સુપ્રીમ કોર્ટે તેના એક મહત્ત્વના ચુકાદામાં જણાવ્યું હતું કે સફળ UPSC ઉમેદવારને તેમની પસંદગીની કેડર કે નિમણુકનું સ્થળની ફાળવણી માગવાનો હક નથી, કારણ કે તેઓ ઓલ ઇન્ડિયા સર્વિસ માટેના ઉમેદવાર તરીકે “આંખને સંપૂર્ણ ખુલ્લી રાખીને” દેશમાં કોઇપણ જગ્યાએ નોકરી કરવાનો વિકલ્પ પસંદ કરે છે.
સુપ્રીમ કોર્ટે મંડલ કેસમાં ઐતિહાસિક ચુકાદાનો ઉલ્લેખ કરીને અવલોકન કર્યું હતું કે SC/ST કે OBCના ઉમેદવાર જો જનરલ કેટેગરી હેઠળ મેરિટ્સથી સિલેક્શન માટે UPSCને યોગ્ય લાગે તો તેમની બિનઅનામત જગ્યાઓ સામે નિમણુક થવી જોઇએ.
કેરળ હાઇ કોર્ટના ચુકાદા સામે કેન્દ્ર સરકારની અપીલને પગલે સર્વોચ્ચ અદાલતે આ અવલોકન કર્યું હતું. કેરળ હાઇકોર્ટ તેના ચુકાદામાં હિમાચલપ્રદેશમાં પોસ્ટિંગ આપવામાં આવેલા મુસ્લિમ મહિલા આઇએએસ અધિકારી એ શૈનામોલને હોમ કેડર કેરળ આપવાનો કેન્દ્રને આદેશ આપ્યો હતો.
આ મહિલા આઇએએસ ઓફિસરને કેરળ કેડર આપવાનો આદેશ આપતા કેરળ હાઇ કોર્ટના હુકમને સુપ્રીમ કોર્ટે રદ કર્યો હતો. જસ્ટિસ હેમંત ગુપ્તા અને વી રામસુબ્રમણ્યમની બનેલી ખંડપીઠે જણાવ્યું હતું કે જો ઉમેદવાર રિઝર્વ અનુસૂચિત જાતિ (એસસી), જનજાતિ (એસટી) કે અન્ય પછાત વર્ગ (ઓબીસી) કેટેગરીમાંથી આવતા હોય તો તેઓ ક્વોટાનો લાભ લઇને જનરલ કેટેગરીમાં સિલેક્ટ ન થઈ શકે. તેઓ પસંદગીની કેડર કે અપોઇમેન્ટ સ્થળ મેળવવા માટે અનાતમનો આશ્રય ન લઈ શકે.
36 પેજના ચુકાદામાં જસ્ટિસ ગુપ્તાએ જણાવ્યું હતું કે કેડરની ફાળવણી હકનો વિષય નથી. પસંદ થયેલા ઉમેદવારોને આઇએએસ તરીકે નિમણુકનો હક છે, પરંતુ તેમને પોતાની પસંદગી અને પોતાના વતન રાજ્યની કેડરમાં ફાળવણી મેળવવાનો હક નથી. ઉપર જણાવ્યા મુજબ કેડરની ફાળવણી સર્વિસ સંબંધિત બાબત છે. ઓલ ઇન્ડિયા સર્વિસ માટેના ઉમેદવાર તરીકે અરજદાર પોતાની આંખ સંપૂર્ણપણે ખુલ્લી રાખીને દેશમાં કોઇપણ જગ્યાએ નોકરીનો વિકલ્પ પસંદ કરે છે. અરજદારની પસંદગી થાય ત્યારે હોમ કેડર મેળવવાની દોડ ચાલુ થાય છે.
યન એડમિનિસ્ટ્રેટિવ સર્વિસ રૂલ્સના ઉલ્લેખ કરતાં બેન્ચે જણાવ્યું હતું કે કેડરની ફાળવણી કરવાની પ્રોસિજર એક મિકેનિકલ પ્રોસેસ છે અને નિયમોની શરત સિવાય કોઇ અપવાદ નથી. સર્વોચ્ચ અદાલતે જણાવ્યું હતું કે રાજ્ય પોતાની ઇચ્છા મુજબ કેડરની ફાળવણી કરી શકે નહીં. તેથી ટ્રિબ્યુનલ કે હાઇ કોર્ટે ફાળવણી પરિપત્રના કથિત ઉલ્લંઘનની દલીલને આધારે કેડરની ફાળવણીમાં દરમિયાનગીરી કરવી જોઇએ નહીં.
સૈનામોલે 2006માં એક્ઝામમાં 20મો ક્રમ મેળવ્યો હતો અને તે મુસ્લિમ ઓબીસી કેટેગરીમાં હોવા છતાં જનરલ કેટેગરી હેઠળ સિલેક્ટ થઈ હતી અને તેને હિમાચલપ્રદેશ કેડરની ફાળવણી થઈ હતી.
