વડા પ્રધાન બોરિસ જ્હોન્સને વર્ચુઅલ કન્ઝર્વેટિવ કોન્ફરન્સમાં ચેતવણી આપતાં જણાવ્યું હતું કે ‘’યુકે રોગચાળા પછી સામાન્ય સ્થિતિમાં પાછુ આવી ન શકે, તેના માટે મોટા પરિવર્તનની જરૂર પડશે. હું દેશને ફરી પ્રગતિશીલ જોવા માંગુ છું. અંધકારમય ક્ષણોમાં પણ આપણે આગળનું ઉજ્જવળ ભવિષ્ય જોઈ શકીએ છીએ અને આપણે સાથે મળીને તેને બનાવીશું.” તેમણે ભાષણમાં કોવિડને હરાવવાની અને એક વધુ સારા દેશનું નિર્માણ કરવાની પ્રતિજ્ઞા લીધી હતી.

બાબરી મસ્જિદ ધ્વંસ કેસમાં સીબીઆઇની વિશેષ અદાલતે તેના ચુકાદામાં ભાજપના વરિષ્ઠ નેતા એલ કે અડવાણી, મુરલી મનોહર જોશી, ઉમા ભારતી સહિતના તમામ 32 આરોપીઓને નિર્દોષ જાહેર કર્યા છે. તમામ આરોપીઓને પુરાવાના અભાવે નિર્દોષ જાહેર કરવામાં આવ્યા હતા. કોર્ટે ચુકાદો આપ્યો ત્યારે 26 આરોપીએ કોર્ટમાં હાજર હતા.

અમેરિકાની અવકાશ સંસ્થા નાસાએ પહેલી મહિલા અવકાશ યાત્રી ઇન્ડિયન અમેરિકન કલ્પના ચાવલાના નામે સિગ્નસ અવકાશયાનને અંતરીક્ષમાં રવાના કર્યું હતું. નોર્થરોપ ગ્રુમેનનું આ અવકાશયાન એક માલવાહક યાન છે જે અંતરીક્ષમાં કામ કરી રહેલા અવકાશ મથકને જરૂરી ચીજો પહોંચતી કરશે.

રાજ્યમાં કોરાના વાઇરસનું સંક્રમણ સતત વધતું જાય છે ત્યારે નાગરિકો માટે થોડા રાહતભર્યા સમાચાર એ છે કે, સપ્ટેમ્બર મહિનામાં રિકવરી રેટ ટોચ પર રહ્યો છે. સપ્ટેમ્બરમાં નોંધાયેલ કુલ કેસની સામે સાજા થનાર દર્દીનો દર ૯૯.૬૯ ટકા રહ્યો છે જ્યારે મૃત્યુદર ઘટીને માત્ર ૧.૦૮ ટકા રહ્યો છે.

કોરોનાવાયરસ રસીના નિર્માણ માટેનું મોટા ભાગનું કામકાજ આગામી ત્રણ મહિનામાં પૂર્ણ થઈ શકે છે અને દેશના દરેક પુખ્ત વયના લોકોને ઇસ્ટર એટલે કે તા. 4 એપ્રિલ પહેલા રસી આપી શકાય તેવી વધારે સંભાવનાઓ જણાઇ રહી છે. સરકારી વૈજ્ઞાનિકો કહે છે કે કોવિડ-19 રસીકરણ કાર્યક્રમ ઝડપી થઈ શકે છે અને એસ્ટ્રાઝેનેકા અને ઑક્સફોર્ડ યુનિવર્સિટી દ્વારા સંયુક્ત રીતે વિકસાવવામાં આવેલી રસીને આ વર્ષે રેગ્યુલેટર્સ દ્વારા મંજૂરી મળી શકે છે.

બ્લેક હોલ અંગેના સંસોધન માટે ત્રણ વિજ્ઞાનીઓને ફિઝિક્સ માટેના નોબેલ પ્રાઇઝની જાહેરાત કરવામાં આવી છે. બ્રિટનના રોજર પેનરોઝ, જર્મનીના રિનહાર્ડ ગેન્જેલ અને અમેરિકાના એન્ડ્રી ગેઝને આ પુરસ્કારની આપવામાં આવશે. બ્રિટનના પેનરોઝ યુનિવર્સિટી ઓફ ઓક્સફોર્ડમાં પ્રોફેસર છે.

‘’કોરોનાવાયરસના કારણે પ્રતિબંધો વચ્ચે “શિયાળો અતિશય આકરો” હોવા છતાં બ્રિટન બ્રેક્ઝિટ ડીલ વિના સમૃદ્ધ થઈ શકે છે. બ્રેક્ઝિટ સોદો “થવાનો જ છે”. રસી માટે લોકોને આશા આપવા માંગતો નથી પણ આ વર્ષે શક્ય તેટલી પ્રગતિ થઈ શકે તે સંભવ છે’’ એમ વડાપ્રધાન બોરિસ જ્હોન્સને ભારપૂર્વક જણાવ્યું હતું.

કેનેડાની મેકગીલ યુનિવર્સિટીએ એક સર્વેક્ષણ કર્યું હતું. અમેરિકા-કેનેડાના જાણીતા રસી વિશેષજ્ઞાોનો અભિપ્રાય મેળવીને યુનિવર્સિટીના અભ્યાસમાં દાવો કરાયો હતો કે ૨૦૨૧ની શરૃઆતે કોરોનાની રસી આવી જાય એવી શક્યતા બહુ જ ઓછી છે. રસી આવતા આવતા ૨૦૨૧નું વર્ષ પૂરું થઈ જશે! કેનેડાની યુનિવર્સિટીએ હાથ ધરેલા સર્વેક્ષણમાં ૨૮ નિષ્ણાતોનો મત લેવાયો હતો.

સસેક્સના ડ્યુક પ્રિન્સ હેરી વંશીય જાગૃતિના રોલ મોડલ ક્યારેય રહ્યા નથી ત્યારે બ્લેક માતા અને વ્હાઈટ પિતાની પુત્રી અને પત્નીના સ્મિત વદન વચ્ચે પ્રિન્સ હેરીએ એથનિક માઈનોરિટીઝ, બ્લેક તથા એશિયન સમુદાયના લોકોને તકના અભાવ પ્રત્યે તેમની જાગૃતિની વાત કરી હતી.

ઉત્તરપ્રદેશની ગેંગરેપ પીડિતાના પરિવારજનોને મળવા જઈ રહેલા કોંગ્રેસના નેતા રાહુલ ગાંધી અને પ્રિયંકા ગાંધી વાડરાને ગ્રેટર નોઇડામાં પોલીસે અટકાયતમાં લીધા હતા અને થોડા સમય પછી છોડી મૂક્યા હતા. સૂત્રોએ જણાવ્યું હતું કે બંનેને પોલીસ જીપમાં એક ગેસ્ટમાં થોડો સમય રાખવામાં આવ્યા હતા અને પછી છોડી મૂકવામાં આવ્યા હતા. જોકે કોંગ્રેસે ટ્વીટ કરી હતી કે બંનેને પોલીસે ધરપકડ કરી હતી.

આઈપીએલ 2020 શરૂ થયાને લગભગ અઢી વીક થઈ ગયા છે અને મોટાભાગની ટીમ્સ પાંચ-પાંચ મેચ રમી ચૂકી છે ત્યારે સોમવારે દિલ્હી કેપિટલ્સ શાનદાર બેટિંગ અને પછી વેધક બોલિંગના જોરે રોયલ ચેલેન્જર્સ બેંગલોરને 59 રનના જંગી માર્જીનથી હરાવી ચાર વિજય સાથે ટોપ સ્પોટ ઉપર પહોંચી ગઈ હતી.
ટોસ જીતી બેંગલોરના સુકાની કોહલીએ દિલ્હીને બેટિંગ લેવા આમંત્રણ આપ્યું હતું, પણ તેનો એ જુગાર સફળ થયો નહોતો. દિલ્હીએ ચાર વિકેટે 196 રનનો પડકારજનક સ્કોર ખડકી દીધો હતો. એ પછી બેંગલોરની ટીમ 9 વિકેટે ફક્ત 137 રન કરી શકી હતી. પ્રથમ બેટિંગ કરવા ઉતરેલી દિલ્હી કેપિટલ્સના બંન્ને ઓપનર – શિખર ધવન અને પૃથ્વી શોએ દમદાર શરૂઆત કરી હતી. બંન્નેએ પાવરપ્લેમાં 63 રન કર્યા હતા. પૃથ્વી શોએ 42 અને શિખર ધવને 32 રન કર્યા હતા. સુકાની શ્રેયસ ઐયર ફક્ત 11 રન કરી શક્યો હતો, પણ એ પછી રીષભ પંત અને માર્ક્સ સ્ટોઈનિસે ધમાકેદાર બેટિંગ કરી હતી. પંતે 37 કર્યા હતા, જ્યારે સ્ટોઈનિસે અણનમ 53 કર્યા હતા.

ચેન્નાઈ સુપર કિંગ્સના ઓલરાઉન્ડર ખેલાડી રવિંદ્ર જાડેજાએ IPLમાં 2000 રન અને 110 વિકેટનો એક વિશિષ્ટ રેકોર્ડ કર્યો છે. સનરાઇઝર્સ હૈદરાબાદ સામેની મેચમાં જાડેજાએ 35 બોલમાં 50 રન કર્યા હતા. એ ઇનિંગમાં તેણે 2 છગ્ગા અને 5 ચોગ્ગા માર્યા હતા.આ સિવાય, આઈપીએલમાં 2000 રન 50 થી વધુ વિકેટ લેનારો તે ચોથો ક્રિકેટર છે. શેન વોટસન, કૈરોન પોલાર્ડ, જેક કાલિસ પછી જાડેજા ચોથો ખેલાડી છે.

બે સપ્તાહ કરતાં વધુ સમય વિત્યા પછી આઈપીએલમાં હવે કોઈક મુકાબલામાં જબરજસ્ત રસાકસી જામતી દેખાય છે, તો કેટલાક જંગ સાવ એક તરફી પણ રહેતા હોવાનું જણાય છે. રવિવારે રમાયેલી બન્ને મેચ તદ્દન એક તરફી રહી હતી, જેમાં પહેલી મેચમાં મુંબઈનો અને બીજી મેચમાં ચેન્નાઈનો વિજય થયો હતો.ચેન્નાઈ માટે આ વિજય વધારે મહત્ત્વનો હતો કારણ કે કેપ્ટન કુલ ગણાતા ધોનીની ટીમ અગાઉ સતત ત્રણ મેચ હારી ચૂકી હતી.