અમદાવાદમાં સોમવારે બળાત્કારની બે પોલીસ ફરિયાદ થઈ હતી. એક કેસમાં 40 વર્ષની ઘાટલોડિયાની મહિલા પર તેના ઓનલાઈન ફ્રેન્ડ દ્વારા બળાત્કાર ગુજારવામાં આવ્યો છે, જ્યારે અન્ય કેસમાં 20 વર્ષની રાણીપની યુવતીને તેના પતિના કોન્ટ્રાક્ટરે બંધ બનાવીને દુષ્કર્મ આચર્યું હોવાની ફરિયાદ નોંધાઈ છે.
40 વર્ષની મહિલા પર દુષ્કર્મ આચરવામાં આવ્યું હોવાની ઘટના પીડિતા ખાનગી સ્કૂલમાં શિક્ષક તરીકે ફરજ બજાવતી હતી. આ શિક્ષિકાનો ફેસબૂક દ્વારા 33 વર્ષના વસ્ત્રાલના રુપેશ પટેલ સાથે સંપર્ક થયો હતો. ફ્રેન્ડશિપ થયા બાદ પીડિત શિક્ષિકા અને રુપેશ પટેલે ફોન નંબરની આપલે કરી હતી અને પછી તેમની વચ્ચે મેસેજ અને ફોનથી વાતો શરુ થઈ ગઈ હતી.
પીડિત શિક્ષિકાએ નોંધાવેલી ફરિયાદમાં જણાવ્યું છે કે, “રુપેશ પટેલે મહિલાને તેની સાથે રિલેશનશિપ રાખવા માટે કહ્યું હતું, તેણે ઈનકાર કર્યો હતો. પરંતુ રુપેશ શિક્ષિકાનું અપહરણ કરીને તેને વસ્ત્રાલમાં આવેલા એક કોમ્પ્લેક્ષમાં લઈ ગયો અને તેના પર બળાત્કાર ગુજાર્યો હતો. આ પછી રુપેશે મહિલાને તેના ઘર પાસે છોડી ગયો હતો.” ફરિયાદના આધારે ઘાટલોડિયા પોલીસે રુપેશ પટેલની ધરપકડ કરી લીધી અને તેને સ્થાનિક કોર્ટમાં રજૂ કરવામાં આવ્યો હતો.
બીજા કેસમાં 20 વર્ષની પીડિતાએ જણાવ્યું કે, તેનો પતિ AMCની કચરો એકઠો કરવાનું વાહન ચલાવે છે.
જેણે આક્ષેપ મૂક્યો છે કે પતિના સુપરવાઈઝર રામુ મુનિયાએ તેની મહિલા મિત્ર સુમિત્રા ભાભોરની મદદથી 11 સપ્ટેમ્બરે બળાત્કાર ગુજાર્યો હતો. પીડિતાએ જણાવ્યું કે સુમિત્રા તેની રાણીપમાં પાડોશી છે, જેણે 11 સપ્ટેમ્બરે સવારે બોલાવી હતી અને પછી તે તેને આરોપી સુપરવાઈઝર રામુ પાસે લઈ ગઈ હતી. 20 વર્ષની પીડિતા પોતાની ફરિયાદમાં જણાવે છે કે, “જ્યારે તે સુમિત્રાના ઘરમાં પ્રવેશી ત્યારે રામુ મુનિયા તેની રાહ જોઈને બેઠો હતો. આ પછી સુમિત્રા રૂમમાંથી જતી રહી અને તેણે દરવાજો બહારથી બંધ કરી દીધો હતો. રામુએ આ પછી તેના બાળકને મારી નાખવાની અને પતિને સળગાવી દેવાની ધમકી આપીને બળાત્કાર ગુજાર્યો હતો.”
