ભારતીય અધિકારીઓને 265 મિલિયન ડોલર (રૂ.2,200) કરોડની કથિત લાંચના કેસમાં અમેરિકાની શેરબજારની નિયમનકારી સંસ્થા સિક્યોરિટીઝ એન્ડ એક્સચેન્જ કમિશન (SEC)એ અદાણી ગ્રૂપના સ્થાપક ગૌતમ અદાણી અને તેમના ભત્રીજા સાગર અદાણીને યોગ્ય રાજદ્વારી માધ્યમો મારફત સમન્સ પાઠવવું પડશે, કારણ કે કમિશન પાસે વિદેશી નાગરિકને સીધા સમન્સ પાઠવવાનો કોઇ અધિકાર નથી, એમ સૂત્રોએ જણાવ્યું હતું.
રાજદ્વારી સૂત્રોએ જણાવ્યું હતું કે SEC ઇચ્છે છે કે અદાણી કથિત લાંચના આરોપમાં પોતાનું વલણ સ્પષ્ટ કરે છે, પરંતુ આવી રિકવેસ્ટ યુએસમાં ભારતીય દૂતાવાસ દ્વારા હોવી જોઇએ અને સ્થાપિત પ્રોટોકોલનું પાલન કરવું પડશે. આ ઉપરાંત અન્ય રાજદ્વારી ઔપચારિકતાઓનું પાલન કરવું પડશે. યુએસ SEC વિદેશી નાગરિકો પર કોઈ અધિકારક્ષેત્ર ધરાવતી નથી અને તેઓ પોસ્ટ દ્વારા કંઇપણ પણ મોકલી શકે નહીં.
1965ના હેગ કન્વેન્શનના કરાર તથા ભારત અને યુએસ વચ્ચેની પરસ્પર કાનૂની સહાયતા સંધિ આવી બાબતોનું સંચાલન કરે છે. આ સંધિઓમાં આવી રિકવેસ્ટ માટે કઇ પ્રક્રિયાનું પાલન કરવું તેની સ્પષ્ટ જોગવાઈઓ છે.
સૂત્રોએ જણાવ્યું હતું કે આ સમન્સ ન્યૂયોર્ક કોર્ટમાં એસઇસીએ ફાઇલ કરેલા કાનૂની ડોકેટનો એક ભાગ છે અને તે અદાણીને વાસ્તવમાં પાઠવવામાં આવે તે પહેલા થોડો સમય લાગશે. અદાણીને અત્યાર સુધી કોઈ સમન્સ પાઠવવામાં આવ્યું નથી.
ન્યૂયોર્ક ઇસ્ટર્ન ડિસ્ટ્રિક્ટ કોર્ટ મારફતની 21 નવેમ્બરની US SEC નોટિસમાં જણાવાયું છે કે આ સમન્સ મળ્યાના 21 દિવસમાં તમારે આ સાથે બિડેલી ફરિયાદ અથવા ફેડરલ રુલ્સ ઓફ સિવિલ પ્રોસિજરના નિયમ 12 હેઠળના મોશનનો એસઈસીને જવાબ આપવાનો રહેશે.
