બિન નિવાસી ભારતીયો (એનઆરઆઇ)એ ભારતમાં કોરોના મહામારીની બીજી લહેર દરમિયાન ભારતમાં પરિવારને આર્થિક રીતે સુરક્ષિત બનાવવા માટે જંગી ભંડોળ મોકલ્યું હોય તેમ લાગે છે. 2021-22ના એપ્રિલ જૂન ક્વાર્ટરમાં ગુજરાતની બેન્કોમાં એનઆરઆઇ ડિપોઝિટ્સ રૂા.5,950 કરોડ વધીને રૂા.81,070 કરોડ થઈ હતી, જે ગયા નાણાકીય વર્ષના સમાન ગાળામાં રૂા.75,120 કરોડ હતી, એમ સ્ટેટ લેવલ બેન્કર્સ કમિટી (એસએલબીસી)ના તાજેતરન ડેટામાં જણાવાયું હતું.
છેલ્લાં ચાર નાણાકીય વર્ષના પ્રથમ ક્વાર્ટર દરમિયાન એનઆરઆઈ ડિપોઝિટમાં આ સૌથી મોટો ઉછાળો છે. બેન્કિંગ સૂત્રોના જણાવ્યું હતું કે લોકડાઉન પછી ઇન્ટરનેશનલ ફ્લાઇટ ફરી ચાલુ થવામાં વિલંબ થયો હતો. હવાઇ સુવિધાને કારણે ઘણા એનઆરઆઇ ગુજરાતમાં ફસાઈ ગયા હતા. કોરોનાની અનિશ્ચિતતાને કારણે ઘણા એનઆરઆઇએ ગુજરાતમાં તેમના પરિવારજનોને આકસ્મિક ખર્ચને પહોંચી વળવા માટે જંગી ભંડોળ મોકલ્યું હતું

ગુજરાત વિધાનસભામાં મંગળવારે રજૂ કરવામાં આવેલા કોમ્પ્ટ્રોલર એન્ડ ઑડિટર જનરલ (કેગના ગુજરાત રાજ્ય ફાઇનાન્સ ઓડિટના રિપોર્ટમાં જણાવાયું હતું કે ગુજરાત સરકારનું જાહેર દેવું વધીને રૂા. 3,15,455 કરોડનું થઈ છે. જોકે રિપોર્ટમાં જણાવાયું હતું કે આ દેવુ ગ્રોસ સ્ટેટ ડોમેસ્ટિક પ્રોડક્ટ્સ (રાજ્યની જીડીપીના 18.96 ટકા છે. આ પ્રમાણ 14માં નાણા પંચે નક્કી કરેલી 25.76 ટકાની મર્યાદામાં છે.
આ રિપોર્ટ મુજબ ગુજરાત સરકારના 2019-20ના બજેટમાં જાહેર દેવું રૂા.2,67,095 કરોડ રહેવાનો અંદાજ હતો. જોકે સરકારે કરેલા આયોજન મુજબ 2023-24 સુધીમા ગુજરાતનું જાહેર દેવું રૂા. 4,10,989 કરોડની સપાટીએ પહોંચી જવાની ધારણા મૂકવામાં આવી રહી છે.

કેમિકલ, સોફ્ટવેર અને ફાર્માસ્યુટિકલ્સ જેવા બિઝનેસના મૂલ્યમાં વધારાને ભારતે છેલ્લા 12 મહિનામાં દર મહિને પાંચ બિલિયોનેર્સમાં વઘારો થયો છે. બિલિયનેર્સમાં ગૌતમ અદાણી અને પરિવાર રૂ. 5.1 લાખ કરોડની એસેટ સાથે (261%ની વૃદ્ધિ) સાથે પહેલીવાર એશિયાના બીજા સૌથી વધુ ધનિક બન્યા છે. તેમના પરિવારે ગયા વર્ષની સરખામણીમાં એક દિવસમાં 1 હજાર કરોડ રૂપિયાનો ઉમેરો કર્યો છે, હુરુન ઈન્ડિયા રિચ લિસ્ટમાં જણાવામાં આવ્યું છે. આ યાદીમાં સીરમ ઈન્સ્ટિટ્યૂટ ઓફ ઈન્ડિયાના વેક્સિન કિંગ તરીકે ઓળખાતા સાયરસ એસ પૂનાવાલા, 1,63,700 કરોડ રૂપિયાની એસેટ સાથે છઠ્ઠા સ્થાને રહ્યાં હતા. આઈઆઈએફએલ હેલ્થ હુરુન ઈન્ડિયા રિચ લિસ્ટમાં પ્રવેશ મેળવનારાઓની સંખ્યા દસ વર્ષ પહેલા માત્ર 100થી વધીને આજે 1,007 થઈ ગઈ છે.
મુકેશ અંબાણી (ઉંમર 64) 7.2 લાખ કરોડ રૂપિયાની સાથે સતત 10મા વર્ષે સૌથી ધનિક ભારતીય બન્યા છે. કોમોડિટીની કિંમતોમા વધારો થવાથી લક્ષ્મી મિત્તલ (ઉંમર 71) અને કુમાર મંગલમ બિરલા (ઉંમર 54) સહિતના ધનાઢ્ય ભારતના ટોપ 10મા સામેલ થયા છે.

ભારત દુબઇના બીજા ક્રમના સૌથી મોટા વેપાર ભાગીદાર તરીકે ઊભર્યું છે. બંને દેશો વચ્ચે 2021ના પ્રથમ છ મહિનામાં 38.5 બિલિયન દિરહામનો વેપાર થયો હતો.
દુબઈનો સૌથી મોટો વેપાર ભાગીદાર ચીન છે, એમ 26 સપ્ટેમ્બરે જારી કરવામાં આવેલા સત્તાવાર ડેટામાં જણાવ્યું હતું. દુબઈનો ભારત સાથેનો વેપાર 2021ના પ્રથમ છ મહિનામાં ગયા વર્ષના સમાન ગાળાની સરખામણીમાં 74.5 ટકા વધ્યો હતો. દુબઇ સરકારના નિવેદન અનુસાર, ૨૦૨૧ના પ્રથમ અર્ધવાર્ષિકમાં અમીરાતનો અને ચીન વચ્ચેનો વેપાર 86.7 બિલિયન દિરહામ રહ્યો હતો. ચીન સાથેના વેપારમાં વાર્ષિક ધોરણે ૩૦.૭ ટકા વૃદ્ધિ નોંધાવી છે. વર્ષ ૨૦૨૧ના પ્રથમ છ મહિનામાં અમેરિકાએ દુબઈ સાથે 32 બિલિયન દિરહામનો વેપાર કર્યો હતો જે વાર્ષિક ધોરણે ૬૩૭.૪૮ બિલિયન રૂપિયાથી માત્ર ૧ ટકા વધારે છે.

ભારતમાં સોનામાં રોકાણ કરવાનો નવો વિકલ્પ ઉપલબ્ધ બન્યો છે. શેરની જેમ સોનાની ખરીદી અને વેચાણ માટે હવે ગોલ્ડ સ્પોટ એક્સચેન્જને મંજૂરી આપવામાં આવી છે. મૂડીબજારની નિયમનકારી સંસ્થા સેબી સ્પોટ ગોલ્ડ એક્સચેન્જને મંજૂરી આપી છે. શેરની જેમ જ સોનું ખરીદી અને વેચી શકાશે. ગોલ્ડ એક્સચેન્જ પણ ઘણા ખરા અંશે સ્ટોક એક્સચેન્જની જેમ જ એક માર્ટેક તરીકે કામ કરશે. આ માર્કેટમાં લોકો સોનાની ખરીદી અને વેચાણ કરવા માટે ઓર્ડર આપી શકશે. ખરીદનારાઓને ગોલ્ડ ઓર્ડરની ડિલિવરી કરવામાં આવશે.
રોકાણકાર ફિઝિકલ ડિલિવરી નહીં લેવાનો નિર્ણય પણ કરી શકે છે અને બાદમાં નફો થાય ત્યારે વેચી શકે છે. હાલમાં વિશ્વના ઘણા દેશોમાં ગોલ્ડ એક્સચેન્જ છે. ચીનના શાંઘાઈ, હોંગકોંગ અને યુકેમાં લંડન, અમેરિકામાં ન્યૂયોર્ક વિશ્વના સૌથી જાણીતા ગોલ્ડ એક્સચેન્જ છે.

કપિલ શર્માનો કોમેડી શો નવા વિવાદમાં

જાણીતો કોમેડી શો- ધ કપિલ શર્મા શોના પ્રોડ્યુસર્સ સામે એક એપિસોડને કારણે પોલીસ ફરિયાદ નોંધાઇ છે. જેમાં શોના કલાકારો કોર્ટરૂમના સીનમાં દારૂ પીતા બતાવવામાં આવ્યા હતા. ફરિયાદીએ કોમેડી શોના નિર્માતાઓ પર કોર્ટનો અનાદર કરવાનો આરોપ મુક્યો છે. સુરેશ ધાક્કડ નામના વકીલ દ્વારા તાજેતરમાં મધ્યપ્રદેશના શિવપુરી જિલ્લાની સેશન્સ કોર્ટમાં કેસ દાખલ કરવામાં આવ્યો હતો, જેમણે દાવો કર્યો હતો કે 21 એપ્રિલે સોની ટીવી પર આ ‘વાંધાજનક દૃશ્યો’ સાથેનો એપિસોડ પ્રસારિત થયો હતો.
ધાક્કડના જણાવ્યા અનુસાર, શોના એન્કર કપિલ શર્મા અને સોની ટીવી ડાયરેક્ટર એમપી સિંહ વિરુદ્ધ IT એક્ટ અને એક્સાઇઝ એક્ટ હેઠળ કેસ નોંધવામાં આવ્યો છે. વકીલે જણાવ્યું હતું કે, ‘કોર્ટરૂમના દૃશ્યમાં, કલાકાર દારૂની બોટલ સાથે સ્ટેજ પર આવે છે અને અન્ય લોકોને તે પીવાનું કહે છે. આ દ્રશ્ય કોર્ટની ગરિમાનું ઉલ્લંઘન કરે છે. તેમાં વૈધાનિક ચેતવણી પણ દર્શાવવી જોઈએ, જે તેણે કરી ન નથી.”

કરણ જોહરની ફિલ્મમાં દેખાશે બોક્સિંગ ચેમ્પિયન ટાઈસન

જાણીતા ફિલ્મનિર્માતા કરણ જોહરે તાજેતરમાં જણાવ્યું હતું કે, એક સમયના વિશ્વના બોક્સિંગ ચેમ્પિયન માઈક ટાઈસન તેની નવી ફિલ્મમાં અભિનય કરતો જવા મળશે. ‘લાઈગર’નામની આ ફિલ્મમાં તે પદાર્પણ કરશે, જેમાં વિજય દેવરાકોન્ડા અને અનન્યા પાંડે પણ કામ કરશે છે. કરણ જોહરે આ અંગે સોશિયલ મીડિયા પર જણાવ્યું હતું કે ટાઇસને પ્રથમવાર જ બોલીવૂડ ફિલ્મમાં જોવા મળશે. કરણે ટાઈસનની એક ક્લીપ પણ પોસ્ટ કરી હતી જેમાં તે ટાઈસનને રજૂ કરતા કહે છે કે બોક્સિંગ રિંગમાં ઈતિહાસ રચનાર અને હંમેશા અપરાજિત ગ્રેટ માઈક ટાઈસન અમારા પ્રતિષ્ઠિત પ્રોજેકટમાં જોવા મળશે.
આ ક્લિપ પરથી અંદાજ લગાવી શકાય છે કે, આ સ્પોર્ટ્સ ફિલ્મમાં મુખ્ય અભિનેતા વિજયની રિંગમાં વર્લ્ડ ચેમ્પિયન માઈક ટાઈસન સામે ટકરાશે. આ સમાચાર જાણીને વિજય ખૂબ જ ખુશ થયો હતો અને તેણે પણ સોશિયલ મીડિયામાં માઈક ટાઈસનની પ્રશંસા કરી હતી.

શાહરુખને મળ્યું મહત્ત્વનું સન્માન

બોલીવૂડ બાદશાહ-બાઝિગર શાહરુખ ખાનને તાજેતરમાં એક અનોખું સન્માન પ્રાપ્ત થયું છે. તેને આ સન્માન કોઇ એવોર્ડ તરીકે મળ્યું નથી. પરંતુ તેનું નામ ઇન્ડિયન સાઇન લેન્ગવેજ ડિકશનરીમાં સામેલ થયું છે. દર વર્ષે ૨૩ સપ્ટેમ્બરના દિવસને ઇન્ટરનેશનલ સાઇન લેન્ગવેજ ડે તરીકે ઉજવવામાં આવે છે. ભારતમાં દિવ્યાંગ લોકોની મુશ્કેલીને ઓછી કરવા માટે ભારતીય સાંકેતિક ભાષાના શબ્દકોશનો પ્રારંભ કરવામાં આવ્યો હતો. આ ડિકશનરીમાં શાહરુખ ખાનને પણ સામેલ કરવામાં આવ્યો છે.

મિસ્ટ્રી-થ્રિલર વેબસીરિઝમાં રવીના

રવીના ટંડનના ચાહકો માટે એક સમાચાર છે. તે હવે ફરીથી વેબસીરિઝના પડદે જોવા મળશે. વીડિયો સ્ટ્રીમિંગ સર્વિસ નેટફ્લિક્સ પર તેનો વેબ-શો ‘અરણ્યક’ પ્રદર્શિત થવાનો છે. આ શો દ્વારા તે ડિજિટલ પ્લેટફૉર્મ પર પદાર્પણ કરી રહી છે. આ શોમાં તેની સાથે આશુતોષ રાણા અને પરમબ્રતા ચેટરજી મુખ્ય ભૂમિકામાં જોવા મળશે. રવીના પોલીસ અધિકારીની ભૂમિકામાં જોવા મળશે. તે હિમાલયના ગાઢ જંગલમાં એક છોકરીને શોધવા જાય છે એ દરમ્યાન તેને હાડપિંજરો મળી આવે છે.

તારક મહેતા કા ઉલ્ટા ચશ્મા’ ફેમ ‘નટુકાકા’નું નિધન

લોકપ્રિય ટીવી કોમેડી શો ‘તારક મહેતા કા ઉલ્ટા ચશ્મા’થી જાણીતા ‘નટુકાકા’ એટલે કે ઘનશ્યામ નાયકનું રવિવારે 77 વર્ષની ઉંમરે નિધન થયું હતું. તેઓને છેલ્લા એક વર્ષથી કેન્સર હતુ. તેઓ 55 વર્ષથી વધારે સમયથી મનોરંજન ઈન્ડસ્ટ્રી સાથે જોડાયેલા છે. ટીવી સિરિયલ ‘તારક મહેતા કા ઉલ્ટા ચશ્મા’માં ગડા ઈલેક્ટ્રોનિક્સના ‘નટુકાકા’ એટલે કે ઘનશ્યામ નાયકને આ પાત્રએ ચોતરફ ઓળખ અપાવી અને પોતાની એક્ટિંગથી તેમણે આ રોલને જીવંત કર્યો હતો.
ઘનશ્યામ નાયક મૂળ ગુજરાતના હતા. તેમણે 31 ફિલ્મોમાં કામ કર્યું હતું. હિન્દી ઉપરાંત તેમણે ગુજરાતી ટીવી સિરિયલોમાં પોતાની પ્રતિભાનો પરચો બતાવ્યો હતો.