ભારતમાં કોરોનાની બીજી લહેરે સુનામીનું સ્વરૂપ ધારણ કરીને દહેશતનો માહોલ ઊભો કર્યો છે. દેશમાં રવિવાર સુધીના સતત ચાર દિવસ સુધી કોરોનાના નવા કેસની સંખ્યા ચાર લાખથી વધુ રહી હતી અને સતત બે દિવસ માટે 4,000થી વધુના મોત થયા હતા. સોમવાર અને મંગળવારે કોરોના ટેસ્ટમાં ઘટાડાની સાથે નવા કેસ કેસની સંખ્યા હતી, પરંતુ હાલમાં હોસ્પિટલમાં બેડ અને મેડિકલ ઓક્સિજન અને દવાની તીવ્ર અછત વચ્ચે હેલ્થકેર સિસ્ટમ પર પ્રચંડ દબાણ ઊભું થયું છે. તેનાથી આર્મીના ભૂતપૂર્વ મેડિકલ ઓફિસરોની મદદ લેવી પડી રહી છે. કોરોના સંકટમાં વિશ્વભરના દેશો ભારતને સહાય કરી રહ્યાં છે.

સમાજને અનલૉક કરવાનું “સૌથી મોટું પગલું” લેતાં ઇંગ્લેન્ડના લોકોને આવતા સોમવાર તા. 17થી પ્રિયજનોને આલિંગન આપવાની અને 6 લોકો સુધી ઘરમાં આતિથ્ય માણવાની મંજૂરી આપવામાં આવશે એવી વડા પ્રધાન બોરિસ જોન્સને ડાઉનીંગ સ્ટ્રીટ ખાતેથી જાહેરાત કરી હતી. જો કે તેમણે લોકોને “સાવધાની રાખવા અને સામાન્ય સમજનો ઉપયોગ કરવા” વિનંતી કરી છે.

અમેરિકામાં પેટ્રોલિયમનું પરિવહન કરતી પાઈપલાઈન કંપની પર સાયબર એટેક થયો છે. સાયબર હુમલો એટલો બધો ગંભીર છે, કે પ્રેસિડેન્ટ જો બાઈડેને અમેરિકામાં ઈમર્જન્સી જાહેર કરી દીધી છે. સાયબર હુમલા પછી ઈમર્જન્સી જાહેર થઈ હોય એવો આ જગતનો પ્રથમ કિસ્સો છે.કોલોનિયલ પાઈપલાઈને શનિવારે, 8 મેએ કહ્યું હતું કે તેના સર્વર પર રેન્સમવેર હુમલો થયો છે, જેને પગલે બધી જ પાઈપલાઈનો મારફત પેટ્રોલિયમ પેદાશોનું પરીવહન અટકાવી દેવાની ફરજ પડી છે.

ગુજરાતમાં 27 એપ્રિલની ટોચ પછીથી કોરોનાના નવા કેસ અને મોતની સંખ્યામાં ઘટાડો થઈ રહ્યો છે. જોકે સરકારે કોરોનામુક્ત ગામડાનું અભિયાન ચાલુ કર્યું હોવા છતાં કોરોના ગામડામાં ઝડપથી ફેલાઈ રહ્યો છે. મે મહિનામાં રાજ્યના કુલ દૈનિક કેસોમાંથી 41 ટકા કેસ ગામડામાં નોંધાયા હતા અને દૈનિક મોતમાંથી 53 ટકા મોત પણ ગામડામાં થયા હતા.

6 મે ના રોજ યોજાયેલી ચૂંટણીઓમાં સ્કોટલેન્ડમાં, સ્કોટીશ નેશનાલિસ્ટ પાર્ટીએ સત્તામાં આવી સતત ચોથી ટર્મ જીતી હતી. જો કે બહુમતીમાં એક બેઠક ઓછી રહી હતી. વેલ્સમાં, લેબરે સેનેડ પર નિયંત્રણ જાળવી રાખ્યુ છે અને કુલ 30 બેઠકો જીતી હતી. તો બીજી તરફ સાદિક ખાને લંડનના મેયર તરીકેની બીજી ટર્મ જીતી લીધી હતી. લેબર પાર્ટી લંડન એસેમ્બલીમાં પણ પોતાનું વર્ચસ્વ જાળવી રાખ્યું હતું.

લેબર પાર્ટીના નેતા, સાઉથ લંડનના ટૂટીંગના ભૂતપૂર્વ સાંસદ અને પાકિસ્તાની મૂળના સાદિક ખાન ફરી એક વખત તા 6 મે, ગુરૂવારે થયેલી સ્થાનિક ચૂંટણીઓમાં લંડનના મેયર તરીકે કૉન્ઝર્વેટીવ પાર્ટીના શૉન બેઇલી સામે 228,000 મતોની બહુમતીથી ચૂંટાઈ આવ્યા છે. મેયર તરીકની આ તેમની સતત બીજી જીત છે. તેઓ 2016માં યુરોપના કોઇ પણ મોટા શહેરના મુસ્લિમ મેયર તરીકે ચૂંટાયેલા પ્રથમ વ્યક્તિ હતા.

2010થી બર્મિંગહામ-લેડીવુડનું પ્રતિનિધિત્વ કરતા પાકિસ્તાની કાશ્મીર મૂળના સાંસદ શબાના મહમૂદને શેડો કેબિનેટમાં પાર્ટીના નેશનલ કેમ્પેઇન કોઓર્ડીનેટર તરીકે નિયુક્ત કરાયા છે. તેઓ બર્મિંગહામમાં જન્મેલા-ઉછરેલા અને ઑક્સફર્ડની લિંકન કોલેજમાંથી લૉમાં સ્નાતક થયેલા મહેમૂદ સૌ પહેલા મુસ્લિમ અને એશિયન મહિલા એમપી હતાં. તેઓ અગાઉ શેડો હોમ અફેર્સ મિનિસ્ટર, શેડો બિઝનેસ મિનિસ્ટર અને તાજેતરમાં ટ્રેઝરીના શેડો ચીફ સેક્રેટરી તરીકે સેવા આપી ચૂક્યા છે. તેઓ પબ્લિક એકાઉન્ટ કમીટીના સભ્ય તરીકે પણ સેવા આપે છે.

વડાપ્રધાન બોરિસે જોન્સન કોવિડ રોગચાળા પછી ઇકોનોમિક રિકવરી માટે કટિબધ્ધ છે ત્યારે મહારાણીએ આજે તા. 11ના રોજ પાર્લામેન્ટમાં આપેલા વક્તવ્યમાં રોજગારમાં વધારો, પુખ્ત વયના દરેક લોકોને અભ્યાસક્રમો અને તાલીમ માટે લોન આપવાની યોજનાઓ, ગેરકાયદેસર ઇમિગ્રેશન પર ક્રેકડાઉન અને ‘વેક’ સંસ્કૃતિ વિરુદ્ધ કાર્યવાહી કરવાની રજૂઆત કરી હતી. પરંતુ સામાજિક સંભાળ વિષે કોઇ જાહેરાત કરાઇ નહતી.

કોરોના મહામારીના પ્રકોપ વચ્ચે ગુજરાતના 36 શહેરોમાં નાઇટ કરફ્યૂ સહિતના આકરાં નિયંત્રણો 18 મે સુધી લંબાવવામાં આવ્યા છે. રાજ્યના મુખ્યપ્રધાન વિજય રૂપાણીના વડપણ હેઠળ મંગળવારે મળેલી કોર કમિટિની બેઠકમાં આ નિર્ણય કરવામાં આવ્યો હતો. રાજ્યમાં નાઇટ કરફ્યૂ અને નિયંત્રણોની મુદત 12મે પૂરી થતી હતી.કોર કમિટીની બેઠક બાદ રૂપાણીએ જણાવ્યું હતું કે રાજ્યના નાગરિકો, ડોક્ટર્સ સહિત સૌના સહયોગ અને સહિયારા પ્રયાસોને પરિણામે ગુજરાતે કોરોનાના કેસોમાં ઘટાડો કરવામાં સફળતા મેળવી છે.

ઉત્તરપ્રદેશમાં સતત બીજા દિવસે ગંગા નદીમાં મૃતદેહો તરતા જોવા મળ્યા હતા. આ વખતે ગાંઝીપુરમાં આ ઘટના બની હતી. આ શહેર બિહારના બક્સરથી આશરે 55 કિમી દૂર છે. બિહારના બક્સરમાં સોમવારે ગંગા નદીમાં 100 કરતાં વધુ મૃતદેહો તરવા જોવા મળ્યા હતા. ઉત્તરભારતના ગ્રામીણ વિસ્તારોમાં કોરોના ઝડપથી ફેલાઈ રહ્યો છે ત્યારે આ મૃતદેહો કોરોના દર્દીઓ હોવાની આશંકા છે.