યુક્રેન પર રશિયાના આક્રમણ અને કોરોના મહામારીને કારણે સપ્લાયના અવરોધને પગલે અમેરિકા, બ્રિટન અને ભારતમાં મોંઘવારી માઝા મૂકી રહી છે. અમેરિકામાં માર્ચ મહિનામાં કન્ઝ્યુમર ફુગાવો 8.5 ટકાના સ્તરે પહોંચ્યો હતો, જે 1981 પછીથી સૌથી ઊંચા સ્તરે છે. ભારતમાં ખાદ્યચીજો મોંઘી બનતા માર્ચ મહિનામાં રિટેલ ફુગાવાનો દર 17 મહિનાની ટોચે 6.95 ટકા થઈ ગયો હતો, જે રિઝર્વ બેન્કના 6 ટકાના લક્ષ્યાંક કરતાં ઘણો વધારે છે. બીજી તરફ બ્રિટનમાં કન્ઝ્યુમર પ્રાઇસ ફુગાવા માર્ચમાં ઉછળીને 7.0 ટકા થયો હતો, જે માર્ચ 1992 પછીથી સૌથી ઊંચા સ્તરે છે. ફેબ્રુઆરીમાં ફુઘાવો 6.2 ટકા હતો. સીપીઆઇમાં આ વાર્ષિક ધોરણે મોટા ભાગના અર્થશાસ્ત્રીની ધારણા કરતા વધુ રહ્યો હતો. 24 ફેબ્રુઆરીએ યુક્રેન પર રશિયાના આક્રમણ પછી બ્રિટનમાં એનર્જીના ભાવમાં તીવ્ર વધારો થયો હતો. ગયા મહિને બ્રિટનની ઓફિસ ફોર બજેટ રિસ્પોન્સિબિલિટીએ અંદાજ મૂક્યો હતો કે કન્ઝ્યુમર પ્રાઇસ ફુગાવો 2022ના અંતિમ ક્વાર્ટરમાં 8.7 ટકાના 40 વર્ષની ટોચે પહોંચી શકે છે.

વિશ્વના સૌથી ધનાઢ્ય ઇલોન મસ્કે માઇક્રો બ્લોગિંગ સાઇટ ટ્વીટરને હસ્તગત કરવા માટે 43 બિલિયન ડોલરની ઓફર કરી રહી છે. ટેસ્લા અને સ્પેસએક્સના સ્થાપક પ્રમોટર મસ્કે ટ્વીટરનું હોસ્ટાઈલ ટેકઓવર કરવાનો પ્રયાસ કર્યો છે. આ સોશિયલ મીડિયા સાઇટના બોર્ડમાં સભ્યપદનો ઇનકાર કર્યા બાદ મસ્કે આ ઓફર કરી છે. 14મી એપ્રિલના નિયમનકારી માહિતી અનુસાર આ ઓફરમાં મસ્કે ટ્વીટરને 54.20 ડોલર પ્રતિ શેરના ભાવે કેશમાં ખરીદવાની ઓફર કરી છે. ટ્વીટરના ચેરમેન બ્રેટ ટેલરને લખેલા પત્રમાં મસ્કે જણાવ્યું હતું કે મારા રોકાણ પછી મને હવે લાગે છે કે કંપની તેના હાલના સ્વરૂપમાં પ્રગતિ પણ નહીં કરી શકે અને સામાજિક જવાબદારી પણ નહીં નીભાવી શકે. ટ્વીટરને ખાનગી કંપનીમાં ટ્રાન્સફર કરવાની જરૂરી છે.

એન્ફોર્સમેન્ટ ડિરેક્ટોરેટ (ઇડી)એ ચીનની મોબાઇલ ઉત્પાદન કંપની શાઓમીના ગ્લોબલ વાઇસ પ્રેસિડન્ટ મનુ કુમાર જૈનને પૂછપરછ માટે સમન્સ પાઠવ્યું છે. ફોરેન એક્સ્ચેન્જ મેનેજમેન્ટ એક્ટ (ફેમા) કાયદાના કથિત ઉલ્લંઘન સંબંધિત એક તપાસના ભાગરૂપે આ કાર્યવાહી કરવામાં આવી છે. સૂત્રોના જણાવ્યા અનુસાર ઇડી છેલ્લાં કેટલાંક વર્ષોમાં કરોડો રૂપિયાના વિદેશી રેમિટન્સની તપાસ કરી રહી છે. મનુ કુમાર જૈનને કંપની સંબંધિત સંખ્યા નાણાકીય દસ્તાવેજો સાથે બુધવારે રૂબરુ હાજર થવું પડશે અથવા સત્તાવાર પ્રતિનિધિ મારફત આ દસ્તાવેજ મોકલવા પડશે. શાઓમીના શેરહોલ્ડર્સ, ભંડોળના સ્રોત, વેન્ડર કોન્ટ્રાક્ટ તથા કંપનીના ભારતીય મેનેજમેન્ટને કરવામાં આવેલા પેમેન્ટ અને વિદેશ મોકલવામાં આવેલા નાણા સંબંધિત દસ્તાવેજ માંગવામાં આવ્યા છે. મનુ કુમાર જૈન અગાઉ શાઓમીના ઇન્ડિયા હેડ હતા.

ભયંકર આર્થિક કટોકટીનો સામનો કરી રહેલા શ્રીલંકાએ તેના વિદેશી દેવાની ચુકવણીમાં નાદારી જાહેર કરી છે. અનાજ, ગેસ, વીજળી સહિતની આવશ્યક ચીજવસ્તુઓની તીવ્ર અછત વચ્ચે શ્રીલંકાના વિદેશી હૂંડિયામણમાં તીવ્ર ઘટાડો થયો છે અને તે હાલમાં દેવાની ચુકવણી કરવાની સ્થિતિમાં છે. જોકે તે ઇન્ટરનેશનલ મોનેટરી ફંડ પાસેથી રાહત પેકેજની મંત્રણા કરી રહ્યું છે. શ્રીલંકાએ આશરે 6 બિલિયન ડોલરનું વિદેશી દેવું ચુકવવાનું છે. નાણા મંત્રાલયે એક નિવેદનમાં જણાવ્યું હતું કે તમામ દેવાની ચુકવણીને સસ્પેન્ડ કરવાની શ્રીલંકાની નીતિ રહેશે. તે 12 એપ્રિલ 2022ના બાકી દેવાની રકમ પર લાગુ પડશે.

રણબીર કપૂર અને આલિયા ભટ્ટ લગ્નબંધનમાં બંધાયા

બોલીવુડનું એક્ટર રણબીર કપૂર અને આલિયા ભટ્ટ મુંબઈ ખાતેના નિવાસસ્થાને 14 એપ્રિલે લગ્નબંધનમાં બંધાયા હતા. વાસ્તુ એપાર્ટમેન્ટ સંકુલમાં કપૂર અને ભટ્ટ પરિવારના સભ્યો તથા કેટલાક નજીકનાં મિત્રોની હાજરીમાં બંને વિધિસર સપ્તપદીના ફેરા ફરીને એકમેકનાં બની ગયાં છે. રણબીર કપૂરના પાલી હિલમાં આવેલા ઘર વાસ્તુ બિલ્ડિંગમાં રણબીર કપૂર અને આલિયા ભટ્ટના લગ્ન થયા હતા. બુધવારે મહેંદી સેરેમની બાદ ગુરુવારે પીઠી સેરેમની યોજાઈ હતી. આલિયા ભટ્ટના મમ્મી-પપ્પા, બહેનો અને ભાઈથી માંડીને રણબીરનાં મમ્મી નીતૂ કપૂર, બહેન રિદ્ધિમા કપૂર, ફોઈ રીમા જૈન, કરણ જોહર સહિતના પરિવારજનો અને મિત્રો લગ્નસ્થળે પહોંચ્યા હતા.

RRR ફિલ્મ 1000 કરોડની ક્લબમાં સામેલ, ઓસ્ટ્રેલિયામાં પણ સુપરડુપર હિટ

એસ એસ રાજામૌલીની ફિલ્મ RRR બોક્સ ઓફિસ પર ધૂમ મચાવી રહી છે. આ ફિલ્મ હવે 1000 કરોડની કમાણી કરનાર ફિલ્મોની ક્લબમાં સામેલ થઈ ગઈ છે.રામચરણ તેજા અને જુનિયર એનટીઆર અભિનિત ફિલ્મ તમામ રેકોર્ડ તોડી રહી છે. અગાઉ આમિર ખાનની દંગલ અને પ્રભાસની ફિલ્મ બાહુબલી 1000 કરોડની ક્લબમાં સામેલ થઇ છે.બાહુબલીએ 1800 કરોડની લાઈફ ટાઈમ કમાણી કરી હતી.જ્યારે દંગલે રૂ. 2024 કરોડની કમાણી કરી હતી. RRRના કારણે જોન અબ્રાહમની ફિલ્મ એટેક સુપર ફ્લોપ સાબિત થઈ છે. RRRનું હિન્દી વર્ઝન પણ રૂ. 213 કરોડથી વધુ રકમની કમાણી કરી ચૂક્યું છે.

સંજય દત્તે કરી મનની વાત

પીઢ અભિનેતા સંજય દત્તે અત્યારના ફિલ્મ નિર્માતાઓ પર આડકતરા પ્રહારો કરતાં કહ્યું છે કે, બોલિવૂડ પોતાનાં મૂળિયાં ભૂલી ગયું છે, અને તેના કારણે અત્યારે હાલત ખરાબ થઇ ગઇ છે. આ સંજોગોમાં નિર્માતાઓ ફરી શોલે અને ઝંઝીર જેવી ફિલ્મો બનાવે તો જ ઇન્ડસ્ટ્રીનો ઉદ્ધાર થશે. અત્યારે બોલિવૂડ હાંસિયામાં ધકેલાઇ રહ્યું અને ડિજિટલ પ્લેટફોર્મની લોકપ્રિયતા પણ વધી રહી છે. મનોરંજન ઉદ્યોગના આ બદલાતા પ્રવાહ અંગે સંજય દત્તે જણાવ્યું હતું કે, એકશનથી ભરપૂર અને હીરોનાં પરાક્રમો દર્શાવતી ફિલ્મો ક્યારેય વાસી થતી નથી. સામાન્ય દર્શકને એવી બધી ફિલ્મોમાં જ મજા પડે છે.

શાહરુખ ખાન કરશે ડબલ કમાણી

શાહરૂખ ખાને બોલીવૂડમાં કમબેક કરવા માટે ફિલ્મ પઠાનને પસંદ કરી છે. હવે આ ફિલ્મ અંગે એક નવી વાત બહાર આવી છે. શાહરૂખે એકશન આધારિત આ ફિલ્મ માટે એક ફિલ્મના બજેટ જેટલી ફી લીધી હોવાનું કહેવાય છે. સૂત્રો કહે છે, આ ફિલ્મ માટે શાહરૂખે રૂ. 90 કરોડ જેટલી ફી લીધી હોવાની વાત છે. ઉપરાંત તેણએ આ ફિલ્મના નફામાં પણ પોતાનો ભાગ રાખ્યો હોવાનું જાણવા મળ્યું છે, જોકે ફિલ્મના નિર્માતાએ આ વાતની પુષ્ટી કરી નથી. આ ફિલ્મમાં શાહરૂખની સાથે જોન અબ્રાહમ અને દીપિકા પદુકોણ કામ કરી રહ્યા છે. આ ત્રણેય સ્ટાર્સને એક જ ફિલ્મમાં ભેગા કરવાથી નિર્માતાનું બજેટ વધી ગયું છે.