ભારતની યાત્રાએ આવેલા જાપાનના વડાપ્રધાન ફુમિયો કિશિડાએ શનિવાર (19 માર્ચે) ભારતના વડાપ્રધાન નરેન્દ્ર મોદી સાથે ઉચ્ચસ્તરીય બેઠક બાદ આગામી પાંચ વર્ષમાં ભારતમાં પાંચ ટ્રિલિયન યેન (રૂ.3.2 લાખ કરોડ- $42 બિલિયનના)ના રોકાણ લક્ષ્યાંકની જાહેરાત કરી હતી. નવી દિલ્હીમાં સંયુક્ત પત્રકાર પરિષદમાં દ્વિપક્ષીય વેપાર સંબંધોનો ઉલ્લેખ કરતાં તેમણે જણાવ્યું હતું કે જાપાને આગામી પાંચ વર્ષમાં ભારતમાં રૂ.3.20 લાખ કરોડના રોકાણનો લક્ષ્યાંક બનાવ્યો છે અને અમે અમારા સહકારને વધુ મજબૂત બનાવીશું. ભારતે મોદીના હોમ સ્ટેટ ગુજરાતમાં ઇલેક્ટિક વ્હિકલ અને બેટરીના ઉત્પાદન માટે આશરે 1.4 બિલિયન ડોલરના રોકાણ માટે જાપાનની સુઝુકી મોટરના યુનિટ્સ સાથે સમજૂતી કરી હતી. જોકે આ રોકાણ 5 ટ્રિલિયન યેનના કુલ રોકાણ પૈકીનું છે કે અલગ તે સ્પષ્ટ નથી.

ભારત દ્વારા ડિસ્કાઉન્ટ ભાવે રશિયાના ક્રૂડ ઓઇલની ખરીદી અમેરિકાના પ્રતિબંધોનું ઉલ્લેઘન નથી, એમ વ્હાઇટ હાઉસે જણાવ્યું છે. જોકે અમેરિકાએ આડકતરી રીતે પોતાની નારાજગી પણ વ્યક્ત કરી છે. ભારત રશિયાની ડિસ્કાઉન્ટ ભાવે ક્રૂડ ઓઇલની ઓફરનો સ્વીકાર કરી શકે છે તેવા અહેવાલ અંગેના પ્રશ્નના જવાબમાં વ્હાઇટ હાઉસના પ્રેસ સેક્રેટરી સાકીએ મંગળવારે જણાવ્યું હતું કે તેનાથી પ્રતિબંધનો ભંગ થતો હોય તેવું મને લાગતું નથી. પરંતુ હાલના સમયે ઇતિહાસનું આલેખન થઈ રહ્યું છે ત્યારે તમે કોના પક્ષમાં છો તેનો પણ વિચાર કરો. રશિયાની નેતાગીરીને સપોર્ટ એ આક્રમણને સપોર્ટ છે, જેનાથી દેખિતી રીતે વિનાશકારી અસર હશે.

ઇરાને ક્રૂડ ઓઇલ અને ગેસની નિકાસ માટે રૂપી-રિયાલમાં વેપાર ફરી ચાલુ કરીને ભારતને તેની ઊર્જા જરૂરિયાતમાં મદદ કરવાની ઓફર કરી છે. જો બંને દેશો રૂપી-રિયાલમાં વેપાર ફરી ચાલુ કરશે તો દ્વિપક્ષીય વેપાર 30 અબજ ડોલરે પહોંચી શકે છે. તહેરાને હાલમાં અટવાયેલા ઇરાન-પાકિસ્તાન-ઇન્ડિયા ગેસ પાઇપલાઇન પ્રોજેક્ટનો નવો રૂટ શોધવાની પણ તૈયાર છે, એમ ભારત ખાતેના ઇરાનના રાજદૂત અલી ચેગેનીએ જણાવ્યું છે. અમેરિકાના ભૂતપૂર્વ પ્રેસિડન્ટ ડોનાલ્ડ ટ્રમ્પે ઇરાન સાથેની અણુ સમજૂતીમાંથી નીકળી જઇને ઇરાન પર ક્રૂડ ઓઇલની નિકાસ પર પ્રતિબંધો લાદ્યા બાદ ભારતે ઇરાનમાંથી આયાત બંધ કરી હતી.

જાપાનની ઓટો કંપની સુઝુકી મોટર કોર્પોરેશને રવિવારે જણાવ્યું હતું કે કંપની ગુજરાતમાં ઇલેક્ટ્રિકલ વ્હિકલ અને બીઇવી બેટરીના સ્થાનિક ઉત્પાદન માટે 2026 સુધીમાં આશરે રૂ.10,440 કરોડ (આશરે 150 બિલિયન યેન)નું રોકાણ કરશે. કંપનીએ આ માટે ગુજરાત સરકાર સાથે સમજૂતીપત્ર પર હસ્તાક્ષર કર્યા છે. ભારતની બે દિવસની મુલાકાતે આવેલા જાપાનના વડાપ્રધાન ફુમિયો ફિશિડાએ ભારતમાં આગામી પાંચ વર્ષમાં રૂ.૩.૨ લાખ કરોડના રોકાણોની જાહેરાત કરી હતી. બેચરાજી નજીક હાંસલપુર ખાતે સુઝુકી મોટર્સ મોટરકાર પ્લાન્ટ ધરાવે છે. આ પ્લાન્ટની નજીક જ હવે ૨૦૨૫-૨૬ સુધીમાં ઇલેક્ટ્રિક વ્હીકલ્સ અને તેની બેટરીઝ માટેના પ્લાન્ટ સ્થાપવાનો ઇરાદો સુઝુકી મોટર્સે જાહેર કર્યો છે. આ માટે ૧૫૦ બિલિયન યેન (અંદાજે રૂ.૧૦,૪૪૦ કરોડ)ના રોકાણ માટે જાપાનના વડાપ્રધાન ફિશિદા અને ભારતના વડાપ્રધાન મોદીની ઉપસ્થિતિમાં સુઝુકી મોટર કોર્પોરેશનના ડિરેક્ટર ટોશિહિરો સુઝુકી તથા મારુતી સુઝુકી ઇન્ડિયા લિમિટેડના મેનેજિંગ ડિરેક્ટર અને સીઇઓ કેનિચી અયુકાવા, ગુજરાતના નાણાંપ્રધાન કનુભાઇ દેસાઇની ઉપસ્થિતિમાં શનિવારે સમજુતી કરાર થયા હતા.

‘ધ કાશ્મીર ફાઇલ્સ’ની બોક્સ ઓફિસ પર ધમાલઃ 100 કરોડની ક્લબમાં સામેલ થઈ

કાશ્મીરમાં હિન્દુ વિસ્થાપિતોની યાતના રજૂ કરતી ફિલ્મ ‘ધ કાશ્મીર ફાઇલ્સ’એ બોક્સ ઓફિસ પર ધમાલ મચાવી છે. ફિલ્મે રિલીઝ આઠ દિવસમાં ‘ગંગુબાઈ કાઠિયાવાડી’ અને ’83’ જેવી બૉલીવુડ ફિલ્મોના બૉક્સ ઑફિસ કલેક્શનને પાછળ છોડી દીધું છે. આ સિવાય હોળીના અવસર પર રિલીઝ થયેલી અક્ષય કુમારની ફિલ્મ ‘બચ્ચન પાંડે’ રિલીઝ થઈ હોવા છતાં ‘ધ કાશ્મીર ફાઇલ્સ’ બોક્સ ઓફિસ પર સારી કમાણી કરી રહી છે. વિવેક રંજન અગ્નિહોત્રી દ્વારા નિર્દેશિત આ ફિલ્મે બીજા સપ્તાહમાં અત્યાર સુધીમાં સૌથી વધુ કલેક્શન કર્યું છે. આ ફિલ્મે 100 કરોડની ક્લબમાં સામેલ થઈને માત્ર આઠ દિવસમાં કુલ 116 કરોડ રૂપિયાની કમાણી કરી લીધી છે.

કપિલ શર્મા શોઃ અર્ચનાની સિદ્ધુને ઓફર

કપિલ શર્માના કોમેડી શોમાં જોવા મળતી અર્ચના પુરન સિંઘનું કહેવું છે કે જો નવજોત સિંહ સિદ્ધુને ‘ધ કપિલ શર્મા શો’માં પાછા આવવું હશે તો તે ખુરશી છોડી દેશે. સિદ્ધુએ રાજકારણમાં જવાનું નક્કી કર્યું ત્યારે તેનું સ્થાન અર્ચનાને મળ્યું હતું. જોકે, હવે પંજાબની વિધાનસભાની ચૂંટણીમાં સિદ્ધુની હાર થતાં હવે તે ફરી શોમાં આવી રહ્યો હોવાની ચર્ચા ચાલી રહી છે. સોશિયલ મીડિયા પર આ વાતને લઈને ઘણાં મીમ્સ પણ બની રહ્યાં છે. આ વિશે પૂછતાં અર્ચનાએ કહ્યું હતું કે ‘આ બધાં મીમ્સથી મને કોઈ અસર નથી થતી, કારણ કે મારા માટે આ બધું કંઈ નવું નથી. જોકે મને એ જાણીને નવાઈ લાગે છે કે જે વ્યક્તિએ શો છોડી દીધો અને રાજકારણમાં જોડાયો તે હજુ પણ કેવી રીતે આ શો સાથે કનેક્ટ રહી શકે. હું ક્યારેય રાજકારણમાં નથી ગઈ. આ શોમાં મારો એક રોલ છે અને એને હું ખૂબ જ સારી રીતે ભજવી રહી છું, પરંતુ જ્યારે પણ સિદ્ધુ સાથે કંઈ થાય ત્યારે મારા પર મીમ્સ બનવાનું શરૂ થઈ જાય છે.

રણબીર-આલિયાના લગ્નઃ તારીખ પે તારીખ

બોલીવૂડની જાણીતી જોડી રણબીર કપૂર અને આલિયા ભટ્ટ ઘણા લાંબા સમયથી એકબીજાના પ્રેમમાં છે તે જગજાહેર છે. તેમના લગ્ન અંગે અનેક વાતો બહાર આવે છે પરંતુ તેમાં પછી કંઇ આગળ થતું નથી. તેમના લગ્નની તારીખ વારંવાર બદલાયા પછી હવે ફરી નવી તારીખ ચર્ચામાં છે. સૂત્રો કહે છે કે, રણબીર અને આલિયા આ વર્ષે ઓક્ટોબરમાં લગ્ન કરી લેશે તેમના બંનેના પરિવારોમાં લગ્નની તૈયારી થઇ રહી છે. આમ તો, આલિયા અને રણબીરના લગ્ન ગયા વર્ષે જ થવાના હતા. પરંતુ કોરોના મહામારી દરમિયાન લોકડાઉનના કારણે લગ્ન લંબાઇ ગયા હતા. આ પછી એપ્રિલ મહિનામાં લગ્ન થવાની ચર્ચા હતી પરંતુ હવે એપ્રિલમાં પણ તેમના લગ્ન થવાના નથી. હવે એપ્રિલ મહિનાને આડે ફક્ત થોડા દિવસો જ હોવાથી બંનેના પરિવારમાં લગ્નની કોઇપણ તૈયારી થઇ નથી. આ પ્રેમી યુગલના લગ્નની તારીખો વારંવાર કેમ બદલાયા કરે છે તે વાસ્તવિકતા કોઇ જાણીતું નથી. જ્યાં સુધી કપૂર ખાનદાનના ઘર કૃષ્ણા રાજના રિનોવેશનની વાત છે તો હજી આ ઘરને રહેવા લાયક થતાં ઓછામાં ઓછા ૧૮ મહિના નીકળી જશે.

ડાન્સ દીવાને જુનિયર’માં જજ બનશે નોરા ફતેહી

યુવા અભિનેત્રી નોરા ફતેહી હવે ‘ડાન્સ દીવાને જુનિયર’ને જજ કરવાની છે. તેણે ‘ડાન્સ દીવાને’ની છેલ્લી સીઝનમાં માધુરી દીક્ષિત નેને સાથે ગેસ્ટ જજ તરીકે શો કર્યો હતો. જોકે હવે આ શોના જુનિયર વર્ઝનને તે પોતે જજ કરવા જઈ રહી છે. નોરા ખૂબ સારી રીતે ડાન્સ કરી જાણે છે અને તે ઘણીવાર શોમાં પણ ડાન્સ રજૂ કરી ચૂકી છે. આથી શોના મેકર્સે તેની લોકપ્રિયતાને ધ્યાનમાં રાખીને તેને આ શો ઓફર કરવામાં આવ્યો છે. આ ઉપરાંત સાથી જજ તરીકે તે જેટલા શોમાં હતી એનું રેટિંગ્સ પણ ઘણું આવ્યું હોવાથી તેને પસંદ કરવામાં આવે એ વાજબી છે. બાળકોમાં પણ નોરા ખૂબ જ ફેમસ છે અને ડાન્સને લઈને તેનાં મંતવ્યો પણ સારાં હોવાથી મેકર્સની તે પહેલી પસંદ હતી.