વડાપ્રધાન બોરિસ જ્હોન્સને આજે મંગળવારે તા. 23ના રોજ લૉકડાઉનમાં વ્યાપક રાહતો આપી હતી. નવા નિયમો મુજબ તા. 4 જુલાઈથી લોકો એકબીજાના ઘરે જઇ શકશે અને ઓવરનાઇટ રહી શકશે. તા. 4 જુલાઇથી સિનેમાઘરો, સંગ્રહાલયો, આર્ટ ગેલેરીઝ સહિતના ઇન્ડોર સ્થળો, પબ, હેરડ્રેસર્સ, રેસ્ટૉરન્ટ્સ, કાફે, બાર્સ, પબ્સ, હોટલો, બેડ એન્ડ બ્રેકફાસ્ટ, હોલીડે હોમ્સ, કેમ્પસાઇટ્સ અને કેરેવાન પાર્ક, ધર્મસ્થાનો, પુસ્તકાલયો, સમુદાય કેન્દ્રો, કેન્ટીન, બિન્ગો હોલ, થિયેટરો અને કોન્સર્ટ હોલ, બાર્બર અને સલુન્સ, આઉટડોર રમતનાં મેદાનો, આઉટડોર જીમ, ફનફેર, થીમ પાર્ક અને એડવેન્ચર પાર્ક્સ અને પ્રવૃત્તિઓ, એમ્યુઝમેન્ટ આર્કેડ્સ, ઇન્ડોર લીઝર સેન્ટર્સ અને ઇન્ડોર ગેમિંગ સહિતની સુવિધાઓ, સોશ્યલ ક્લબ, મોડેલ વિલેજ, માછલીઘર, ઝૂ અને સફારી પાર્ક્સ તથા વન્યપ્રાણી કેન્દ્રો ખોલવા દેવાશે.
લગ્ન સમારંભો માટે પણ છૂટ આપવામાં આવી છે. પરંતુ નાઇટક્લબ્સ, બોલિંગ એલી, આઇસ સ્કેટિંગ રીન્ક્સ, સોફ્ટ પ્લે સહિત ઇન્ડોર રમતના ક્ષેત્ર, સ્પા, નેઇલ બાર્સ અને બ્યુટી સલુન્સ, મસાજ, ટેટૂ અને પીયર્સીંગ પાર્લર, ઇન્ડોર ફિટનેસ અને ડાન્સ સ્ટુડિયો, ઇન્ડોર જીમ અને રમતના સ્થળો અને સુવિધાઓ, સ્વીમિંગ પુલ્સ અને વોટર પાર્ક, એક્ઝિબિશન અને કોન્ફરન્સ સેન્ટર્સને હજૂ ખોલવાની મંજુરી નથી.
હજારો બિઝનેસીસને શરૂ કરવા માટે સામાજિક અંતરનો નિયમ ‘એક મીટર પ્લસ’ કરાયો છે. પણ ટ્રાન્સમિશનના જોખમો ‘વ્યાપક રીતે ઓછા રહે” તે સુનિશ્ચિત કરવા માટે ફેસ માસ્ક જેવી તકેદારી રાખવામાં આવશે. ત્રણ મહિનાથી વધુ સમયથી ‘શિલ્ડ’ કરી રહેલા લોકો 6 જુલાઈથી પોતાનું ઘર છોડી શકે છે.
કોવિડ-19નો રોગચાળો ફરીથી ઉથલો મારશે તો આ ફેરફારો ઉલટાવી શકાશે એવી બોરિસ જ્હોન્સને ચેતવણી આપી છે. યુકેમાં અત્યાર સુધીમાં કુલ 42,000થી વધુ લોકોના મોત નિપજ્યાં છે. ડચકા ખાતા અર્થતંત્રને બચાવવા માટે પાસા ફેંકી રહેલા વડા પ્રધાને કૉમન્સને કહ્યું હતું કે તા. 4 જુલાઇનો દિવસ ઘણાં બધા બિઝનેસીસની શરૂઆત સાથેનો ‘સુપર સેટરડે’ હશે.
