બ્રિટનની કંપની કેઇર્ન એનર્જીએ ભારત સરકાર સાથેના 1.7 બિલિયન ડોલરના ટેક્સ વિવાદમાં વળતર વસૂલ કરવા માટે સરકાર વિરુદ્ધ કરેલા કેસમાં ફ્રાન્સની કોર્ટે કંપનીની તરફેણમાં ચુકાદો આપ્યો છે. ફ્રાંસની કોર્ટે ફ્રાન્સમાં આવેલી ભારત સરકારની આશરે $24 મિલિયનની 20 પ્રોપર્ટી સ્થગિત કરવાનો આદેશ આપ્યો છે. જોકે ભારત સરકારે આવો કોઇ આદેશ મળ્યો હોવાનો ઇનકાર કર્યો હતો
કેઇર્ન એનર્જીએ જણાવ્યું હતું કે ફ્રાન્સની કોર્ટે પેરિસ ખાતેની ભારત સરકારની કેટલીક પ્રોપર્ટી જપ્ત કરવાની તેની પિટિશન સ્વીકારી છે. કંપનીનો આંતરરાષ્ટ્રીય લવાદ કેસમાં 1.2 બિલિયન ડોલરના ટેક્સ કેસમાં વિજય થયો હતો અને તે સરકાર પાસેથી આ નાણાની વસૂલાત માટે પ્રયાસ કરી રહી છે.

ફાઇનાન્શિયલ ક્ષેત્રમાં દ્વિપક્ષીય સંબંધોને વધુ મજબૂત બનાવવા માટે બ્રિટન અને ભારત વચ્ચેના ફાઇનાન્શિયલ માર્કેટ ડાયલોગ (FMD)ની પ્રથમ વર્ચ્યુઅલ બેઠક 9 જુલાઇએ યોજાઈ હતી. આ બેઠકમાં બંને દેશો વચ્ચે ફાઇનાન્શિયલ સર્વિસ ક્ષેત્રમાં સહકારમાં વધારો કરવાની નોંધપાત્ર તક હોવા અંગે સહમતી સધાઈ હતી.
આ બેઠકમાં ચાર મુખ્ય મુદ્દા પર સહકારમાં વધારો કરવા પર ધ્યાન કેન્દ્રીત કરવામાં આવ્યું હતું. આ ચાર મુદ્દામાં ગુજરાત ઇન્ટરનેશનલ ફાઇનાન્સ ટેક (ગિફ્ટી) સિટી, બેન્કિંગ એન્ડ પેમેન્ટ, ઇન્શ્યોરન્સ અને કેપિટલ માર્કેટનો સમાવેશ થાય છે. બેઠકની આગેવાની બ્રિટનના નાણામંત્રાલય અને ભારતના નાણામંત્રાલયના વરિષ્ઠ અધિકારીઓએ લીધી હતી અને તેમાં બંને દેશોની સ્વતંત્ર નિયમનકારી એજન્સીઓએ ભાગ લીધો હતો.

સર્ચ એન્જિન ગુગલની ડિજિટલ ઇજારાશાહી સામે અમેરિકાનું વહીવટીતંત્ર જાગ્યું છે. અમેરિકાના ૩૬ રાજ્યો અને વોશિંગ્ટન ડીસીએ ગૂગલ સામે કેસ કરતા આરોપ મૂક્યો છે કે એન્ડ્રોઇડ એપ માટેનો કંપનીનો પ્લે સ્ટોર એન્ટ્રીટ્રસ્ટ કાયદાનું ઉલ્લંઘન કરે છે. કેસમાં ખાસ કરીને ડિજિટલ ગૂડ્સ અને સર્વિસિસના વેચાણ માટે ડેવલપર્સ પાસેથી ગૂગલ દ્વારા વસૂલ કરવામાં આવતી 30 ટકા ફી પર ફોકસ કરવામાં આવ્યો છે.
આ કેસમાં આરોપ મૂકવામાં આવ્યો છે કે શ્રેણીબદ્ધ એક્સક્લૂસિવ કન્ટેન્ટ મારફત બિનસ્પર્ધાત્મક રીતરસમો દ્વારા ગૂગલે એન્ડ્રોઇડ ડિવાઇસ યુઝર્સને આક્રમક સ્પર્ધાથી વંચિત રાખ્યા છે. ન્યૂયોર્કના એટર્ની જનરલ જેમ્સ અને ઉટાહ, નોર્થ કેરોલિના અને ટેનેસીના એટર્ની જનરલ જનરલોએ સંયુક્ત રીતે એપ ડેવલપરો ગૂગલ પ્લે સ્ટોર દ્વારા જ એપ ઇન -એપ ડિજિટલ કન્ટેન્ટ વેચી શકે તેવી વ્યવસ્થાની ફરજ પાડવાનો કંપની પર આરોપ મૂક્યો હતો.

જિયોગ્રાફિકલ ઇન્ડિકેશન (GI) સર્ટીફાઈડ ભાલિયા જાતના ઘઉંના પહેલા જથ્થાની ગુજરાતથી કેન્યા અને શ્રીલંકાને નિકાસ કરવામાં આવી હતી, એમ કેન્દ્રીય વાણિજ્ય મંત્રાલયે બુધવારે જણાવ્યું હતું. ભાલિયા ઘઉંને જુલાઈ 2011માં જીઆઇ ટેગ મળ્યો હતો. જીએ સર્ટિફિકેશનનું રજિસ્ટ્રેશન આણંદ કૃષિ યુનિવર્સિટીએ કરાવ્યું હતું.
જીઆઈ કાયદા હેઠળ, કોઈ ઉત્પાદનની ઓળખ કોઈ સ્પેશયલ સેક્ટરમાં નિર્મિત કે ઉત્પાદિત વસ્તુ તરીકે કરવામાં આવે છે. તેની એક વિશિષ્ટ ખાસિયાત હોય છે જે તે ભૌગોલિક ક્ષેત્રને કારણે હોય છે. આ એક કાયદાકીય અધિકાર છે, જે હેઠળ જીઆઈ ધારક અન્યોને સમાન નામનો ઉપયોગ કરતા રોકી શકે છે.

કેનેડામાં ટ્રેડમાર્ક ઉલ્લંઘનના એક કેસમાં અમૂલનો વિજય થયો છે. ઈન્ટેલેક્ચ્યુઅલ પ્રોપર્ટી અપેલેટ બોર્ડ ઓફ કેનેડાએ તાજેતરમાં ભારતની પ્રખ્યાત અને સૌથી મોટી ડેરી અમૂલના ટ્રેડમાર્કને માન્યતા આપી હતી. અમૂલે ફેડરલ કોર્ટ ઓફ કેનેડામાં અમુલ કેનેડા અને ચાર લોકો (મોહિત રાણા, આકાશ ઘોષ, ચંદુ દાસ અને પટેલ) સામે ટ્રેડમાર્ક ઉલ્લંઘનનો કેસ દાખલ કર્યો હતો.
જાન્યુઆરી, 2020માં અમૂલને જાણવા મળ્યું હતું કે આ ગ્રુપે અમૂલ ટ્રેડમાર્કની નકલ કરી છે અને તેમના લોગો અમૂલ – ધ ટેસ્ટ ઓફ ઈન્ડિયાની પણ નકલ કરી છે. તેમણે સોશિયલ મીડિયા પ્લેટફોર્મ લિન્ક્ડઈન પર આની ફેક પ્રોફાઈલ પણ બનાવી હતી.

મેટ્રિમનીડોટકોમ લિમિટેડે રૂ.11 કરોડના કેશ સોદામાં ઓનલાઇન વેડિંગ સર્વિસ કંપની ShaadiSaga.comની માલિક કંપની બોટમેન ટેકને હસ્તગત કરી છે. આ ડીલથી ચેન્નાઇ સ્થિત લિસ્ટેડ કંપની મેટ્રિમનીડોટકોમને ઉત્તર અને પશ્ચિમ ભારતમાં તેની હાજરીમાં વધારો કરવામાં મદદ મળશે. તેનાથી તે ભારતની ઓનલાઇન વેડિંગ સર્વિસમાં અગ્રણી ખેલાડી બનવામાં પણ મદદ મળશે. આ એક્વિઝશનને પગલે સાદીસાગાના સ્થાપકો હિમાંશુ કાપસિમે (સીઇઓ) અને મનીષ ગર્ગ (સીઓઓ) તથા સીપીઓ નીરજ પટેલ સિનિયર ભૂમિકામાં મેટ્રિમનીમાં સામેલ થશે.

ટ્રેજેડી કિંગ દિલીપ કુમારનું 98 વર્ષની ઉંમરે નિધન

બોલિવુડમાં ટ્રેજડી કિંગ તરીકે જાણીતા લોકપ્રિય અભિનેતા દિલીપ કુમારનું 98 વર્ષની વયે બુધવાર સવારે નિધન હતું. આ દિગ્ગજ કલાકારની અલવિદાથી સમગ્ર બોલિવૂડમાં શોક અને દુઃખની લાગણી ફેલાઈ ગઈ હતી. દિલીપ કુમારના નિધનથી ભારતના રાષ્ટ્રપતિ રામનાથ કોવિંદ, વડાપ્રધાન નરેન્દ્ર મોદી સહિતના નેતાઓ અને અમિતાભ બચ્ચન સહિતની બોલિવૂડની હસ્તીઓએ દુઃખ અને શોક વ્યક્ત કર્યો હતો.
વડાપ્રધાન મોદીએ દિલીપ કુમારના પત્ની સાયરાબાનો સાથે ફોન પર વાત કરીને તેમને સાંત્વના આપી હતી અને દુઃખ વ્યક્ત કર્યું હતું. મોદીએ ટ્વીટર પર લખ્યું હતું કે દિલીપ કુમારજીને ભારતીય સિનેમાના એક દિગ્ગજ તરીકે યાદ કરવામાં આવશે. તેમને અદ્વિતીય પ્રતિભાના આશીર્વાદ હતા. આ જ કારણે તેમના ચાહકો દરેક ઉંમરના હતા. તેમનું નિધન સાંસ્કૃતિક દુનિયા માટે એક મોટો ઝટકો છે.
લાંબી માંદગી બાદ મુંબઈની હિંદુજા હોસ્પિટલમાં દિલીપ કુમારે અંતિમ શ્વાસ લીધા હતા. છેલ્લા આઠ દિવસથી તેઓ હોસ્પિટલમાં દાખલ હતા. દિલીપ કુમારને શ્વાસ લેવામાં તકલીફ થતાં તેમને 30 જૂને હિંદુજા હોસ્પિટલના ICUમાં દાખલ કરાયા હતા.

ફિલ્મોમાં કેવી રીતે પ્રવેશ્યા?

બોલિસ્ટાર દિલીપ કુમારના નિધનથી બોલિવૂડમાં એક યુગનો અંત આવ્યો છે. એક એક્ટરમાંથી લેજેન્ડ બનવા સુધીની સફર સરળ ન હતી. 65થી વધુ ફિલ્મમાં કામ કરનારા દિલીપ કુમારનો જન્મ 11 ડિસેમ્બર, 1922ના રોજ પેશાવરમાં થયો હતો. માતા-પિતાએ તેમનું નામ મોહમ્મદ યુસુફ ખાન રાખ્યું હતું, પરંતુ મુંબઈ આવ્યા પછી ફિલ્મોમાં તેમને દિલીપ કુમાર નામથી ઓળખ મળી હતી. તેમના નામ બદલવાની સ્ટોરી પણ ઘણી રસપ્રદ છે.
દિલીપ સાહેબને કુલ 12 ભાઈ-બહેન હતા. તેમનું બાળપણ ઘણી ખરાબ સ્થિતિમાં પસાર થયું, તેમના પિતા પરિવાર સાથે મુંબઈ આવી ગયા હતા. મુંબઈ આવ્યા પછી પરિવારને અનેક આર્થિક તકલીફોનો સામનો કરવો પડ્યો. દિલીપ કુમારે શાળાકીય અભ્યાસ નાસિકના દેવલાલીમાં બાર્ન્સ સ્કૂલથી કર્યો હતો. આ જ શાળામાં રાજ કપૂર પણ અભ્યાસ કરતા હતા. રાજ કપૂર અને દિલીપ કુમાર બાળપણના મિત્રો હતા. બન્ને એકસાથે જ મોટા પણ થયા.