ફાઇનાન્શિયલ ક્ષેત્રમાં દ્વિપક્ષીય સંબંધોને વધુ મજબૂત બનાવવા માટે બ્રિટન અને ભારત વચ્ચેના ફાઇનાન્શિયલ માર્કેટ ડાયલોગ (FMD)ની પ્રથમ વર્ચ્યુઅલ બેઠક 9 જુલાઇએ યોજાઈ હતી. આ બેઠકમાં બંને દેશો વચ્ચે ફાઇનાન્શિયલ સર્વિસ ક્ષેત્રમાં સહકારમાં વધારો કરવાની નોંધપાત્ર તક હોવા અંગે સહમતી સધાઈ હતી.
આ બેઠકમાં ચાર મુખ્ય મુદ્દા પર સહકારમાં વધારો કરવા પર ધ્યાન કેન્દ્રીત કરવામાં આવ્યું હતું. આ ચાર મુદ્દામાં ગુજરાત ઇન્ટરનેશનલ ફાઇનાન્સ ટેક (ગિફ્ટી) સિટી, બેન્કિંગ એન્ડ પેમેન્ટ, ઇન્શ્યોરન્સ અને કેપિટલ માર્કેટનો સમાવેશ થાય છે. બેઠકની આગેવાની બ્રિટનના નાણામંત્રાલય અને ભારતના નાણામંત્રાલયના વરિષ્ઠ અધિકારીઓએ લીધી હતી અને તેમાં બંને દેશોની સ્વતંત્ર નિયમનકારી એજન્સીઓએ ભાગ લીધો હતો. આ બેઠકમાં રિઝર્વ બેન્ક ઓફ ઇન્ડિયા, સિક્યોરિટીઝ એન્ડ એક્સ્ચેન્જ બોર્ડ ઓફ ઇન્ડિયા (સેબી), ઇન્ટરનેશનલ ફાઇનાન્શિયલ સર્વિસ સેન્ટર ઓથોરિટી, ઇન્શ્યોરન્સ રેગ્યુલેટરી એન્ડ ડેવલપમેન્ટ ઓથોરિટી ઓફ ઇન્ડિયા, બેન્ક ઓફ ઇંગ્લેન્ડ અને ફાઇનાન્શિયલ કન્ડક્ટ ઓથોરિટી (FCA)ના અધિકારીઓએ ભાગ લીધો હતો.

બ્રિટન સ્થિત કેઇર્ન એનર્જીએ મંગળવારે જણાવ્યું હતું કે પશ્વાદવર્તી ટેક્સ કાયદાની નાબૂદીને પગલે કંપનીને ભારત સરકાર પાસેથી એક બિલિયન ડોલરનું રીફંડ મળ્યાના થોડા જ દિવસોમાં તે ભારત સરકારની પ્રોપર્ટી જપ્ત કરવા વિદેશમાં કરેલા તમામ કોર્ટ કેસ પાછા ખેંચી લેશે. કંપનીએ ટેક્સ વિવાદમાં ભારત સરકાર પાસેથી નાણાંની વસૂલાત કરવા અમેરિકાથી લઇને ફ્રાન્સ સહિતના વિવિધ દેશોમાં કોર્ટમાં પિટિશન કરી છે.
ભારત સરકારે 2012ની ટેક્સ નીતિ રદ કરવા ગયા મહિને પસાર કરેલો ઠરાવ કંપનીએ હિંમતભેરનો નિર્ણય ગણાવ્યો હતો. આ ટેક્સ નીતિ હેઠળ ભારતનું ટેક્સ ડીપાર્ટમેન્ટ 50 વર્ષ જૂના સોદામાં પણ વિદેશમાં કંપનીની માલિકી બદલાય ત્યારે કેપિટલ ગેઇન્સ ટેક્સ લાગુ કરી શકતું હતું.

અમેરિકાની અગ્રણી ઇલેક્ટ્રિક કાર કંપની ટેસ્લાના ચાર મોડલને ભારતમાં મંજૂરી સાથે આ કંપની ભારતમાં પ્રવેશ માટે સજ્જ બની છે. કેન્દ્ર સરકારના પરિવહન મંત્રાલયે કંપનીના ચાર મોડલના ઉત્પાદન કે આયાતને મંજૂરી આપી છે. જોકે, મંત્રાલયના વાહન પોર્ટલ પર મંજૂર કરવામાં આવેલા મોડેલો વિશે માહિતી ઉપલબ્ધ કરાવવામાં આવી નથી. ટેસ્લાએ અગાઉ ભારતમાં ઇમ્પોર્ટ ડ્યૂટીમાં ઘટાડો કરવાની માગણી કરી હતી.

ભારતના જીડીપીમાં ચાલુ નાણાકીય વર્ષના એપ્રિલ-જૂન ક્વાર્ટરમાં 20.1 ટકાની વિક્રમજનક વૃદ્ધિ નોંધાઈ હતી, એમ મંગળવારે જારી કરવામાં આવેલા ડેટામાં જણાવાયું હતું. ભારતના પ્રથમ ક્વાર્ટરના આ ઊંચા ગ્રોફ માટે ગયા વર્ષ।ના જૂન ક્વાર્ટરની લો બેઝ ઇફેક્ટ છે. ગયા વર્ષે કોરોના લોકડાઉનને કારણે અર્થતંત્રમાં 24.4 ટકાનો તીવ્ર ઘટાડો થયો હતો.

ભારતના બિલિયોનેર્સ ઉદ્યોગપતિ મુકેશ અંબાણીના વડપણ હેઠળની રિલાયન્સ ઇન્ડસ્ટ્રીઝ સોલાર પેનલ બનાવતી યુરોપની સૌથી મોટી કંપની આરઇસી ગ્રૂપને ખરીદવાની અંતિમ તબક્કાની મંત્રણા કરી રહી છે. રિલાયન્સ 1થી 1.2 બિલિયન ડોલરમાં ચાઇના નેશનલ કેમિકલ કોર્પ પાસેથી આ કંપની ખરીદે તેવી શક્યતા છે, એમ સૂત્રોએ જણાવ્યું હતું.

લોકપ્રિયતામાં શાહરુખ ખાન, પ્રિયંકા ચોપરા, કિયારા અડવાણી મોખરે

થોડા દિવસ પહેલા થયેલા એક અનોખા સર્વેમાં બોલીવૂડમાંથી શાહરુખ ખાન, પ્રિયંકા ચોપરા અને કિયારા અડવાણીએ લોકપ્રિયતાની દૃષ્ટિએ મોખરાનું સ્થાન મેળવ્યું છે. પ્રિયંકા ચોપરાએ છેલ્લા થોડા વર્ષોમાં પોતાને ગ્લોબલ સ્ટાર તરીકે સ્થાપિત કરી દીધી છે. પેરટ એનાલિટિક્સ દ્વારા ૨૦ જુલાઇથી ૧૮ ઓગસ્ટ વચ્ચે એક સર્વે કરવામાં આવ્યો હતો. આ સર્વેમાં એવું જાણવા મળ્યું હતું કે, ભારતીય ફિલ્મોના કલાકાર સૌથી વધુ માગમાં રહે છે
આ યાદીમાં પહેલા સ્થાને શાહરૂખ ખાન, બીજા સ્થાને તેલુગુ સ્ટાર અલ્લૂ અર્જુ અને ત્રીજા સ્થાને પ્રિયંકા ચોપરાનો સમાવેશ થાય છે. શાહરૂખની છેલ્લા ત્રણ વર્ષથી એક પણ ફિલ્મ રિલીઝ ન થઇ હોવા છતાં પણ તેણે આ યાદીમાં પ્રથમ સ્થાન મેળવ્યું છે તે આશ્ચર્યજનક બાબત છે. જોકે, શાહરુખ અત્યારે દીપિકા પાદુકોણ અને જોન એબ્રાહમની સાથે યશરાજ ફિલ્મ્સની ‘પઠાણ’ માટે કામ કરી રહ્યો છે. ઓક્ટોબરમાં તે એક્શન થ્રિલર ફિલ્મનું શૂટિંગ શરૂ કરશે તેવી ચર્ચા છે. જેમાં તેની સાથે સાઉથની નયનતારા પણ છે. શાહરુખની પાસે રાજકુમાર હિરાણીની પણ નવી એક ફિલ્મ પણ હોવાની ચર્ચા છે.

રણદીપ હુડ્ડાને મજાક ભારે પડી

બોલીવૂડના ફિલ્મકારો ઘણીવાર જુદા જુદા વિવાદોમાં ફસાતા હોય છે. આ વિવાદોને કારણે તેમને ક્યારેક નુકસાન પણ જતું હોય છે. તાજેતરમાં રણદીપ હુડા નવા વિવાદમાં ફસાયો છે. તેણે બહુજન સમાજ પાર્ટીની નેતા અને ઉત્તર પ્રદેશનાં ભૂતપૂર્વ મુખ્ય પ્રધાન માયાવતી પર આપત્તિજનક કટાક્ષ કર્યો હતો.
રણદીપની આ રમૂજ સોશિયલ મીડિયા પર જોવા મળતા માયાવતીના સમર્થકોએ વાંધો ઉઠાવીને તેની ધરપકડની પણ માગણી કરી હતી. જોકે, તેની આ મજાકને સેક્સિએસ્ટ અને જાતિવાદી માનવામાં આવે છે. હવે આ ઘટના પછી રણદીપને યુનાઇટેડ નેશનના જંગલી જાનવરોની પ્રવાસી પ્રજાતિઓના સંરક્ષણ સમ્મેલન (સીએમએસ)ના એમ્બેસેડર પદ પરથી દૂર કરવામાં આવ્યો છે. એક વીડિયો વાઇરલ થયા પછી રણદીપ વિરુદ્ધ આ પગલું ઉઠાવામાં આવ્યું છે. જેમાં તે માયાવતીની મજાક કરતો જોવા મળ્યો છે.

સલમાન-ચિરંજીવીઃ હમ સાથ સાથ હૈ

સાઉથ ઇન્ડિયાની ફિલ્મોના સુપર સ્ટાર ચિરંજીવ અને બોલીવૂડના સલમાન ખાન હવે એક જ ફિલ્મમાં સાથે જોવા મળે તેવા સંજોગો ઊભા થયા છે.
સૂત્રોના જણાવ્યા મુજબ ચિરંજીવીની મોટી ફિલ્મ ‘ગોડ ફાધર’માં સલમાન ખાન પણ જોવા મળશે, જોકે હવે આ સમાચારની પુષ્ટિ થઇ ગઇ છે. ટ્વિટર પર પ્રસરેલા એક સમાચાર મુજબ, ચિરંજીવીએ ફિલ્મ ગોડ ફાધર માટે સલમાન ખાનનો સંપર્ક કર્યો હતો. હવે સલમાને પોતાની ડેટ્સ આ ફિલ્મ માટે આપી દીધી છે, એટલે સલમાન અને ચિરંજીવી એક ફિલ્મમાં સાથે જોવા મળશે. ચિરંજીવીએ તો અગાઉ જ ગોડ ફાધર ફિલ્મનું શૂટિંગ શરૂ કરી દીધું છે. આ ફિલ્મનું પોસ્ટર પણ રિલીઝ કરવામાં આવ્યું છે. આ ફિલ્મ મલયાલમ ફિલ્મ લુસફિરની તેલુગુ રિમેક છે જેમાં મોખરાના કલાકારોનું નામ ચર્ચામાં છે.

કંગના રનૌત અનોખી ભૂમિકામાં

બોલીવૂડમાં હંમેશા વિવાદોમાં રહેલી કંગના રનૌતે પોતાની નવી ફિલ્મ ધાકડનું શૂટિંગ પૂર્ણ કર્યું છે અને અત્યારે ફિલ્મ તેજસનું શૂટિંગ કરી રહી હોવાનું કહેવાય છે. જોકે, તેની ફિલ્મ ધાકડ માટે તે વધુ ચર્ચામાં છે. આ ફિલ્મ સાથે જોડાયેલા સૂત્રોના જણાવ્યા પ્રમાણે, આ ફિલ્મમાં તે ભરપૂર એકશન દ્રશ્યો કરતી જોવા મળશે.
આ ફિલ્મમાં તેની મુખ્ય ભૂમિકા એક એજન્ટ તરીકેની છે પરંતુ તેમાં 10 વિવિધ કિરદારોમાં જોવા મળશે. તે આ ફિલ્મમાં માનવ તસ્કરી કરનારી ટોળકીને પકડવા માટે કમર કસતી જોવા મળશે.