ભારત અને બ્રિટનને મુક્ત વેપાર સમજૂતી (FTA) માટે પહેલી નવેમ્બર 2021થી મંત્રણા ચાલુ કરવાની યોજના બનાવી છે. આ સર્વગ્રાહી સમજૂતી પહેલા વહેલાસરના લાભ માટે વચગાળાની અર્લી હાર્વેસ્ટિંગ સમજૂતી કરવામાં આવશે, એમ ભારતના કોમર્સ એન્ડ ઇન્ડસ્ટ્રી મંત્રાલયે જણાવ્યું હતું.
બંને દેશો આગામી વર્ષના માર્ચ સુધીમાં વચગાળાની વેપાર સમજૂતી કરવા માંગે છે. આ પછી બંને દેશો વચ્ચે સર્વગ્રાહી મુક્ત વેપાર સમજૂતી (FTA) થશે. વચગાળાની સમજૂતીમાં ટોચનું પ્રાધાન્ય ધરાવતી કેટલીક મહત્ત્વની પ્રોડક્ટ્સ અને સર્વિસમાં ટેરિફ અને માર્કેટ એક્સેસ અંગે પ્રારંભિક કન્સેશન આપવાની દરખાસ્ત છે.
કોમર્સ એન્ડ ઇન્ડસ્ટ્રી પ્રધાન પીયૂષ ગોયલે જણાવ્યું હતું કે વચગાળાની વેપાર સમજૂતી એફટીએ માટેનું પ્રથમ પગલું છે. આ ભાગીદારીથી બંને દેશોને વિપુલ પ્રમાણમાં વહેલાસરના લાભ થશે.

ભારત સરકારની માલિકીની દેવાના ડુંગર હેઠળની એરલાઇન એર ઇન્ડિયાને ખરીદવા માટે ટાટા ગ્રૂપ અને સ્પાઇસજેટના પ્રમોટર અજયસિંહે ફાઇનાન્શિયલ બિડ કર્યા છે. આમ હવે સરકારી એરલાઇનનું ખાનગીકરણ કરવાની પ્રક્રિયા અંતિમ તબક્કામાં પ્રવેશી છે. ટાટા સન્સે તેની 100 ટકા માલિકીની કંપની ટેલેસ પ્રાઇવેટ લિમિટેડ મારફત બિડ કરી છે, જ્યારે અજયસિંહે કેટલાંક ઇન્વેસ્ટમેન્ટ ફંડ્સના સપોર્ટ સાથે વ્યક્તિગત ક્ષમતાએ બિડ કરી છે.
ખાનગીકરણ પ્રક્રિયાના ભાગરૂપે માટે આ ફાઇનાન્શિયલ બિડ મંગાવવામાં આવ્યા હતા. આ પ્રક્રિયા હવે અંતિમ તબક્કામાં પ્રવેશી છે, એમ ગુરુવારે સરકારે જણાવ્યું હતું. એર ઇન્ડિયાને ખરીદવા ટાટા ગ્રૂપ સહિતની કંપનીઓએ ફાઇનાન્શિયલ બિડ્સ કર્યા છે. જોકે સરકારે બિડર્સના નામ જાહેર કર્યા ન હતા.
ટાટા સન્સના પ્રવક્તાએ જણાવ્યું હતું કે કંપનીએ એર ઇન્ડિયા માટે બિડ કરી છે. ઉદ્યોગના સૂત્રોના જણાવ્યા અનસાર સ્પાઇસજેટના પ્રમોટર અજય સિંહે પણ ફાઇનાન્શિયલ બિડ્સ કરી હોવાની શક્યતા છે.

ભારતીય અર્થતંત્ર કોરોનાની ગંભીર અસરનો સામનો કરી રહ્યું હોવા છતાં વૈશ્વિક રોકાણકારો ભારતમાં રોકાણ કરવા ઉત્સાહ ધરાવી રહ્યા છે. ડેલોઈટ દ્વારા વૈશ્વિક સ્તરના ૧૨૦૦ બિઝનેસ લીડર્સના હાથ ધરાયેલા સર્વમાંથી ૪૪ ટકાએ ભારતમાં વધુ રોકાણ કરવા અથવા પ્રથમ વખત રોકાણ કરવાની પોતાની યોજના હોવાનું જણાવ્યું હતું.
ભારત વિશે વૈશ્વિક રોકાણકારોની કેવી માન્યતા છે તેનો અંદાજ મેળવવા આ સર્વે હાથ ધરાયો હતો. પ્રથમ વખત થનારા ઈન્વેસ્ટમેન્ટમાંથી અંદાજે ૬૫ ટકા ઈન્વેસ્ટમેન્ટ આગામી બે વર્ષમાં જોવા મળવાની અપેક્ષા છે. ભારતમાં વેપાર સંબંધિત માન્યતાઓ સિંગાપુર તથા જાપાનની સરખામણીએ અમેરિકા તથા યુકેમાં સારી છે. વર્તમાન વર્ષમાં જ્યારે ભારતમાં કોરોનાની બીજી લહેર એકદમ જ વકરેલી હતી ત્યારે આ સર્વે હાથ ધરાયો હતો.

ભારત સરકારે નાણાભીડનો સામનો કરી રહેલા ટેલિકોમ ક્ષેત્ર માટે રાહત પેકેજની સાથે ધરખમ સુધારાની બુધવાર, 16 સપ્ટેમ્બરે જાહેરાત કરી હતી. આ ક્ષેત્રમાં સરકારે ઓટોમેટિક રૂટ હેઠળ 100 ટકા સીધા વિદેશી રોકાણ (એફડીઆઇ)ની મંજૂરી આપી છે. આમ હવે વિદેશી રોકાણ માટે સરકાર કે રિઝર્વ બેન્કની મંજૂરી લેવી પડશે નહીં. સરકારે ટેલિકોમ ક્ષેત્રને તમામ સરકારી ચુકવણીમાં મોરેટોરિયમની જાહેરાત કરી હતી. સરકારના પગલાંથી વોડાફોન આઇડિયાને સૌથી વધુ લાભ થવાની ધારણા છે.

ભારતનું સૌથી મોટું અને જૂનુ ઔદ્યોગિક જૂથ ટાટા ગ્રૂપની હોલ્ડિંગની કંપની ટાટા સન્સે લીડરશિપ સ્ટ્રક્ચરમાં મોટા ફેરફારની શક્યતાને નકારી કાઢી હતી. ટાટા સન્સના ચેરમેન એન ચંદ્રસેકરને જણાવ્યું હતું કે કંપનીની મેનેજમેન્ટ સ્ટ્રક્ચરમાં કોઇ ફેરફાર થશે નહીં અને જો કોઇ નિર્ણય લેવાશે તો તે નોમિનેશન અને રેમ્યુનરેશન કમિટી કરશે.
ટાટા સન્સ સીઇઓનો હોદ્દો બનાવીને તેના લીડરશીપ સ્ટ્રક્ચરમાં ઐતિહાસિક ફેરફાર કરી રહી હોવાના અહેવાલ અંગે તેઓ પ્રતિક્રિયા આપી રહ્યાં હતા. તેમણે જણાવ્યું હતું કે કંપનીના રોજિંગ બિઝનેસમાં વિક્ષેપ ઊભી કરતાં આવા અહેવાલોથી અમે ઘણા નિરાશ થયા છે. ટાટા ટ્રસ્ટના ચેરેમન રતન ટાટાએ પણ આવા અહેવાલો અંગે નિરાશા વ્યક્ત કરી હતી.

નવી ફિલ્મની રાહમાં નરગિસ ફકરી

નરગિસ ફકરીએ દસ વર્ષના સમયગાળામાં પોતાનું એક ચોક્કસ સ્થાન બનાવ્યું છે. તેણે રણબીર કપૂર સાથેની ફિલ્મ રોકસ્ટારથી કારકિર્દીની શરૂઆત કરી હતી. તે નવેમ્બરમાં કારકિર્દીના દસ વર્ષ પૂર્ણ કરશે. જોકે, તે ફિલ્મો કરતા ઉદય ચોપરા સાથેના સંબંધના કારણે વધુ ચર્ચામાં હતી.
હવે નરગિસને ફરીથી બોલીવૂડમાં સક્રિય થવું છે અને તે સારા પ્રોજેક્ટ અને પાત્ર મળવાની રાહ જોઇ રહી છે. તાજેતરના એક ઇન્ટવ્યૂમાં તેણે જણાવ્યું હતું કે, તેણે અને ઉદય ચોપરાએ કદી ડેટ કરી રહ્યા હોવાની સ્પષ્ટતા જાહેરમાં કરી નહોતી. જોકે, કહેવાય છે કે તેઓ પાંચ વર્ષ સુધી ડેટ કરી રહ્યા હતા. ઉદય ચોપરા સાથેના સંબંધને મીડિયામાં ખબર ન પડવા દેવાની નરગિસની આસપાસના લોકોએ તેને ખાસ સલાહ આપી હતી. આમ, છતાં તેઓ એક પ્રાઇવેટ હોલીડે પર ગયા હતા ત્યારની તસવીર લીક થઇ ગઇ હતી.

વેબસીરિઝ માટે બોબી એવોર્ડથી સન્માનિત

ઓટીટી પ્લેટફોર્મ પર ગત વર્ષે પ્રસારિત થયેલી વેબ સીરિઝ આશ્રમ માટે બોબી દેઓલને એવોર્ડ આપવામાં આવ્યો છે. મુંબઇ ખાતે રાજભવનમાં આયોજિત એક સમારંભમાં મહારાષ્ટ્રના રાજ્યપાલ ભગત સિંહ કોશિયારીએ તેનું સમ્માન કર્યું હતું. આ સમારંભમાં મિલિટરીના અધિકારીઓ સહિત બોલીવૂડની ઘણી સેલિબ્રિટીઝ હાજર હતી.
ઉલ્લેખનીય છે કે, બોબીને આ જ વેબસીરિઝ માટે દાદાસાહેબ ફાળકે ઇન્ટરનેશનલ એવોર્ડથી પણ સમ્માનિત કરવામાં આવ્યો છે. આ અંગે પ્રતિક્રિયા આપતા બોબીએ જણાવ્યું હતું કે, વેબસીરિઝ ‘આશ્રમ’ માટે ૨૭મા સોલ લાયન્સ ગોલ્ડ એવોર્ડ 2021માં ઓટીટી પ્લેટફોર્મના સર્વશ્રેષ્ઠ અભિનેતા તરીકે આ સમ્માન મેળવવું એ મારા માટે ગર્વની વાત છે.

જહાન્વી કપૂર અને અક્ષત રાજનનું બ્રેકઅપ નથી થયું, કિસનો વીડિયો વાઇરલ

અગાઉ એવી ચર્ચા હતી કે શ્રીદેવી અને બોની કપૂરની દીકરી જ્હાન્વી કપૂરનું તેના બોય ફ્રેન્ડ અક્ષત રાજન સાથે બ્રેકઅપ થઇ ચૂક્યું છે. પરંતુ તાજેતરની જ એક ઘટના અને વાઇરલ થયેલા વીડિયો પરથી કહી શકાય કે તેમના સંબંધો અગાઉ જેવા જ યથાવત છે. જહાન્વીએ થોડા દિવસ પહેલા અક્ષત રાજન તથા બહેન ખુશી કપૂર સાથે પાર્ટી કરી હતી. જાહન્વીએ પાર્ટીની તસવીરો-વીડિયો સોશિયલ મીડિયામાં પોસ્ટ કરી હતી, આમાંથી જ એક વીડિયોમાં અક્ષત, જ્હાન્વીને ગાલ પર કિસ કરતો હોય તેવું જોવા મળે છે.

મારો કોઇ ગોડફાધર નથીઃ યામી

યામી ગૌતમે આ વર્ષે 4 જુનના રોજ ફિલ્મ ડાયરેકટર આદિત્ય ધર સાથે લગ્ન કર્યા છે. તેણે જણાવ્યું છે કે, બોલીવૂડમાં તેનો કોઇ ગોડફાધર નથી. યામીએ એક ઇન્ટરવ્યૂમાં પોતાની કારકિર્દી અંગે જણાવ્યું હતું કે, વર્ષ 2012માં તેણે વિકી ડોનર ફિલ્મથી બોલીવૂડમાં પદાપર્ણ કર્યું હતું.
જોકે, અભિનયની શરૂઆત તેણે ટીવી સીરિયલ ચાંદ કે પાર ચલો…થી કરી હતી. આવતા વર્ષે યામી પોતાની કારકિર્દીનો એક દાયકો પૂર્ણ કરશે. તેણે જણાવ્યું હતું કે, મેં મારી આવડત અને નસીબના આધારે પર બોલીવૂડમાં કારકિર્દી બનાવી છે.

ડિસ્કવરી ચેનલના શોમાં અજયને મળ્યું સ્થાન

જાણીતા સર્વાઇવલ સ્કિલ શો ‘ઇન ટુ ધ વાઇલ્ડ વીથ બેર ગ્રીલ્સ’માં હવે અજય દેવગણ જોવા મળશે. આ રોમાંચક સફરનો હિસ્સો બનવા બદલ અજયે ખુશી વ્યક્ત કરી હતી. ડિસ્કવરી ચેનલ પરથી પ્રસારિત થતો આ શોના નવા એપિસોડ માટે અજય દેવગણની પસંદગી કરવામાં આવી છે. બેર ગ્રિલ્સે ઇન્સ્ટાગ્રામ પર જણાવ્યું છે કે, બોલીવૂડના બે યોદ્ધા તેમની સાથે ઇન ટુ ધ વાઇલ્ડમાં જોવા મળશે. જેમાં અજય દેવગણનું નામ સામેલ છે પરંતુ બીજા અભિનેતા અંગે જણાવ્યું નથી.