ગ્રેમી એવોર્ડ વિજેતા વિશ્વ મોહન ભટ્ટ અને સાથે વૈશ્વિક સ્તરે પ્રસિદ્ધ પર્ક્યુશનિસ્ટ, સુભેન ચેટર્જીના એશિયન આર્ટસ એજન્સી દ્વારા આ સપ્તાહથી યુકેમાં શરૂ થયેલી નેશનલ યુકે ટૂર – કનોસર્ટ્સને જોરદાર પ્રતિસાદ સાંપડી રહ્યો છે.
20 મે સેજ ગેટ્સહેડ, 22 મે NCEM યોર્ક, 23 મે બરો થિયેટર, એબર્ગવેની, 25 મે MAST મેફ્લાવર સ્ટુડિયો, સાઉધમ્પ્ટન, 28 મે સાઉથબેંક સેન્ટર, QEH, લંડન, 1 જૂન સેન્ટ જ્યોર્જ બ્રિસ્ટોલ, 4 જૂન સ્ટ્રોડ થિયેટર સમરસેટ સહ્ત કુલ 7 સ્થળોએ કોન્સર્ટ યોજાશે.
વિશ્વ મોહન ભટ્ટ રાજસ્થાનના જયપુરના એક આંતરિક સંગીત પરિવારમાંથી આવે છે જેમનો પરિવાર 3 સદીઓથી ભારતીય શાસ્ત્રીય સંગીતનું પ્રદર્શન કરે છે. વિશ્વ મોહને તેમના ઉત્કૃષ્ટ સંગીત દ્વારા ભારતીય શાસ્ત્રીય સંગીતના મુખ્ય પ્રવાહમાં પોતાનું સ્થાન સ્થાપિત કર્યું છે. વિશ્વ મોહને 80થી વધુ દેશોમાં પરફોર્મ કર્યું છે. તેમના અસંખ્ય આલ્બમ્સ પૈકી આલ્બમ ‘એ મીટિંગ બાય ધ રિવર વિથ રાય કૂડર (1993)’ માટે તેમને ગ્રેમી એવોર્ડ એનાયત કરાયો હતો. ભારત સરકારે વિશ્વ મોહનને પ્રતિષ્ઠિત પદ્મ ભૂષણ, પદ્મશ્રી અને સંગીત નાટક એકેડમીથી નવાજ્યા છે.
તેમની સાથે સંગત આપનાર સુભેન ચેટરજી લખનૌ ઘરાના પર આધારિત તબલા વગાડવાની શૈલી ધરાવે છે. છેલ્લા ચાર દાયકામાં સુભેન ચેટર્જીએ પંડિત ભીમસેન જોશી, વિદુષી ગિરિજા દેવી અને પંડિત જસરાજ સહિતના સંગીતના દિગ્ગજોનો સાથ આપ્યો છે.
