બિલિયોનેર મુકેશ અંબાણીની કંપની રિલાયન્સ ઈન્ડસ્ટ્રીઝે તાજેતરમાં જ એડવર્બ ટેક્નોલોજીસ 1 બિલિયન ડોલરનો ઓર્ડર આપ્યો છે. આ ઓર્ડર 5G ટેક્નોલોજીથી સજ્જ રોબોટ્સ માટે આપવામાં આવ્યો છે. તેનો ઉપયોગ રિલાયન્સની જામનગર રિફાઈનરીમાં કરવાની યોજના છે.રિલાયન્સ ઈન્ડસ્ટ્રીઝે થોડા સમય પહેલા જ રોબોટિક્સ સ્ટાર્ટઅપમાં 54 ટકા હિસ્સો ખરીદ્યો હતો. આ સોદો રિલાયન્સ ઈન્ડસ્ટ્રીઝના રિટેલ યુનિટ રિલાયન્સ રિટેલ વેન્ચર્સ લિમિટેડ દ્વારા કરવામાં આવ્યો હતો. રિલાયન્સ રિટેલે આ ડીલ 132 મિલિયન ડોલર એટલે આશરે 985 કરોડ રૂપિયામાં કરી હતી.સૂત્રોના જણાવ્યા અનુસાર રિલાયન્સ ઈન્ડસ્ટ્રીઝ આ રોબોટ્સ દ્વારા 5G સાથે સંકળાયેલા એક્સપેરીમેન્ટ્સ પણ કરશે. પહેલેથી જ એડવર્બના ડાયનેમો 200 રોબોટ્સનો જામનગર રિફાઈનરીમાં ઈંટ્રા-લોજિસ્ટિક્સ ઓપરેશનમાં ઉપયોગ થઈ રહ્યો છે. આ તમામ રોબોટ્સ 5Gથી સંકળાયેલા છે અને તેમને અમદાવાદ સ્થિત રિમોટ સર્વર વડે કંટ્રોલ કરવામાં આવે છે. આ માટે એડવર્બની ફ્લીટ મેનેજમેન્ટ સિસ્ટમ લીજનનો ઉપયોગ કરવામાં આવે છે. તે સિવાય 1 ટન પેલોડ કેપેસિટીવાળા ડાયનેમો રોબોટ્સનો ઉપયોગ બૈગિંગ લાઈન ઓટોમેશનમાં કરવામાં આવી રહ્યો છે.

ભારતના નાગરિકોએ એપ્રિલથી ડિસેમ્બર સુધીના નવ મહિના દરમિયાન દેશમાંથી 14 બિલિયન ડોલર વિદેશમાં મોકલ્યા છે. રિઝર્વ બેંકની લિબરલાઈઝ્ડ રેમિટન્સ સ્કીમ હેઠળ વિદેશમાં નાણાં મોકલવામાં આવ્યા છે. કોરોના મહામારીના લીધે વિક્ષેપ પડ્યા બાદ હાલ દેશમાંથી વિદેશમાં નાણાં મોકલવા એટલે કે રેમિટન્સના આઉટફ્લોમાં ઝડપી વૃદ્ધિ થઇ છે. અગાઉના નાણાંકીય વર્ષે સમીક્ષા હેઠળના સમયગાળા દરમિયાન દેશમાંથી 12.68 બિલિયન ડોલરનું રેમિટન્સ વિદેશમાં મોકલવામાં આવ્યુ હતુ. કોરોના મહામારી પૂર્વેના વર્ષ 2019-20 દરમિયાન ભારતીયોએ દેશમાંથી 18 બિલિયન ડોલરનું રેમિટન્સ વિદેશમાં મોકલ્યુ હતુ.

ટાટા સન્સ અને સાયરસ મિસ્ત્રી વચ્ચે ચાલી રહેલા વિવાદમાં મિસ્ત્રીએ દાખલ કરેલી રીવ્યૂ પિટિશનને સુપ્રીમ કોર્ટે સ્વીકારી લીધી છે. આ રિવ્યૂ પિટિશન અંગે સુપ્રીમ કોર્ટ નવ માર્ચના રોજ સુનાવણી કરશે.આ કેસ સાયરસ મિસ્ત્રીને ટાટા ગ્રૂપના ચેરમેન પદેથી હાંકી કાઢવા સંબંધિત છે. અગાઉ આ કેસમાં સુપ્રીમ કોર્ટે માર્ચ 2021માં આપેલા ચુકાદામાં સાયરસ મિસ્ત્રીને ટાટા સન્સના ચેરમેન પદેથી દૂર કરવાના નિર્ણયને માન્યો રાખ્યો હતો. જેની સામે મિસ્ત્રીએ સુપ્રીમ કોર્ટમાં રિવ્યૂ પિટિશન દાખલ કરી છે. ઉલ્લેખનીય છ કે, આ રિવ્યુ પિટિશનને 15 ફેબ્રુઆરીના રોજ ચીફ જસ્ટિસ એન.વી. રમણાની આગેવાની હેઠળની ત્રણ જજોની ખંડપીઠે દ્વારા વિચારણા માટે લેવામાં આવી હતી.

યુક્રેન પર આક્રમણને પગલે રશિયા પર વિશ્વના અગ્રણી દેશોએ નવા આકરા આર્થિક પ્રતિબંધો મૂક્યા હોવાથી સોમવારે અમેરિકાના ડોલર સામે રશિયાના રૂબલમાં આશરે 30 ટકાનો અસાધારણ કડાકો બોલાયો હતો. વિદેશી ફોરેન એક્સ્ચેન્જમાં અમેરિકાના ડોલર સામે રૂબલ 27 ટકા તૂટીને 114.33ના સ્તરે ટ્રેડ થતો હતો, એમ બ્લૂમબર્ગ ન્યૂઝના અહેવાલમાં જણાવાયું હતું. અમેરિકા અને યુરોપિયન યુનિયનને જણાવ્યું હતું કે તેઓ ઇન્ટરનેશનલ બેન્ક પેમેન્ટ સિસ્ટમ SWIFTમાં રશિયાની કેટલીક અગ્રણી બેન્કો પર પ્રતિબંધ મૂકશે. પશ્ચિમી દેશોના આર્થિક પ્રતિબંધોમાં રશિયાના પ્રેસિડન્ટ વ્લાદિમિર પુતિન અને વિદેશ પ્રધાન સર્ગેઇ લાવરોવને પણ નિશાન બનાવવામાં આવ્યા છે.

રણવીર ‌સિંહ, ‌‌‌ક્રિ‌તિ સેનનને દાદા સાહેબ ફાળકે એવોર્ડ

દાસાહેબ ફાળકે ઇન્ટરનેશનલ ફિલ્મ ફેસ્ટિવલ એવોર્ડ 2022ની મુંબઈમાં 20 ફેબ્રુઆરીની રાત્રે ભવ્ય સમારંભમાં જાહેરાત કરવામાં આવી હતી. દક્ષિણ ભારતના સુપરસ્ટાર અલ્લુ અર્જુનની બ્લોકબસ્ટર તેલુગુ ફિલ્મ ‘પુષ્પા: ધ રાઇઝ’ મૂવીને ‘ફિલ્મ ઓફ ધ યર’નો અવોર્ડ મળ્યો હતી, જ્યારે શેરશાહને બેસ્ટ ફિલ્મનો એવોર્ડ મળ્યો હતો. અભિનેતા રણવીર સિંહને ફિલ્મ ‘83’ માટે બેસ્ટ એક્ટરનો એવોર્ડ મળ્યો હતા. 1983ના વર્લ્ડ કપમાં ભારતીય ક્રિકેટ ટીમના વિજય આધારિત આ ફિલ્મમાં રણવીરે કપિલ દેવની ભૂમિકા ભજવી હતી. એક્ટ્રેસ ક્રિતિ સેનનને ફિલ્મ ‘મિમી’ માટે બેસ્ટ એક્ટ્રેસનો અવોર્ડ મળ્યો હતો. એવોર્ડની યાદી મુજબ છે.

કાજોલને મળી દમદાર ભૂમિકા

કાજોલને એક નવી ફિલ્મમાં દમદાર ભૂમિકા ભજવવાની તક મળી છે. તે ખૂબ ઝડપ જ ફિલ્મ ‘સલામ વેંકી’માં જોવા મળશે. કાજોલે તાજેતરમાં સોશયલ મીડિયા પર આ ફિલ્મના મૂહુર્તના શોટની તસવીર પોસ્ટ કરી હતી. તેણે લખ્યું હતું કે, આજે અમે એક એવી વાર્તાની યાત્રા શરૂ કરીએ છીએ, જે જણાવવી જરૂરી હતી. એક રસ્તો જે લેવાનો હતો અને એક જીવન જે જીવવું જરૂરી હતું. અમે સલમાન વેંકીની આ અવિશ્વસનીય સત્ય કથાને તમારી સાથે શેર કરવાની રાહ જોઇ શકતા નથી. આ ફિલ્મના નિર્માતા સૂરજ સિંહ, શ્રદ્ધા અગ્રવાલ અને વર્ષા કુકરેજા છે.આ ફિલ્મની વાર્તા સત્ય ઘટના પર છે અને વાસ્તવિક પાત્રોથી પ્રેરિત છે. સલામ વેંકીમાં કાજોલ અને રેવતી દ્વારા એક પ્રશંસનીય માતાની વાત વણી લેવામાં આવી છે. જે સૌથી કઠીન પરિસ્થિતિઓ સાથે સંઘર્ષ કરતી હોય છે.

તબ્બુ અને અજય ફરીથી સાથે

એક સમયે બોલિવૂડમાં તબ્બુ અને અજય દેવગનની જોડીએ ખૂબ જ ધૂમ મચાવી હતી. હવે તે બંને લાંબા સમય પછી ફરીથી સાથે ફિલ્મમાં જોવા મળશે. તબ્બુએ સોશિયલ મીડિયા પર જણાવ્યું હતું કે, તેણે નવી ફિલ્મ ‘ભોલા’નું શૂટિંગ શરૂ કર્યું છે, જે તમિલ સુપરહિટ ફિલ્મ કૈથીની હિન્દી રીમેક છે. તબ્બુએ પોતાના ઈન્સ્ટાગ્રામ એકાઉન્ટ પર ફિલ્મના ક્લેપબોર્ડ સાથેનો ફોટોગ્રાફ પોસ્ટ કર્યો હતો. અજય દેવગન આ ફિલ્મમાં એક્ટર ઉપરાંત પ્રોડ્યુસર પણ છે.વર્ષ 2020માં જ અજય દેવગને જાહેરાત કરી હતી કે, તે કૈથીની હિન્દી રીમેક બનાવશે. આ ફિલ્મને અજયના પિતરાઇ ભાઇ ધર્મેન્દ્ર શર્મા ડિરેક્ટ કરી રહ્યા છે. તબ્બુ અને અજય દેવગને સાથે વિજયપથ, હકીકત, ગોલમાલ અગેઈન, દૃશ્યમ, દે દે પ્યાર દે જેવી ઘણી સુપરહિટ ફિલ્મ આપી છે.

કપિલ શર્મા ફરીથી ફિલ્મમાં

જાણીતા કોમેડી શોના હોસ્ટ કપિલ શર્મા ફરીથી ફિલ્મોમાં જોવા મળશે. તેને જાણીતી પીઢ અભિનેત્રી નંદિતા દાસની ફિલ્મ કામ કરવાની ઓફર મળી છે. આ ફિલ્મનું દિગ્દર્શન પણ નંદિતા જ કરશે. આ ફિલ્મમાં કપિલ શર્મા ફૂડ ડિલીવરી રાઈડરનો રોલ કરશે. ફિલ્મનું નામ હજુ નક્કી થયું નથી, પરંતુ કપિલ શર્મા સાથે હીરોઈન નક્કી થઈ ગઈ છે. શહાના ગોસ્વામી તેમની પત્નીની ભૂમિકા ભજવશે. કપિલ શર્મા અગાઉ બે ફિલ્મ કરી ચૂક્યા છે. તેની પ્રથમ ફિલ્મ કિસ કિસ કો પ્યાર કરું.. અને બીજી ફિલ્મ ફિરંગી હતી. બંને ફિલ્મો બોક્સ ઓફિસ પર ખાસ ચાલી ન હતી, જેના કારણે કપિલે ટેલિવિઝન પર ફોકસ કર્યું હતું.ફિરંગી ફિલ્મના પ્રોડ્યુસર પણ કપિલ પોતે જ હતા અને તેણે રોકેલા નાણાં પણ પાછા આવ્યા ન હતા. કપિલ તાજેતરમાં નેટફ્લિક્સના શો આઈ એમ નોટ ડન યેટમાં જોવા મળ્યો હતો. જેમાં તેમણે પોતાની લાઈફ અને સ્ટ્રગલ વિશે વાત કરી હતી. તેમણે પોતાની સાથે સંકળાયેલી કેટલીક કોન્ટ્રોવર્સીની વાત પણ કરી હતી.