થોડા મહિનામાં યોજાનારી લોકસભાની ચૂંટણી પહેલા, ગુજરાત સરકારે વિવિધ કલેક્ટર અને જિલ્લા વિકાસ અધિકારીઓ (DDO) સહિત 50 IAS અધિકારીઓની બદલી કરી હતી. રાજ્યના સામાન્ય વહીવટ વિભાગે મંગળવારે રાત્રે આ અંગેનું નોટિફિકેશન જારી કર્યું હતું.
નોટિફિકેશન મુજબ જામનગર જિલ્લા કલેક્ટર બી એ શાહની વડોદરા જિલ્લાના નવા કલેક્ટર તરીકે બદલી કરવામાં આવી છે. હાલમાં વડોદરા કલેક્ટર તરીકે ફરજ બજાવતા એ.બી. ગોરની ગાંધીનગરમાં મુખ્યમંત્રી કાર્યાલયમાં ઓફિસર ઓન સ્પેશિયલ ડ્યુટી (OSD) તરીકે નિમણૂક કરવામાં આવી છે.
સુરતના કલેક્ટર આયુષ ઓકની વલસાડના નવા કલેક્ટર તરીકે બદલી કરવામાં આવી છે. હાલમાં ટૂરિઝમ કોર્પોરેશન ઓફ ગુજરાત લિમિટેડના મેનેજિંગ ડિરેક્ટર તરીકે ફરજ બજાવતા સૌરભ પારધીની સુરતના નવા કલેક્ટર તરીકે નિમણૂક કરવામાં આવી છે.
મોરબી જિલ્લા કલેક્ટર જી.ટી.પંડ્યાની હવે દેવભૂમિ દ્વારકા જિલ્લાના કલેક્ટર તરીકે નિમણૂક કરવામાં આવી છે. કે.એલ.બચાણીની જગ્યાએ નવસારીના કલેક્ટર અમિત પ્રકાશ યાદવને હવે ખેડા જિલ્લાના કલેક્ટર બનાવવામાં આવ્યા છે. બચાણીને ગાંધીનગરમાં માહિતી નિયામક તરીકે નિયુક્ત કરવામાં આવ્યા છે.
વલસાડના કલેક્ટર ક્ષિપ્રા અગ્રેને નવસારીના નવા કલેક્ટર બનાવાયા છે.ગીર-સોમનાથના કલેક્ટર એચ.કે.વઢવાણિયાને આરોગ્ય અને પરિવાર કલ્યાણ વિભાગ ગાંધીનગરમાં અધિક સચિવ તરીકે નિયુક્ત કરવામાં આવ્યા છે.
છોટાઉદેપુર જિલ્લા કલેક્ટર સ્તુતિ ચરણને વોટર એન્ડ સેનિટેશન મેનેજમેન્ટ ઓર્ગેનાઈઝેશન, ગાંધીનગરના મુખ્ય કાર્યકારી અધિકારી તરીકે નિયુક્ત કરવામાં આવ્યા છે. નિતિન સાંગવાન, 2016 બેચના IAS અધિકારી હાલમાં ગાંધીનગરમાં મત્સ્યોદ્યોગ નિયામક તરીકે ફરજ બજાવતા, જૂનાગઢના નવા DDO તરીકે નિયુક્ત કરવામાં આવ્યા છે.
જૂનાગઢ મ્યુનિસિપલ કમિશનર આર.એમ.તન્નાની સુરેન્દ્રનગરના ડીડીઓ તરીકે નિમણૂક કરવામાં આવી છે. ગૃહ વિભાગમાં સંયુક્ત સચિવ તરીકે ફરજ બજાવતા યોગેશ નિરગુડેને દાહોદ જિલ્લાના નવા કલેક્ટર તરીકે નિયુક્ત કરવામાં આવ્યા છે.અમદાવાદમાં સ્ટેટ ટેક્સના એડિશનલ કમિશનર તરીકે ફરજ બજાવતા કિરણ ઝાવેરીને તેના કલેક્ટર તરીકે મોરબી જિલ્લામાં મોકલવામાં આવ્યા છે.
