રિલાયન્સ ઇન્ડસ્ટ્રીઝના જિયો પ્લેટફોર્મ્સ અને લક્ઝમબર્ગ સ્થિત SES વચ્ચેના સંયુક્ત સાહસને ભારતમાં સેટેલાઇટનું સંચાલન કરવા માટે ભારતીય અવકાશ નિયમનકારી સંસ્થા ઇન્ડિયન નેશનલ સ્પેસ પ્રમોશન એન્ડ ઓથોરાઇઝેશન સેન્ટર (IN-SPACE)એ મંજૂરી આપી છે. આનાથી રિલાયન્સ માટે દેશમાં સેટેલાઇટ ઇન્ટરનેટ સર્વિસ લોન્ચ કરવાનો માર્ગ મોકળો થયો છે.
ઓર્બિટ કનેક્ટ ઈન્ડિયાને આ મંજૂરીઓ આપવામાં આવી છે. આ કંપની સેટેલાઇટ-આધારિત હાઇ-સ્પીડ ઇન્ટરનેટ સર્વિસ ચાલુ કરવાની યોજના ધરાવે છે. એલોન મસ્કની સ્ટારલિંક અને એમેઝોન ભારતમાં સેટેલાઇટ ઇન્ટરનેટ સર્વિસની મંજૂરી મેળવવા માટે પ્રયાસ કરી રહ્યાં છે ત્યારે રિલાયન્સને આ સફળતા મળી છે.
આ મંજૂરીઓ એપ્રિલ અને જૂનમાં અપાઈ હતી. ઓર્બિટ કનેક્ટને ભારતની ઉપર ઉપગ્રહોનું સંચાલન કરવાની મંજૂરી આપે છે, પરંતુ કામગીરી શરૂ કરવા માટે દેશના ટેલિકોમ વિભાગ દ્વારા વધુ મંજૂરીઓની જરૂર છે.
IN-SPACEના ચેરમેન પવન ગોએન્કાએ રોઈટર્સને જણાવ્યું હતું કે હાઈ-સ્પીડ સેટેલાઈટ આધારિત ઈન્ટરનેટ સર્વિસ ચાલુ કરવા માગતી અન્ય કંપની ઈન્મરસેટને પણ ભારતમાં ઉપગ્રહો ચલાવવાની મંજૂરી મળી ગઈ છે, અન્ય બે કંપનીઓ, એલોન મસ્કની સ્ટારલિંક અને એમેઝોનની AMZN.O ક્વિપરે અરજી કરી છે.
કન્સલ્ટન્સી ડેલોઇટે જણાવ્યું હતું કે ભારતનું સેટેલાઇટ બ્રોડબેન્ડ સર્વિસ માર્કેટ આગામી પાંચ વર્ષમાં દર વર્ષે 36% વધવાની અને 2030 સુધીમાં $1.9 બિલિયન સુધી પહોંચવાની ધારણા છે.
વૈશ્વિક સ્તરે, સ્પેસ-આધારિત ઇન્ટરનેટ દ્વારા વિશ્વના ગ્રામીણ વિસ્તારોને જોડવાની રેસ વેગ પકડી રહી છે. એમેઝોન કુઇપરમાં $10 બિલિયનનું રોકાણ કરવાની યોજના ધરાવે છે. ગયા અઠવાડિયે, શ્રીલંકાએ સ્ટારલિંકને ત્યાં ઇન્ટરનેટ સેવાઓ પ્રદાન કરવા માટે પ્રાથમિક મંજૂરી આપી હતી.
ગોએન્કાએ જણાવ્યું હતું કે ભારતમાં આ ક્ષેત્રમાં જેટલી વધુ કંપનીઓ સામેલ થશે તેટલો ગ્રાહકોને વધુ લાભ થશે. ભારતમાં કમ્યુનિકેશન સર્વિસના તુલનાત્મક નીચા ભાવથી વૈશ્વિક કંપનીઓને તેમના ભાવમાં ઘટાડો કરવા ઇનોવેશન કરવાની પ્રેરણા મળશે.
વડાપ્રધાન મોદીની સરકાર ભારતની સ્પેસ ઇન્ડસ્ટ્રીને વેગ આપવા કામ કરી રહી છે. આ વર્ષે સરકારે આ ક્ષેત્રમાં સીધા વિદેશી રોકાણને મંજૂરી આપી હતી.
![](https://www.garavigujarat.biz/wp-content/uploads/2024/06/eee.jpg)