવોર્ડમાં બાયોપિક ફિલ્મ ‘શેરશાહ’ને બેસ્ટ ફિલ્મનો એવોર્ડ મળ્યો હતો. બેસ્ટ એક્ટરનો એવોર્ડ ‘સરદાર ઉધમસિંહ’ માટે વિકી કૌશલને મળ્યો હતો, જ્યારે બેસ્ટ એકટ્રેસનો એવોર્ડ ક્રિતી સેનોનને ‘મિમિ’ માટે મળ્યો હતો. અબુધાબીના યસ આઈલેન્ડ ખાતે ઇતિહાદ એરેનામાં આઈફા એવોર્ડ સંબંધિત વિવિધ ઈવેન્ટ ત્રણ દિવસ માટે યોજાઈ હતી. શનિવાર રાતે વિવિધ એવોર્ડઝની જાહેરાત થઈ હતી. વિકી કૌશલે પોતાનો એવોર્ડ દિવંગત અભિનેતા ઈરફાન ખાનને અર્પણ કર્યો હતો. શેરશાહને કુલ પાંચ એવોર્ડ મળ્યા હતા. શ્રેષ્ઠ ફિલ્મ ઉપરાંત દિગ્દર્શનનો એવોર્ડ વિષ્ણુવર્ધનને મળ્યો હતો. જોકે, તેણે બેસ્ટ મ્યુઝિકનો એવોર્ડ અતરંગી રે સાથે શેર કરવો પડયો હતો. જોકે, બેસ્ટ પ્લેબેક સિંગર મેલ અને ફિમેલ બંને એવોર્ડ શેરશાહના સોંગ માટે જુબિન નૌતિયાલ અને અસીસ કૌરને ભાગે આવ્યા હતા. બેસ્ટ લિરિક્સનો એવોર્ડ ‘લહેરે દો’ માટે કૌસર મુનિરને મળ્યો હતો.

બોલીવુડના વિખ્યાત ગાયક કેકેનું આકસ્મિક અવસાન

કોલકાતા કોન્સર્ટ દરમિયાન એકાએક તબિયત લથળ્યા થયા બાદ બોલિવૂડ ગાયક કેકેનું મંગળવારની રાત્રે અવસાન થયું હતું. કેકે તરીકે લોકપ્રિય કૃષ્ણ કુમાર કુન્નથ માત્ર 53 વર્ષની ઉંમરે આ દુનિયાને આકસ્મિક અલવિદા કરી હતી. કોન્સર્ટ બાદ કેકેની તબિયત બગડી હતી અને હાર્ટ એટેકના કારણે તેમનું અવસાન થયું હોવાનું માનવામાં આવે છે. કોલકાતાના ન્યૂ માર્કેટ પોલીસ સ્ટેશનમાં બુધવારે કેકેના અપમૃત્યુનો એક કેસ દાખલ કરવામાં આવ્યો હતો. કેકે કોલકાતાના નજરૂલ મંચ ખાતે ગુરૂદાસ કોલેજના ફેસ્ટિવલ દરમિયાન પર્ફોર્મ કરી રહ્યાં હતા. કાર્યક્રમ દરમિયાન તેમની તબિયત ખરાબ થઈ ગઈ હતી. જાણવા મળ્યા મુજબ તેઓ જે હોટેલમાં રોકાયા હતા તેની સીડીઓ પરથી કથિત રીતે પડી ગયા હતા. હોસ્પિટલના પ્રવક્તાએ ગાયકને હોસ્પિટલ લાવવામાં આવ્યા ત્યારે તેઓ મૃત હોવાની જાણકારી આપી હતી.

સલમાન ખાન કરશે કોમેડી

સલમાન ખાન અત્યારે પોતાની નવી ફિલ્મો માટે ચર્ચામાં છે. જેમાં અનીસ બાઝમીની કોમેડી ફિલ્મ છે, તેમજ બીજી એડવેન્ચર ફિલ્મનો સમાવેશ છે. સૂત્રોના જણાવ્યા મુજબ, અનીસ બાઝમી એક કોમેડી ફિલ્મ બનાવી રહ્યા છે. જેમાં સલમાનના બહુ ચર્ચિત પાત્ર પ્રેમને ફરીથી દર્શાવવામાં આવશે. સલમાને અગાઉ પણ કોમેડી ફિલ્મો કરી છે અને તે હિટ પણ થઇ છે. અનીસ બાઝમી અને સલમાન વચ્ચે આ ફિલ્મ માટે ચર્ચા થઇ છે. સૂત્રો કહે છે કે, સલમાન પોતાની નવી ફિલ્મો ટાઇગર ૩, ભાઇજાન અને રવિન્દ્ર કૌશિકની બાયોપિક પુરી કરીને પછી આ ફિલ્મનું શૂટિંગ શરૂ કરશે. અનીસ બાઝમીની ફિલ્મ માટે તે આવતા વર્ષના અંત સુધીમાં પોતાની ડેટસ નક્કી કરશે. સલમાન આ ઉપરાંત એક એડવેન્ચર ફિલ્મનું નિર્માણ કરવાનો છે. જેનું બજેટ રૂ.

મુન્નાભાઇની સિક્વલમાં વિલંબથી અરશદ થયો નિરાશ

સંજય દત્તની કારકિર્દી અને તેની ઈમેજને નવું સ્વરૂપ આપનાર ફિલ્મ મુન્નાભાઈ એમબીબીએસ સીરિઝની ત્રીજી સિક્વલ ફિલ્મની ઘણા લાંબા સમયથી રાહ જોવામાં આવી રહી છે. અગાઉ સિક્વલની ત્રીજી ફિલ્મ માટે ભરપૂર પ્રયાસ ચાલી રહ્યા હોવાનું સંજય દત્ત જણાવી ચૂક્યા છે. જોકે, અરશદ વારસી એટલે કે મુન્નાભાઈના સર્કિટે હવે ત્રીજી ફિલ્મ બનવાની આશા મૂકી દીધી છે. મુન્નાભાઈની સફળતાના કારણે સંજય દત્ત અને અરશદ વારસી બંનેને કરિયરમાં ખૂબ લાભ થયો હતો. મુન્નાભાઈ અંગે વાત કરતાં અરશદ વારસીએ કહ્યું હતું કે, મુન્નાભાઈ એમબીબીએસના કારણે કરિયરને નવજીવન મળ્યું હતું. આ પહેલા ત્રણ-ચાર વર્ષ માટે તેની પાસે કોઈ ફિલ્મ ન હતી. લોકો ભૂલવા માંડ્યા હતા.