ટાટા ગ્રૂપ 68 વર્ષ બાદ ફરી એર ઇન્ડિયાનું માલિક બન્યું છે.ભારત સરકારે શુક્રવારે જણાવ્યું છે કે સરકારની દેવાગ્રસ્ત એરલાઇન એર ઇન્ડિયા માટે રૂ.18,000 કરોડની બોલી લગાવી ટાટા ગ્રુપે આ કંપની ખરીદી લીધી છે. એર ઇન્ડિયા અને તેના લો કોસ્ટ એકમ એર ઇન્ડિયા એક્સપ્રેસના 100 ટકા ઇક્વિટી હિસ્સા ઉપરાંત ટાટા સન્સને ગ્રાઉન્ડ હેન્ડલિંગ કંપની એર ઇન્ડિયા SATS એરપોર્ટ પ્રાઇવેટ લિમિટેડનો 50 ટકા હિસ્સો મળશે.
નાણા મંત્રાલયના ડિપાર્ટમેન્ટ ઓફ ઈન્વેસ્ટમેન્ટ એન્ડ પબ્લિક એસેટ મેનેજમેન્ટ (ડીઆઈપીએએમ) સચિવ તુહિન કાંત પાંડેએ જણાવ્યું હતું કે, જુલાઈ 2017થી એર ઈન્ડિયાના વેચાણની પ્રક્રિયા શરૂ થઈ હતી અને સરકારને ડિસેમ્બર 2020 સુધીમાં સાત બિડર્સ મળ્યા હતા.તેમાંથી એર ઈન્ડિયા દ્વારા બેની પસંદગી કરવામાં આવી હતી. જેમાં ટાટા ગ્રુપની બોલી સૌથી વધુ હોવાથી એર ઈન્ડિયા ટાટા ગ્રુપના હસ્તક કરવામાં આવી છે.ટાટા ગ્રુપે 18,000 કરોડ રૂપિયાની બોલી લગાવી હતી.

ટાટા મોટર્સે ફોર્ડ ઇન્ડિયાના તામિલનાડુ અને ગુજરાતના પ્લાન્ટની ખરીદી કરવા મંત્રણા ચાલુ કરી છે, એમ સૂત્રોને ટાંકીને મીડિયા અહેવાલમાં જણાવાયું હતું. જો આ સોદો સફળતાપૂર્વક પાર પડશે તો આ અમેરિકાની કંપની પાસેથી તેની આ બીજી મોટી ખરીદી હશે. અગાઉ 2008માં ફોર્ડ પાસેથી જ 2.3 બિલિયન ડોલરમાં જેગુઆર લેન્ડ રોવર ખરીરી હતી.
ટાટા મોટર્સ પોતાના વ્હિકલ મેન્યુફેક્ચરિંગમાં એક મોટું પરિવર્તન કરવા જઈ રહી છે અને ઈકો ફ્રેન્ડલી કાર્સનું ઉત્પાદન કરવા જઈ રહી છે તેમાં જો ફોર્ડના ગુજરાત અને તામિલનાડુ પ્લાન્ટ ભળી જશે તો દેશની ઓટો ઇન્ડસ્ટ્રીમાં ટાટા મોટર્સની પ્રોડક્શન કેપેસીટીમાં મોટો વધારો થશે.

એશિયાના સૌથી ધનિક મુકેશ અંબાણી ભારતમાં અમેરિકાની પ્રખ્યાત રિટેલ ફૂડ ચેઇન 7 ઇલેવનના કન્વેનિયન્સ સ્ટોર્સ ભારતમાં લાવશે. રિલાયન્સ ગ્રૂપની રિલાયન્સ રિટેલ વેન્ચર્સ લિમિટેડે (RRVL) અમેરિકાના ટેક્સાસની કંપની 7-ઇલેવન સાથે ભારતમાં 7-ઇલેવન કન્વિનિયન્સ સ્ટોર્સ ભારતમાં શરૂ કરવા માટે માસ્ટર ફ્રેન્ચાઇઝી કરાર કર્યા છે.પહેલો 7-ઇલેવન સ્ટોર 9 ઓક્ટોબરે મુંબઈમાં શરૂ કરવામાં આવશે.
ફ્યુચર રિટેલે 7 ઇવેલન સાથે સમજૂતીનો અંત આણ્યા પછી રિલાયન્સે આ અમેરિકી કંપની સાથે સમજૂતી કરી છે. અગાઉ ફ્યુચર રિટેલની એસેટ ખરીદવા માટે મુકેશ અંબાણીએ એમેઝોન સાથે કોર્ટમાં લડાઈ લડવી પડી હતી. વિશ્વના 18 દેશોમાં 7-ઇલેવનના 77,000થી વધારે સ્ટોર્સ આવેલા છે. 7-ઇલેવનના પ્રેસિડેન્ટ અને ચીફ એક્ઝિક્યુટિવ ઓફિસર જોએ ડીપિન્ટોએ કહ્યું કે, ભારત વિશ્વનો બીજો સૌથી મોટો દેશ છે

અમેરિકાની દિગ્ગજ કંપની પેપ્સિકોના ભૂતપૂર્વ ચીફ એક્ઝિક્યુટિવ ઓફિસર (સીઇઓ) ઇન્દ્રા નૂયીએ તાજેતરમાં એક ઇન્ટરવ્યૂમાં જણાવ્યું હતું કે તેમણે ક્યારેય વેતન વધારો માગ્યો નથી અને નાણાકીય કટોકટી વખતે પગાર વધારો લેવાનો ઇનકાર કર્યો હતો.
ન્યૂ યોર્ક ટાઇમ્સ મેગેઝિનને આપેલા ઇન્ટરવ્યૂમાં તેમણે જણાવ્યું હતું કે “મે ક્યારેય વધારો માંગ્યો નથી. મને તે મુંઝવણભર્યું લાગે છે. કોઇના માટે કામ કરવું અને મારો પગાર પૂરતો નથી તેવું કહેવાની મે ક્યારેય કલ્પના કરી નથી.” અમેરિકાના શેરબજારના બેન્ચમાર્ક ઇન્ડેક્સ એસ એન્ડ પી 500માં સામેલ કુલ કંપનીઓમાંથી માત્ર 31 કંપનીઓના વડા મહિલા છે. પેપ્સિકોના વડા તરીકે 2018માં ન્યૂએ હોદ્દો છોડ્યો ત્યારે મહિલાઓનું પ્રમાણ ઘણું નીચું હતું. સીઇઓ તરીકેના છેલ્લાં વર્ષમાં પણ નૂયીનું વેતન અમેરિકાની ટોચની કંપનીઓના એક્ઝિક્યુટિવ્ય કરતાં ઘણું ઓછું હતું.

ગુજરાતમાં ગુરુવારે પેટ્રોલના ભાવ પ્રથમ વખત લિટર દીઠ રૂા.100ને વટાવી ગયા હતા. પેટ્રોલના ભાવમાં ગુરૂવારે 29 પૈસાનો વધારો થયો બાદ અમદાવાદ સહિત રાજ્યના 15 શહેરમાં પેટ્રોલના ભાવે સદી ફટકારી છે. અમદાવાદમાં પેટ્રોલનો ભાવ પ્રથમ વખત રૂ. 100 પર પહોંચ્યો છે જ્યારે અમદાવાદ ઉપરાંત રાજ્યના અન્ય શહેરોમાં પણ પેટ્રોલ રૂ. 100 કે તેના કરતા વધુ ભાવે વેચાઈ રહ્યું છે. ભારતમાં છેલ્લાં એક વર્ષમાં પેટ્રોલના ભાવમાં આશરે 30 ટકાનો ઉછાળો આવ્યો છે.
અમદાવાદમાં છેલ્લા કેટલાક સમયથી પેટ્રોલના ભાવ રૂ. 98ની આસપાસ રહેતા હતા. લગભગ એક મહિના કરતા વધુ સમય સુધી આ ભાવ સ્થિત રહ્યાં બાદ છેલ્લા દશેક દિવસથી પેટ્રોલના ભાવોમાં થઈ રહેલા સતત વધારાના પગલે ઈતિહાસમાં પહેલીવાર અમદાવાદમાં પેટ્રોલના ભાવ રૂ. 100 પર પહોંચી ગયા છે.

દીપિકા પદુકોણને ગ્લોબલ અચીવર્સ એવોર્ડ

દીપિકા પદુકોણની સફળતામાં વધુ એક છોગું ઉમેરાયું છે. દીપિકા પદુકોણને એક ઇન્ટરનેશનલ સંસ્થા દ્વારા બોલીવૂડમાં સર્વશ્રેષ્ઠ અભિનેત્રીનો ગ્લોબલ અચીવર્સ એવોર્ડ 2021 જાહેર કરવામાં આવ્યો છે.
આ યાદીમાં બરાક ઓબામા, જેક બેજોસ, ક્રિસ્ટિયાનો રોનાલ્ડ જેવી વૈશ્વિક લોકપ્રિય હસ્તીઓના નામ સામેલ છે. ગ્લોબલ એવોર્ડ 2021 માટે આ વર્ષે ત્રણ હજારથી વધુ નોમિનેશન મળ્યા હતા. જ્યૂરી માટે વિજેતાઓની પસંદગી કરવાનું કામ મુશ્કેલ હતું.દરેક વ્યક્તિ પોતાના ક્ષેત્રમાં સફળ જ હતી. દીપિકા એક વર્લ્ડ આઇકોન છે, જે પોતાના ફેશન સ્ટેટમેન્ટથી જ નહીં પણ પોતાની ફિલ્મો અને પરફોર્મન્સ સ્કિલ માટે જાણીતી છે. તેણે મનોરંજન વિશ્વમાં પોતાનું આગવું સ્થાન ઊભું કર્યું છે.

અંતે ‘ગંગુબાઈ…’ની રીલીઝની તારીખ જાહેર થઈ

સંજય લીલા ભણશાળીની બહુચર્ચિ ફિલ્મ ‘ગંગુબાઈ કાઠિયાવાડી’ની રિલીઝ નવી તારીખ જાહેર થઇ ગઇ છે. અગાઉ આ ફિલ્મને આ વર્ષે રિલીઝ કરવાની જાહેરાત કરવામાં આવી હતી. આલિયા ભટ્ટ અને અજય દેવગણ અભિનિત આ ફિલ્મ આવતા વર્ષે 6 જાન્યુઆરીએ રિલીઝ કરાશે.
કોરોના મહામારીના કારણે ફિલ્મના મેકર્સે નવી રિલીઝ તારીખ જાહેર કરી છે. આલિયા ભટ્ટે પણ નવી તારીખ સાથેનું પોસ્ટર શેર કરતાં લખ્યું, ‘ગંગુબાઈ કાઠિયાવાડી’ મારા દિલ અને આત્માનો ટુકડો છે. તેને 6 જાન્યુઆરી 2022ના રોજ તમારી નજીકના સિનેમાઘરોમાં લાવી રહ્યા છીએ.’ ઉલ્લેખનીય છે કે, મહારાષ્ટ્રમાં 22 ઓક્ટોબરથી થિયેટરો ખુલવાની જાહેરાત રાજ્ય સરકારે કરી હતી. મહારાષ્ટ્ર સરકારની આ જાહેરાત બાદ ફિલ્મકારોએ અત્યાર સુધી રોકી રાખેલી ફિલ્મોની રિલીઝ ડેટની જાહેરાત કરવાનું શરૂ કર્યું હતું. છેલ્લા દોઢ વર્ષમાં કોરોનાના કારણે ઘણી ફિલ્મો રિલીઝ નહોતી થઈ શકી, જે હવે આ વર્ષના બાકીના મહિનાઓ અને 2022માં રિલીઝ થશે.

સૈફઅલી ખાનને મળ્યો પોલીસ અધિકારીનો રોલ

કરીના કપૂરના પતિ સૈફઅલી ખાન અને રિતિક રોશન નવી ફિલ્મમાં સાથે દેખાશે. વિક્રમ વેધા ફિલ્મમાં સૈફ વિક્રમ નામના પોલીસ અધિકારીની ભૂમિકા ભજવશે. અગાઉ પણ એક વેબસીરિઝમાં સૈફે આવો રોલ કર્યો હતો તેથી તેણે બંને ભૂમિકા અંગે સ્પષ્ટતા કરી હતી. સૈફ અને રિતિકની આ ફિલ્મ સાઉથની સુપરહિટ ફિલ્મ વિક્રમ વેધાની હિન્દી રીમેક છે. આ તમિલ ફિલ્મમાં વિજય સેતુપતિ અને આર.માધવને અભિનય કર્યો હતો.

સુનિલ શેટ્ટીનું પણ વેબસીરિઝમાં પદાર્પણ

બોલીવૂડમાંથી ઘણા કલાકારોએ નવા જમાના ઓટીટી પ્લેટફોર્મ પર નસીબ અજમાવ્યું છે. હવે યાદીમાં સુનિલ શેટ્ટીનું નામ પણ જોડાયું છે. તે ‘ઇનવિઝિબલ વૂમન’થી વેબસીરિઝના ક્ષેત્રે પદાર્પણ કરી રહ્યો છે. આ એક એકશન થ્રીલર સીરિઝ હશે જેમાં તેની સાથે ઇશા ગુપ્તા પણ દેખાશે. આ અંગે સુનિલે જણાવ્યું હતું કે, મને એવી વેબસીરિઝમાં કામ કરવાની ઇચ્છા હતી જેની વાર્તા અને વિષય અન્ય કરતા અલગ હોય.ઇનવિઝિબલ વૂમનની વાર્તાએ મારું તરત જ ધ્યાન ખેંચ્યુ હતું અને હું કામ કરવા તૈયાર થયો હતો. તેણે વધુમાં કહ્યું હતું કે, યાડલી સાથે કામ કરવામાં હું ખુશી અનુભવી રહ્યો છું. મને પોતાની સીરિઝનો હિસ્સો બનાવ્યો અને આ રીતે મને ડિજિટલ પ્લેટફોર્મ પર કામ કરવાની તક મળી.

સોનાક્ષી કેમ નારાજ છે?

શત્રુઘ્ન સિંહાની પુત્રી સોનાક્ષી બોલીવૂડમાં સ્પષ્ટ વક્તા તરીકે જાણીતી છે. તેણે ફિલ્મ ઇન્ડસ્ટ્રીમાં સ્ટાર કિડસ પ્રત્યેની સતત ચર્ચા અને પ્રશ્રોનો ઉત્તર આપીને આઉટસાઇડર્સ પર નિશાન સાધ્યું છે.
તેણે એક ઇન્ટરવ્યૂમાં જણાવ્યું હતુ કે, સ્ટાર કિડસને પણ ફિલ્મોમાંથી બહાર કાઢવામાં આવતા હોય છે. મનોરંજન વિશ્વમાં પણ એવું જોવા મળે છે કે કોઇ સ્ટાર કિડને અન્ય સ્ટાર કિડને કારણે પ્રોજેક્ટમાંથી દૂર કરવામાં આવ્યા છે.